(ඩයනා උදයංගනී)

දිවයිනේ පළාත් 7ක දිස්ත‍්‍රික්ක 16කට බලපා ඇති නියං තත්ත්වය හේතුවෙන් පවුල්  315 775කට අයත් 1 088 197 දෙනෙකු පීඩාවට පත්ව සිටින බව ආපදා කළමනාකරණ මධ්‍යස්ථානය පවසයි.

උතුරු, නැගෙනහිර, උතුරුමැද, වයඹ, දකුණු, මධ්‍යම, ඌව යන පළාත්වල  ජනතාව මෙලෙස නියඟයෙන් පීඩාවට පත්ව සිටින බව එම මධ්‍යස්ථානය අද (27) දහවල් 12.00 ට නිකුත් කළ තත්ත්ව වාර්තාවේ දැක්වේ.

මෙයින් වැඩිම පීඩාවකට ලක්ව සිටින්නේ උතුරු පළාතේ ජනතාව වන අතර එම පළාතේ යාපනය, මුලතිව්, කිලිනොච්චිය, වව්නියාව සහ මන්නාරම යන දිස්ත‍්‍රික්කවල පවුල් 1,33,678 කට අයත් 4,62,815 දෙනෙක් පීඩාවට පත්ව සිටිති.

පීඩාවට පත්වී සිටින්නන් සඳහා ජල බවුසර් හා ජල ටැංකි යොදාගෙන ජලය සැපයීමට දිස්ත‍්‍රික් ලේකම්වරුන් හරහා පියවර ගෙන ඇතැයි ද ආපදා කළමනාකරණ අමාත්‍යාංශය පවසයි.

කාලගුණ විද්‍යා දෙපාර්තමේන්තුව පවසන්නේ උතුරු, උතුරුමැද හා නැගෙනහිර පළාත්වල ඇතැම් ප‍්‍රදේශයන්ට මේ වන විටත් යම් තරමකින් වැසි ලැබෙමින් පවතින අතර සැප්තැම්බර් මාසයෙන් පමණ පසු අන්තර් මෝසම ආරම්භ වූ පසු තද වැසි ඇති විය හැකි බවයි.