(ටී.කේ.ජී.කපිල )

කුවේට් රාජ්‍යයේ සිට කටුනායක ගුවන් තොටුපොළ වෙත පැමිණෙමින් තිබූ අල් ජසීරා ගුවන් සේවයේ ගුවන් යානය තුළ එහි ගමන් ගත් ගෘහ සේවිකාවක අද අලුයම දරු ප්‍රසූතියක් සිදු කර තිබේ .

ඇය මීට වසර දෙකකට පමණ පෙර , එනම් 2024 වසරේ කුවේට් රාජ්‍යය වෙත ගෘහ සේවය සදහා ගොස් තිබූ , ත්‍රිකුණාමලය ප්‍රදේශයේ පදිංචි 30 හැවිරිදි වියේ පසුවන කාන්තාවකි .

ඇය අද අලුයම 02.52 ට කුවේට් රාජ්‍යයේ , කුවේට් සිටි ගුවන් තොටුපොළේ සිට , අල් ජසීරා ගුවන් සේවයේ ජේ.එන්.- 551 දරන ගුවන් යානයෙන් කටුනායක ගුවන් තොටුපොළ වෙත පැමිණෙමින් තිබුණි .

මෙවැනි දරු ප්‍රසූතිය සදහා ආසන්න කාන්තාවන් ගුවන් ගමන් සදහා සහභාගී කර නොගන්නා අතර , ඇය සිය ගර්භණී බව ගුවන් සේවා නිලධාරීවරුන් හට සැගවීම සදහා , ඇයගේ සිරුරට තද වන ආකාරයේ " ඩෙනිම් " වර්ගයේ කළිසමක් ඇද සිට තිබේ .

මෙම දරු ප්‍රසූතිය ගුවන් සේවිකාවන්ගේ සහායෙන් , කිසිදු කරදරයකින් තොරව ගුවන් යානය තුළ දී සිදු කෙරුණ අතර , ගුවන් නියමුවා විසින් ඒ බැව් කටුනායක ගුවන් තොටුපොළ දැනුවත් කර , ගුවන් යානය ගොඩබසිනවාත් සමගම , ගිලන් රථ , වෛද්‍යවරුන් සහ හෙදියන් ගුවන් යානය අසළටම කැදවා , සූදානම් කර තැබීමට පියවර ගෙන තිබුණි .