(විනීතා එම් ගමගේ)
 
නිදහස් වෙළද කළාපවල සේවය කරන ලක්ෂයකට අධික සේවක සේවිකාවන් වෙනුවෙන් කලාප ආශ්‍රීතව ඡන්ද මධ්‍යස්ථාන පිහිටුවන්නැයි මැතිවරණ  ප‍්‍රචණ්ඩ ක‍්‍රියා නිරික්ෂණ මධ්‍යස්ථානය මැතිවරණ කොමිෂන් සභාවෙන් ඉල්ලීමක් කර ඇත.
 
කලාප වල සේවය කරන අති බහුතර සේකව පිරිස ඈත ගම්දනව්වලින් පැමිණ කලාප ආශ‍්‍රිතව නැවතී සේවය කරන පිරිස්  බවත් ඔවුන්ට ඡන්දය ප‍්‍රකාශ කිරීමට යාම සදහා නිවාඩු දුන්නත් නොයන්නේ ලබාදෙන නිවාඩු ඔවුන්ට ප‍්‍රමාණවත් නොවීම නිසා මෙන්ම ඒ සදහා ප‍්‍රමාණවත් නිවාඩු හෝ මුදල් නොමැති නිසා බවත් එම සංවිධානය පෙන්වා දෙයි.
 
සාමාන්‍යයෙන් ඈත ගමකට යන අයෙක් එක් දිනකින් ගමට ගොස් ඒමට කැමති නොවන බැවින් නොගොස් සිටින බවත් මෙවැනි කරුණු අනුව ඔවුන්ගේ ඡන්ද අයිතීන් වෙනුවෙන් එක් කලාපයකට එකක් හෝ කිහිපයක් බැගින් ඡන්ද පොලවල් ආරම්භ කිරීම විශාල පිරිසකට තම මතය පල කිරීමට අවස්ථාවක් ලබා දීමක් වන බවද  සංවිධානය පෙන්වා දෙයි.
  
ජනාධිපතිවරණය වැනි මැතිවරණයක දී මෙසේ කලාප ආශ්‍රීතව ඡන්ද පොලවල් ආරම්භ කිරීම ඉතා පහසු වනු ඇති බවත් එහි දී එන ප‍්‍රායෝගික ප‍්‍රශ්න නිරාකරණය කර ගැනීමට මැතිවරණ කොමිසම සමත්වනු ඇතැයි තමන් විශ්වාස කරන බවත් මැතිවරණ ප්‍රචණ්ඩ ක්‍රියා මධ්‍යස්ථානයේ ජාතික   සම්බන්ධිකාරක මංජුල ගජනායක මහතා පැවසීය. එයින් ලක්ෂයකට ආසන්න ඡන්දදායකයින් පිරිසෙන් අති බහුතරයකට සාධාරණය ඉටුවනු ඇතැයි  ද  ඔහු  පැවසීය.

 
 පළමු නිදහස් වෙළද කලාපය වන කටුනායක නිදහස් වෙළද කලාපයේ 40000 කට වැඩි පිරිසක් සේවය කරන අතර බියගම නිදහස් වෙළද කලාපයේ 22000 ක් පමණ ද, කොග්ගල නිදහස් වෙළද කලාපයේ 17000 ක් පමණ ද, වතුපිටිවල නිදහස් වෙළද කලාපයේ 8000 ක් පමණ ද ඇතුළු පිරිසක් වෙළද කලාප වල සේවය කරන  බව ශ‍්‍රමාභිමානි කේන්ද්‍රයේ වැඩසටහන් සංවිධායක සුගත් රාජපක්ෂ මහතා ලංකාදීපයට පැවැසීය.