(ඡායාරූප - ගයාන් අමරසේකර)

ජනාධිපති මෛත‍්‍රීපාල සිරිසේන මහතාගේ නායකත්වය යටතේ ශ‍්‍රී ලංකාව ගෙනයන සංහිඳියා වැඩපිළිවෙළ ඔස්ට්‍රේලියා අග‍්‍රාමාත්‍ය මැල්කම් ටර්න්බුල් මහතා‍ගේ මහත් පැසසුමට ලක්විය.

නිල සංචාරයක් සඳහා දිවයිනට පැමිණි ඔස්ට්‍රේලියා අග‍්‍රාමාත්‍යවරයා අද (2) පෙරවරුවේ ජනාධිපති කාර්යාලයේ දී ජනාධිපති මෛත‍්‍රීපාල සිරිසේන මහතා හමුවූ අතර එහිදී මේ බව ප්‍රකාශ කෙරිණි.

මේ අතර අගමැති රනිල් වික්‍රමසිංහ මහතා සහ ඕස්ට්‍රේලියා අගමැතිවරයා අතර අද පෙරවරුවේ වෙළඳ හා ආයෝජන ගිවිසුමක් ද අත්සන් කෙරිණි.

මිනිස් ජාවාරම් සහ මත්ද්‍රව්‍ය ජාවාරම් වලට එරෙහිව ශ‍්‍රී ලංකාව ගෙන යන ක‍්‍රියාමාර්ග ද මෙහිදී ඔස්ට්‍රේලියා අග‍්‍රාමාත්‍යවරයාගේ පැසසුමට ලක්විය.

ශ‍්‍රී ලංකාවේ වෙරළාරක්ෂක කටයුතු සඳහා ඔස්ට්‍රේලියාවෙන් ලැබෙන සහයෝගය පිළිබඳව ද ජනපති සිය ස්තූතිය ටර්න්බුල් මහතාට පළ කළේය.

නුදුරු අනාගතයේ ශ‍්‍රී ලංකාවේ වෙරළාරක්ෂක කටයුතු වෙනුවෙන් Stabicraft වර්ගයේ මුර යාත‍්‍රා තුනක් ශ‍්‍රී ලංකාවට පරිත්‍යාග කිරීමට ඔස්ට්‍රේලියාව සූදානමින් සිටින බවත් ඉතා වේගයෙන් ගමන් කළ හැකි එම මුර යාත‍්‍රා ශ‍්‍රී ලංකාවේ වෙරළාරක්ෂක කටයුතු වලට ඉමහත් පිටිවහලක් සපයනු ඇති බවත්  ඔස්ට්‍රේලියා අග‍්‍රාමාත්‍යවරයා දන්වා සිටියේය.

දෙරටේ අග‍්‍රාමාත්‍යවරුන් අතර අද පෙරවරුවේ අත්සන් තැබුණු  වෙළෙඳ හා ආයෝජන ගිවිසුම් තුළින් දෙරටේ ද්වීපාර්ශ්වික ආර්ථික හා වෙළෙඳ සබඳතා තව දුරටත් ශක්තිමත් වනු ඇති බවද ජනපති මෙහිදී ප්‍රකාශ කළේය.