(අජිත්ලාල් ශාන්තඋදය)

නායයාමේ අවදානම් නිසා මේවන විට ජනතාව ඉවත් කර ඇති ප‍්‍රදේශවල අවතැන් ජනතාවට කළයුත්තේ කුමක් දැයි යන්න පිළිබඳ පැහැදිලි තීරණයක් ලබාදීමට කිසිවකුත් සමත් නොවීම නිසා ජීවිත අවදානම නොතකා යළි තම නිවාස වල යාම හැර වෙනත් විකල්පයක් නැතැයි එම අවතැන් වූ ජනතාව පවසති.

‘පොලීසියයි ග‍්‍රාම නිලධාරී මහත්වරුයි ඇවිත් අපිට ඉන්න එපා කියලා ඉවත් වෙන්න කිව්වා. අපි කඳවුරුවල ඇවිත් දැන් සතියක් විතර වෙනවා. අපෙ ගෙවල්වල තියන බඩුමුට්ටු ඉවත් කරගන්න තැනක් නෑ. ඒවා ගෙවල් වල. කන්න බොන්න ලැබෙන එක ඇත්ත. නමුත් මෙහෙම හැමදාම අපිට ඉන්න බෑ. මේ තැන්වල සනීපාරක්‍ෂක පහසුකම් ප‍්‍රමාණවත් නෑ. තාවකාලිකව ඉන්න ගැටලූවක් නෑ’ යැයි අවතැන්වූ ජනතාව එසේ මැසිවිලි නගති.

‘අපේ ගම්මාන නාය යනවාද නැද්ද කියලා හරියට ම අපිට කියන්නේ නෑ. වැස්ස වැඩි වුණොත් නාය යන්න ඉඩ තියෙනවා  කියලා කියනවා. දැන් අපේ දෛනික ආදායම් පවා මගහැරිලා.වැස්ස නිසා කිරි කපාගන්න බෑ. අවදානම නිසා තේ දළු ටික කඩාගන්න බෑ. සමහරු දවල්ට දළු කඩන්න යනවා. කුලී වැඩට යන කෙනෙකුට ඒකට යන්න විදියක් නෑ. කවුරුත් නැති නිසා සමහර ගෙවල් හොරු බිදිනවා. ඒ හින්දා ගෙවල්වල කවුරුහරි ඉන්න වෙනවා. වතු පිටිවල තියෙන  කිසි දෙයක් දැන් තියාගන්න නෑ හොරු බෝවෙලා. ගහක පොල් ගෙඩියක් තියන්නෙම නෑ. ගමේ කවුරුත් නැතිවග දන්න හින්දා පිටතින් හොරු එන්නේ කල්ලි පිටින්.‘ නායයාමේ අවදානමෙන් ඉවත්කළ ජනතාව නගන පොදු ප‍්‍රශ්නයකි.

මේ පිළිබඳව රත්නපුර දිස්ත‍්‍රික් ලේකම් කාර්යාලයෙන් විමසු අවස්ථාවේ එහි ප‍්‍රකාශකයෙක් පැවසුවේ රත්නපුර දිස්ත‍්‍රික්කයේ රත්නපුර, ඉඹුල්පේ, බළන්ගොඩ, පැල්මඩුල්ල, ගොඩකවෙල, කහවත්ත, නිවිතිගල, කලවාන, කුරුවිට, අයගම සහ ඇහැලියගොඩ යන ප‍්‍රාදේශීය ලේකම් කොට්ඨාසවලින් නායයාමේ අවදානම් ස්ථාන පිළිබඳව වැඩි වැඩියෙන් වාර්තා වන බවයි.

‘බොර වතුර පාරක් පොළොවෙන් මතුවීම, අසාමාන්‍ය ලෙස පොලොවේ පැලූම් ඇතිවීම, ගස්කොළන් පහළට ඇදවීම ආදී තොරතුරක් ආ සැනින් ඒ ප‍්‍රදේශවල ජනතාව ඉවත්කර ආරක්‍ෂිත ස්ථානවලට යවන්න කියලා සියලූම ප‍්‍රාදේශීය ලේකම්වරුන්  හරහා ග‍්‍රාම නිලධාරීන් දැනුවත් කරලා තියෙන්නේ. ඒ නිලධාරීන් වහාම ජනතාව ඉවත් කරනවා.’

‘මේ වගේ අවස්ථාවක දී ක්‍ෂණිකව විසදුම් දෙන්න අමාරුයි. ඒ සදහා පවතින නීතිරීති අනුව ක‍්‍රියා කිරිමට රජයේ නිලධාරීන් වන අපිට සිදුවනවා. දේශපාලන ක්‍ෂෙත‍්‍රයේ අය වගෙ අපිට වචනවලින් තීරණ දෙන්න බෑ. ඒනිසා රජයේ නිලධරින් විදියට අපි මුලින් ම කරන්නේ ජනතාවගේ ජීවිත ආරක්‍ෂා කර දෙන එකයි. ඉවත්වෙන්න කියලා කියපු කිසිම තැනකට දැනුම් දෙනතුරු යන්න එපා . ජීවිත වෙනුවෙන් ඉවසන්න කියන එක තමයි ඒ අයගෙන් අපි ඉල්ලන්නේ. මිලිමීටර් 100ට වැඩිවැස්සක් වැටුනොත් නායයාමේ අවදානම තියෙයි කියලා අනතුරු අඟවලා තියනවා. එහෙම තියෙද්දි ඉන් බාහිර තීරණ දෙන්න අපිට බෑ. තවම වැස්සේ අවදානම අඩුවෙලා නෑ.’ නම සඳහන් නොකරන ලෙස ඉල්ලූ එම ප‍්‍රකාශකයා පැවසුවේ ය.