(ඉන්දිකා රාමනායක)

කොලොන්නාව  ප්‍රදේශයේ  කප්පම් ගැනීම්  ඇතුළු අපරාධ රැසකට සම්බන්ධ පාතාල සාමාජිකයකු වු  පොඩි විජේ නැමැත්තා අත්අඩංගුවට ගත් බව විශේෂ කාර්ය බළකායේ සංවිධානාත්මක අපරාධ මර්දන ඒකකය  කියයි.

සැකකරු අත්අඩංගුවට ගන්නා අවස්ථාවේ දී ඔහු සතුව තිබි කඩුවක් පොලිස් බාරයට ගෙන තිබේ.

මෙම සැකකරු මිනීමරුමක් සම්බන්ධයෙන් වසර 12 ක් සිරදඬුවම් ලබා මීට මාස 3 ට පෙර නිදහස්ව ඇති බවද විශේෂ කාර්ය  බළකාය සඳහන් කරයි.

  
මෙම පුද්ගලයා කඩුවක් පෙන්වමින්  පිරිස බිය ගන්වන බවට විශේෂ කාර්ය බළකායට ලැබුණු තොරතුරක් මත   කොලොන්නාවේ  ෙපිහිටි ඔහුගේ නිවසේ දී මෙම කඩුව සමඟ සැකකරු අත්අඩංගුවට ගෙන තිබිණි.

අත්අඩංගුවට ගත් සැකකරුට  පුද්ගලයන්ට පහර දී කැපුම් තුවාල සිදුකිරීම,  2001 වසරේ දී අත්බෝම්යක් ළඟ තබා ගැනීම, කප්පම් ගැනීම්, හා මත්කුඩු ජාවාරම සම්බන්ධයෙන් චෝදනා ඇති බවද විශේෂ කාර්ය බළකාය පවසයි.

අත්අඩංගුවට ගත් සැකකරු වැඩිදුර පරීක්ෂණ සඳහා වැල්ලම්පිටිය පොලිසියට බාර දී ඇත. වැල්ලම්පිටිය පොලිසිය සිද්ධිය සම්බන්ධයෙන් පරීක්ෂණ පවත්වයි.