ඉන්දික අරුණ කුමාර

මොරගහකන්ද ජලාශයේ ජල මට්ටම තවත් මීටර් හතරක් ඉහළ ගියහොත් විදුලි උප්පාදන  යන්ත්‍ර ස්වයංක්‍රීයව ක්‍රියාත්මක වන බව ව්‍යාපෘති මහජන සම්බන්ධතා නිලධාරී පී.ජී. දයානන්ද මහතා පැවැසීය.

මධ්‍යම කඳුකරයේ රිවස්ටන් හා නකල්ස් කඳු ප්‍රදේශයට ඇදහැලෙන තද වැසි හේතුවෙන් මොරගහකන්ද ජලාශයේ ජල මට්ටම ඊයේ (6) සවස වන විට මීටර් 170 දක්වා ඉහළ ගොස් ඇති බවත් එය මීටර් 174 දක්වා ඉහළ ගියහොත් විදුලි උප්පාදන යන්ත්‍රය ස්වයංක්‍රියව ක්‍රීයාත්මක වන බව ද දයානන්ද මහතා සඳහන් කළේය.

අඹන්ගඟ හරස් කරමින් ඉදිකළ මෙම ජලාශයෙන් ජාතික විදුලි පද්ධතිය මෙගා වොට් 25 විදුලි ධාරිතාවක් එක් කිරීමට බලාපොරොත්තු වන බව ඒ මහතා පැවැසීය.

 වේල්ලේ සම්පූර්ණ උස මීටර් මීටර් 187කි. එහි වාන් මට්ටම මීටර් 185කි. ස්වයංක්‍රීයව විදුලි උප්පාදන යන්ත්‍ර ක්‍රියාත්මක වීමට මීටර් 174 දක්වා ජල මට්ටම ඉහළ යා යුතු අතර විදුලි උප්පාදනය සඳහා මීටර් 169ක ජල මට්ටමක් පැවැතිය යුතුවේ. මේ වන විට ජලාශයේ ජල මට්ටම මීටර් 170 ක් බව ද ව්‍යාපෘති නිලධාරීහු පවසති.

ජලාශයේ සම්පූර්ණ ජල ධාරිතාව අක්කර අඩි 4.60.000කි මේ වන විට අක්කර අඩි 1,74,150ක් දක්වා ඉහළ ගොස් තිබේ.

ඉහළ කඳුකරයට ඇද හැලෙන තද වැසි හේතුවෙන් මේ වන විට බෝවතැන්න ජලාශයේ ජලයද අඹන්ගඟඔස්සේ මොරගහකන්ද ජලාශයට මුදා හරින බවත් වාර් ඉංජිනේරුවෝ පවති. මේ වන විට අඹන්ගඟේ ජලමට්ටමද  සීඝ්‍රයෙන් ඉහළ යමින් පවති.

2007 වර්ෂයේ වැඩ ආරම්භ කළ මෙම ජලාශයට ජලය පිරවීම 2017 වසරේ ජනවාරි 11 වැනි ජනාධිපති මෛත්‍රීපාල සිරිසේන මහතාගේ ප්‍රධානත්වයෙන් සිදු කෙරිණි.

විදුලි උප්පාදනය සඳහා මුදා හරින ජලය ගොවි බිම්වෙත ලබා දෙන බව ද ව්‍යාපෘති නිලධාරී දයානන්ද මහතා පැවැසීය.