විනීතා එම් ගමගේ
 
 උමා ඔය ව්‍යාපෘතියේ බලපෑමට ලක්ව ඇති දික් අරාව ඇතුළු බණ්ඩාරවල ගම්මාන රැසක් විශාල නායයාමකට ආසන්නව පවතිතැයි පරිසර යුක්ති කේන්ද්‍රය කියයි.
 
බණ්ඩාරවෙල ප්‍රදේශයේ උමා ඔය ව්‍යාපෘතිය ආසන්න ප්‍රදේශවල නිවාස 7500 කට ආසන්න ප්‍රමාණයක්  ඉරිතලා ඇති බවත් මේ නිවාස සහිත පෙදෙස් නාය යාමකට ලක්වුවහොත් විශාල විනාශයක් සිදුවිය හැකි බවත් පරිසර යුක්ති කේන්ද්‍රයේ විධායක අධ්‍යක්ෂ හේමන්ත විතානගේ මහතා ලංකාදීපයට අද (08) පැවැසීය. 
 
ඔවුන්ගේ ආරක්ෂාව වෙනුවෙන් රජය වහාම මැදිහත් විය යුතු බවත් අදාල ඉදිකිරීම් සමාගමට දොස් පවරමින් සිටීමෙන් මේ අවස්ථාවේ පලක් නොවන බවත් විතානගේ මහතා කීය. 
 
මෝසම් වැස්ස ඇරඹුණු ඉකුත් 2 වැනිදා වැටුණු මිලි මීටර් හයක වැස්සෙන් පවා ඉරිතැලීම් විශාල පිපුරුම්  බවට පත් වූ බවත් එසේ සිදු වූයේ පිපිරුම්වල වැසි ජලය එකතුවීමෙන් බවත් කී විතානගේ මහතා කුරුඳුගොල්ල දික්අරාව ප්‍රදේශවල කුඹුරු පවා පුපුරා ඇතැයි සඳහන් කළේය. 
 
මීරියබැද්දේ වැනි විශාල විනාශයක් වීමට පෙර ඉවත් කළ යුතු ජනතාවට ආරක්ෂාකාරි තාවකාලික නිවාස ඉදිකර දී ඉක්මනින්ම ඔවුන් ඉවත් කළ යුතු බවත් එහි වගකීම ඇත්තේ ආන්ඩුව සතුව බවත් හෙතෙම වැඩිදුරටත් ස`දහන් කළේය.