(ජූඩ් සමන්ත, ලක්ෂමන් හෙට්ටිතන්ත්‍රි, එස්.හේරත්)

හලාවත ප්‍රාදේශීය සභා සභාපති ලෙස නම් කර ඇති සරත් සිල්වා මහතා සහ උප සභාපති එරික්  සැම්සන් යන මහත්වරුන් ඇතුළු තේරී පත්වූ සභිකයින් පිළිගැනීම සදහා ප්‍රාදේශීය සභා ප්‍රධාන කාර්යාලය තුළ සංවිධානය කර තිබූ උත්සවයට තවත් මන්ත්‍රීවරුන් දෙදෙනෙකු  ඇතුළු පිරිසක් අද (06)  කඩා වැදි කළබල කිරීම හේතුවෙන් එම අවස්ථාව  උණුසුම්  විය.

මේ හේතුවෙන් මාදම්පේ පොලීසියට අමතරව අතිරේක පොලිස් බල ඇණිද කැදවා තිබුණි. මාදම්පේ - සුදුවැල්ලේ පිහිටි හලාවත ප්‍රාදේශීය සභාවේ ප්‍රධාන කාර්යාලයේදී මෙම උත්සවය පැවැත්වීමට සංවිධානය කර තිබුණි.

සභාපති, උප සභාපති ඇතුළු සෙසු මන්ත්‍රීවරුන් පිළිගැනීම සදහා ප්‍රාදේශීය සභාවේ ලේකම් ආර්.ඒ.ජේ.එස්.හේමලතා මහත්මිය ඇතුළු නිලධාරීන් විසින් උත්සවය සංවිධානය කර තිබුණි.

උත්සවය ආරම්භ කිරීමට පෙර එම ස්ථානයට කඩා වැදුණු පොදු ජන පෙරමුණ පක්ෂයෙන් තරග කර හලාවත ප්‍රාදේශීය සභාවට තේරී පත්වී ඇති සුනිල් ෆාරිස් සහ ජනිත දේවප්‍රිය යන මන්ත්‍රීවරුන් ඇතුළු කණ්ඩායමක් කලහකාරී ලෙස  හැසිරිම හේතුවෙන් මෙවැනි තත්ත්වයක්  ඇති විය.  සුනිල් පාරිස් මන්ත්‍රීවරයා බලහත්කාරයෙන් සභාපතිවරයාගේ  කාමරයට කඩා වැදී එහි අසුන් ගෙන ලොග් සටහන් තැබීමට උත්සහා කළද  පොලීසියේ මැදිහත් වීමෙන් එය ව්‍යර්ථ විය.

අනතුරුව සුනිල් පාරිස් මන්ත්‍රීවරයා විසින් ජාතික කොඩියද, ජනිත දේවප්‍රිය මන්ත්‍රීවරයා විසින් පළාත් පාලන කොඩියද එසවීම සිදු කරන ලදි. මේ අතර පැමිණ සිටි පිරිසට සුදානම් කර තිබූ සංග්‍රහය පිළිගැන්වීමටද ඔවුන් කටයුතු කළ අතරතුරදී උත්සවයට පැමිණි   සභාපති සරත් සිල්වා මහතා එම ස්ථානයට පැමිණ බාධා කළේය.  

පසුව ජාතික කොඩිය, පළාත් කොඩිය සහ පළාත් පාලන කොඩි එසවීම නැවත සිදු විය. මේ අතර තුර සභාපති සරත්  සිල්වා මහතා සභාපති සරත් සිල්වා මහතා වැඩ බාර ගැනීම සිදු කළේය.

සභාපති සරත් සිල්වා මහතා සහ පළාත් සභා මන්ත්‍රී පාලිත රෝහණ යන මහත්වරුන් සභාව අමතන අවස්ථාවේදී සභාවේදී පිටත රැදී සිටි පිරිස ඊට බාධා කළේය.

මෙහිදී අදහස් දැක්වූ ප්‍රාදේශීය සභා මන්ත්‍රී සුනිල් පාරිස් මහතා කියා සිටියේ පසුගිය පළාත් තමන් හලාවත ප්‍රාදේශීය සභාවේ සෙසු අපේක්ෂකයින්ට වඩා වැඩි ඡන්ද ප්‍රමාණයක් ලබා ගෙන ඇති නමුත් ලයිස්තුවේ 06 ස්ථානයට පත්වූ අයෙකුට සභාපති ධූරය ලබා දී ඇති බවයි.

විරෝධතාවයට එක්ව සිටි ප්‍රාදේශීය සභා මන්ත්‍රී ජනිත දේවප්‍රිය මහතා කියා සිටියේ මෙම අරගලය දිගින් දිගටම රැගෙන යන බවත්,බහුතර සභිකයින් තමන් සමඟ සිටින බවත්ය.

මේ සම්බන්ධයෙන් අප පාර්ලිමේන්තු මන්ත්‍රී අරුන්දික ප්‍රනාන්දු මහතාගෙන්ද විමසීමක් කළේය

‘යම් වරදක් සිදුවී ඇත්නම් එය නිවැරදි කිරීම සදහා පක්ෂ නායකත්වය සමඟ සාකච්ඡා  කිරීමට තමන් කටයුතු කරන බව හෙතෙම පැවසීය. 

හලාවත ප්‍රාදේශීය සභාවේ නව සභාපති සරත් සිල්වා මහතාගෙන් මේ සම්බන්ධ   විමසීමේදී පැවසුයේ - ‘මම කිසිමකෙනෙකුගෙන් සභාපතිකම ඉල්ලං ගියේ නෑ.නමුත් මට ලැබුණා. බාධක ඇති වෙයි.ඒත් මම ජනතාවට සේවය කරන්න සුදානම්.කව්රු කෑ ගැහුවත් මම ඉදිරියට යනවා.” යනුවෙනි