ශ්‍රී ලංකා මානව හිමිකම් කොමිෂන් සභාවට පසුගිය වසරේ පළමු කාර්තු තුනේ (ජනවාරි 01 වැනිදා සිට සැප්තැම්බර් 30 දක්වා) පැමිණිලි 5614ක් ලැබුණු බවත් ඉන් 1174ක්  නීති විරෝධීව පොලිස් අත්අඩංගුවට ගැනීම් හා වධහිංසා කිරීම් පිළිබඳ සිදුවීම් බවත් ශ්‍රී ලංකා මානව හිමිකම් කොමිෂන් සභාව කියයි.

පරිපාලනයේදී වගකීම් පැහැර හැරීම සම්බන්ධයෙන් පැමිණිලි 770ක් ලැබී ඇතැයි ද, තමන්ට සිදුවූ අසාධාරණ ගැන රාජ්‍ය නිලධාරීන් පැමිණිලි 1002ක් ඉදිරිපත් කර ඇතැයි ද ශ්‍රී ලංකා මානව හිමිකම් කොමිෂන් සභාවේ සභාපතිනි ආචාර්ය දීපිකා උඩගම මහත්මිය පැවසුවාය.

පසුගිය වසර තුළ පැමිණිලි 396ක් ඉල්ලා අස් කර ගත් බවත්, පැමිණිලි 83ක නිර්දේශ ලබා දුන් බවත්, අධිකරණ ක්‍රියාමාර්ග යන නිසා පැමිණිලි 145ක් අතරමග නවතා දමා ඇති බවත් කොමිසම පවසයි.

නීති විරෝධී අත්අඩංගුවට ගැනීම් හා වධහිංසා කිරීමේ සිදුවීම් සම්බන්ධයෙන් දැඩි අවධානයක් යොමු කරන බවත්, වධහිංසා තුරන් කිරීම සඳහා පුරවැසියාගේ දායකත්වයද අවශ්‍ය බවත්, ගුරුවරුන් සහ විදුහල්පතිවරුන් විසින් සිසු සිසුවියන් හිංසනයට ලක් කරනු ලැබූ අවස්ථා රැසක්ද පසුගිය කාලයේ වාර්තා වූ බවත්  ආචාර්ය දීපිකා උඩගම මහත්මිය පැවසුවාය. මඩාටුගම සිදුවීම මෙන්ම ප්‍රේමසම්බන්ධතාවක් ඇතැයි කියමින් සිසුවකු පාසලෙන් අස් කළ සිද්ධියක් ගැන ද විමර්ශනයක්  කරගෙන යන බවත් ඇය සඳහන් කළාය.

ශ්‍රී ලංකා මානව හිමිකම් කොමිෂන් සභාවට කරන පැමිණිලිවල නිර්දේශ ලබා දීම ප්‍රමාද වන බවට නැඟෙන චෝදනා ගැන ද මාධ්‍යවේදීහු ප්‍රශ්න කළහ. ඊට පිළිතුරු දුන් ආචාර්ය උඩගම මහත්මිය ප්‍රකාශ කළේ මානව සම්පත්වල හිඟතාවය නිසා එවැනි ප්‍රමාදවීම් සිදුවන බවයි.

‘‘ ස්වාධීන කොමිෂන් සභාවක් විදියට අපිට අවශ්‍ය සම්පත් ගන්න දීර්ඝ පටිපාටියක් තියෙනවා. පැමිණිලි 5000කට වැඩි ගණනක් ආ බව අපි කිව්වා. ඒවා හැම එකක් ගැනම අවධානය යොමු කරලා විභාග කරද්දි මානවසම්පත් ප්‍රශ්නයත් එක්ක කාලයක් යනවා. අපි මේ ගැන ආණ්ඩුක්‍රම ව්‍යවස්ථා සභාවත් දැනුම්වත් කර තිබෙනවා. ‘යැයි ද උඩගම මහත්මිය කීවාය.

වරාය නගරය සහ කැලණි ගඟට අපවිත්‍ර එකතු කිරීම ගැන පැමිණිලි විමර්ශන අවසන්වෙලා අවුරුද්දක් වුණත් තවමත් නිර්දේශ ලබා දී නැතිවීම ගැන කළ විමසීමකදී සභාපතිනිය කියා සිටියේ ඒ පිළිබඳ නිර්දේශ ඉදිරියේදී ලබා දීමට තිබෙන බවයි.  නාවික හමුදාපතිවරයා මාධ්‍යවේදියකුට පහර දීම සම්බන්ධ කළ විමර්ශනය ගැන විමසූ අවස්ථාවේදී ඇය කියා සිටියේ ඒ ගැන ශ්‍රේෂ්ඨාධිකරණයේ පැමිණිල්ලක් ගොනු කර ඇති බැවින් අදාළ විමර්ශනය තාවකාලිකව නවතා ඇති බවයි. කොටදෙණියාව වධකාගාරයක් පවත්වාගෙන යෑම ගැන දිවුරුම් ප්‍රකාශත් සමඟ පැමිණිලි ඇති බැවින් ඒ සම්බන්ධයෙන් කිසිත් කර නැත්තේ ඇයිදැයි විමසූ විට ඇය කීවේ  ගැන සොයා බලන බවයි.