(හර්ෂණ තුෂාර සිල්වා)

හිටපු අමාත්‍ය මිලින්ද මොරගොඩ මහතා ඉන්දියාවේ ශ්‍රී ලංකා මහ කොමසාරිස්වරයා ලෙස නම් කරනු ලැබ ඇත.

විදේශ සබඳතා අමාත්‍යාංශය මිලින්ද මොරගොඩ මහතාගේ නම පාර්ලිමේන්තුවේ උසස් නිලතල පිළිබඳ කාරක සභාවට යවා ඇත.
එක්සත් ජාතික පක්ෂයෙන් 2001 වසරේදී පාර්ලිමේන්තුවට පිවිසි මොරගොඩ මහතා අමාත්‍ය ධුර කිහිපයක් හෙබ වූ අතර පාත් ෆයින්ඩර් ආයතනයේ නිර්මාතෘවරයා ද වේ.

මොරගොඩ මහතා මහින්ද රාජපක්ෂ මහතා ජනාධිපති වශයෙන් සිටියදී ඔහුගේ ජ්‍යෙෂ්ඨ උපදේශකවරයකු ලෙස ද කටයුතු කළේය.
හිටපු ජනාධිපති ලේකම් ඔස්ටින් ප්‍රනාන්දු මහතා 2018 වසරේ ඔක්තෝබර් මාසයේ සිට මේ වසරේ ජනවාරි මාසය දක්වා ඉන්දියාවේ ශ්‍රී ලංකා මහ කොමසාරිස් ධුරය හෙබ වූ අතර හෙතෙම නැවත මෙරටට පැමිණීමත් සමඟ එම ධුරය මාස හතක් තිස්සේ පුරප්පාඩුව පැවැතිණි.

ඉන්දියාවේ, ශ්‍රී ලංකා නියෝජ්‍ය මහ කොමසාරිස් නිලූක කදුරුගමුව මහතා එම කාලයේදී වැඩබලන මහ කොමසාරිස්වරයා වශයෙන් කටයුතු කළේය.

අසල්වැසි ඉන්දියාව ශ්‍රී ලංකාවේ ඉතා ප්‍රමුඛතම සහ වැදගත්ම රාජ්‍ය තාන්ත්‍රික පාර්ශවය වේ.

විදේශ සබඳතාවලදී ඉන්දියාවට ප්‍රමුඛත්වය දී කටයුතු කරන බව ජනාධිපති ගෝඨාභය රාජපක්ෂ මහතා අවස්ථා කිහිපයකදීම ප්‍රකාශ කළ අතර ආරක්ෂාව සහ උපායමාර්ගික කරුණුවලදී ඉන්දියාවට මුල්තැන දී කටයුතු කරන බව විදේශ ලේකම් අද්මිරාල් ආචාර්ය ජයනාත් කොළඹගේ මහතා මෑතකදී පැවැසීය.

ශ්‍රී ලංකාව සිය ප්‍රථම විදේශ දූත කාර්යාලය විවෘත කළේ ද ඉන්දියාවේ ය. ඉන්දියාවේ නවදිල්ලි නුවරදී 1948 වසරේදී එම කාර්යාලය විවෘත කෙරුණි. ශ්‍රී ලංකාව (එවකට සිලෝන්) සහ ඉන්දියාව අතර මුල් වරට රාජ්‍ය තාන්ත්‍රික සබඳතා ආරම්භ කළේ ද 1948 වසරේදී ය.

ඊට පෙර ශ්‍රී ලංකාවේ නියෝජිතයකු ඉන්දියාවට පත් කර තිබූ අතර ශ්‍රී ලංකාවේ නියෝජනය කරමින් එම ධුරයට මුල්වරට පත් කෙරුණේ ශ්‍රීමත් ඩී.බී. ජයතිලක ය. ඔහු එම ධුරයට පත් කෙරුණේ 1942 වසරේදී ය. ඉන් අනතුරුව මෙරටින් බිහි වූ විශිෂ්ටයන් ගණනවක් ඉන්දියාවේ ශ්‍රී ලංකා මහ කොමසාරිස්ධුරය හොබවා ඇත.