විනීතා එම් ගමගේ
 
කොරියානු භාෂා ප‍්‍රවීණතා විභාගය සඳහා අයදුම්පත් 16749ක්  ඉකුත් දින තුනේ දී නිකුත් කර ඇතැයි ශ්‍රී  ලංකා විදේශ සේවා නියුක්ති කාර්යංශය කියයි. 

 
ඉදිකිරීම් අංශය හා නිශ්පාදන අංශය සඳහා මෙවර අයදුම්පත් නිකුත් කෙරුනු අතර ඉදිකිරීම් අංශය සඳහා අයදුම්පත් 3211 ක් ද නිශ්පාදන අංශය සඳහා අයදුම්පත් 13538 ක් ද නිකුත් කර ඇතැයි කාර්යංශයේ නියෝජ්‍ය සාමාන්‍යධිකාරි (බඳවා ගැනීම්) ඞී ඞී පී සේනානායක මහතා ලංකාදීපයට අද (01)  පැවැසීය.  
 
ඉකුත් 26 වැනිදා ආරම්භ වූ මෙම අයදුම්පත් නිකුත් කිරීම පසුගිය දින තුනේ දීම පැවැත්වුණු අතර හෙටත් අයදුම්පත් නිකුත් කරන බව ද සේනානායක මහතා පැවැසීය.
 
අනුරාධපුර, බදුල්ල, කුරුණෑගල, මහනුවර, රත්නපුර, වවුනියාව,මතුගම, මඩකලපුව අම්පාර, හලාවත, දඹුල්ල, ගාල්ල, යාපනය, පොළොන්නරුව   ති‍්‍රකුණාමලය, තංගල්ල, කටුනායක සහන පියස සහ පන්නිපිටිය යන ප‍්‍රදේශයන්හි පිහිටි ශ‍්‍රී ලංකා විදේශ සේවා නියුක්ති කාර්යාංශයේ පුහුණු මධ්‍යස්ථාන වලදී (02) වැනිදා තෙක් මෙම අයදුම්පත් නිකුත් කෙරේ. 
 
මෙවර කොරියානු භාෂා ප‍්‍රවීනතා විභාගය පරිගණක ආශ‍්‍රිතව පැවැත්වෙන අතර, ඉදිකිරීම් ක්ෂේත‍්‍රය සඳහා මාර්තු මස 19  සිට මැයි 4 දින දක්වාත් නිශ්පාදන ක්ෂේත‍්‍රය සඳහා මැයි 25 සිට ඔක්තෝම්බර් 5 දක්වාත්  පැවැත්වීමට නියමිත බව ද සේනානායක මහතා කීය.
 
වයස අවුරුදු 18 සිට 39 දක්වා ශ‍්‍රී ලාංකික පුද්ගලයින්ට විභාගය සඳහා අයදුම්කළ හැකිය. අයදුම්පත‍්‍ර පිරවීමට තමන්ගේ ගමන් බලපත‍්‍රය හා එහි පිටපතක්ද, සෙ.මි 3.5 x 4.5 ප‍්‍රමාණයේ ඡායාරූප 3 ක් තිබිය යුතුවේ. අයදුම්පත‍්‍ර නොමිලේ නිකුත් කරන අතර, විභාග ගාස්තු ලෙස ඇමරිකන් ඩොලර් 24 හෙවත් ශ‍්‍රි ලංකා මුදලින් රුපියල් 3.772.00 ගෙවිය යුතුවේ.
 
කොරියානු භාෂා ප‍්‍රවීණතා විභාගය සමත්වන අයදුම්කරුවන්ගේ නම වසර දෙකක කාලයක් කොරියානු රැකියා වෙබ් අඩවියේ  වලංගුව පවතින බවද කාර්යංශය හෙතෙම තව දුරටත් සඳහන් කළේය.