වන්නි රොමේෂ් මධුෂංඛ

යාපනයේ පේදුරුතුඩුව  නැගෙනහිර අම්බාන් ප්‍රදේශයේ නිවසකින් කාන්තා මළ සිරුරක් හා බරපතල තුවාල ලැබූ තවත් කාන්තාව  හමුවීමත් සමඟ අද (02) දහවල් එම පළාත තුළ දැඩි නොසන්සුන් තත්ත්වයක් හටගෙන තිබේ.
 
පේදුරුතුඩුව පොලීසිය පැවසුවේ මළ සිරුරත් තුවාල කාරියගේ සිරුරත් සම්පූර්ණයෙන්ම ලෙයින් නැහැවී තිබුණු බැවින් මේ සිද්ධිය මිනී මැරුමක් බවට සැකකරණ බවටයි.
 
මව හා දියණිය පමණක් මේ නිවසේ තනිවම ජීවත් වන අතර මවට තදබල ලෙස පහර දී දියණිය ඝාතනය කොට දමන්නට ඇති බවට පොලීසිය සැකකරයි.
 
මියගිය දියණිය 58 හැවිරිදි නල්ලතම්බි දේවකී වන අතර බරපතල තුවාල ලබා ඇත්තේ ඇයගේ මව වන 78 හැවිරිදි නල්ලතම්බි සෙල්ලම්මා නැමති   කාන්තාවයි.
 
කෙසේ වෙතත් මේ වන විට තුවාලකාරිය පේදුරුතුඩුව මූලික රෝහලට ඇතුළත් කිරීමෙන් පසුව වැඩිදුර ප්‍රතිකාර සඳහා යාපනය ශීක්ෂණ රෝහල වෙත මාරු කොට එහි දැඩි සත්කාර ඒකකයේ ප්‍රතිකාර ලබමින් සිටියි.
 
මෙම සිද්ධිය සැලවීමත් සමඟම ප්‍රදේශයේ ජනතාව එම ස්ථානයට පැමිණ  ආවේගශීලීව හැසිරීම නිසා පොලීසියට ඔවුන්ව පාලනය කරගැනීමට විශාල වෙහෙසක් දැරීමට සිදුව තිබුණි. මෙම මරණයට හා තුවාල ලැබීමට හේතුව මෙතෙක් නිශ්චිතවම හෙලී වී නැත.