(අජිත්ලාල් ශාන්තඋදය)

පේ‍්‍රමලාල් ජයසේකර මන්ත‍්‍රීවරයා ඇතුළු පිරිසකට එරෙහිව විභාගවන නඩුවේ දී පැමිණිල්ලේ සාක්කිකරුගෙන් ආවේගශීලී නොවී ප‍්‍රශ්න අසන්නැයි රත්නපුර මහාධිකරණ විනිසුරු නීතිඥවරයාට අද(21) උපදෙස් දුන්නේය.

මහාධිකරණ විනිසුරු රොහාන් ජයවර්ධන මහතා මෙසේ පැවසුවේ රත්නපුර දිස්ත‍්‍රික් පාර්ලිමේන්තු මන්ත‍්‍රී පේ‍්‍රමලාල් ජයසේකර මහතා ඇතුළු විත්තිකරුවන් හත් දෙනෙකුට එරෙහි අධිචෝදනා නවයකින් යුතු නඩුවේ වැඩිදුර සාක්කි විභාගයේ තුන්වන සාක්කිකාර පොලිස් පරීක්‍ෂක සුසන්ත සමන්කුමාර බොදරගම මහතාගේ සාක්කි විමසීම සහ හරස් ප‍්‍රශ්න අවසන් කර පැමිණිල්ල මෙහෙයවන රජයේ ජ්‍යෙෂ්ඨ නීතීඥ ජනක බණ්ඩාර මහතා නැවත ප‍්‍රශ්න ඇසූ අවස්ථාවේ දී ය.

රත්නපුර මහාධිකරණ බල සීමාවට අයත් කහවත්ත නගරයේ දී වර්ෂ 2015ක් වු ජනවාරි මස 05 දින හෝ ඊට ආසන්න දිනයක දී  ජනාධිපතිවරණයේ අපේක්‍ෂකයෙකුව සිටි මෛත‍්‍රීපාල සිරිසේන මහතාට ආධාර පිණිස රැස්වීමක් පැවැත්වීමට කහවත්ත නගරයේ කළ සැරසිලි කඩා දැමීම සහ තුවාල සිදුකිරිම අරමුණු කරගෙන නීතී විරෝධී රැස්වීමක සාමාජිකයන්ව, එම ක‍්‍රියා කලාපයේදී වීරසිංහගේ කරුණාදාස වීරසිංහ සහ මොහොමඞ් හුසේන් ඉල්පාන් යන අයට වෙඩිතබා තුවාල සිදුකර මිනීමැරීමට තැත්කිරීම, බියවැද්දීම, දොඩංගොඩගේ සුනිල් පෙරේරා නොහොත් ශාන්ත දොඩම්ගොඩ යන අයගේ මරණය සිදුකිරීම ඇතුළුව අධිචෝදනා නවයක් විත්තිකරුවන් හත් දෙනෙකුට එරෙහිව නීතිපතිවරයා විසින් ගොනුකර ඇත.