(ජයරත්න වික්‍රමආරච්චි)

පුත්තලම කරුවලගස්වැව නීලබැම්ම ගොවි ජනපදයේ ජනතාවගේ පානීය ජල අවශ්‍යතා සපුරාලීම සදහා ඉකුත් රජය සමයේ ආරම්භ කෙරුණු නීලබැම්ම ජල ව්‍යාපෘතියට ආරම්භ කර වසර කීපයක් ගතවී ඇතත් එහි ඉදිකිරීම් අවසන් කිරීමට බලධාරීන් පියවර නොගැනීම නිසා තමන් පීඩාවට පත්වී සිටින බව එහි ප්‍රතිලාබීහු පවසති.

එපමණක් නොව ජල ව්‍යාපෘතියයේ රුපියල් කොටියක් පමණ වටිනා සම්පත් විනාශ වී යමින් තිබෙන බව ද  ඔවුහු ප්‍රකාශ කරති.

ගොවි මහතෙකු පරිත්‍යාග කළ ඉඩම් කොටසක මෙහි ජල මූලාශ්‍රය හා පොම්පාගාරය ඉදිකර ඇත.

ඊට මීටර් 200ක් පමණ දුරින් අඩක් නිමකළ ජල කුළුණ දැකිය හැකි අතර ඒ අතර ප්‍රදේශයේ ජල නළ තොගයක් ගොඩ ගසා ඇත.
මේ සියලු ස්ථාන කැළෑවැදී ඇති අතර ගසා ඇති ජල නල තොගයක් හිරු එළියට නිරාවරණය වී තිබීම නිසා ඒවායේ ප්‍රමිතියද වෙනස් වී ඇති බවත් මේ පිළිබදව මෙතෙක් කළ දැනුම්දීම් ‘ගගට කැපූ ඉනි‘ බවට පත් වූ බවත් ඔවූහු පවසති.

මෙහි පානය  සදහා සුදුසු ජල සම්පාදනයක් නැත.මෙම ජල ව්‍යාපෘතිය මෙසේ විනාශ වී යන්නට ඉඩ නොදී ගැටලු ඇත්නම් ඒවා නිරාකරණය කර කඩිනමින් එහි ඉදිකිරීම් කටයුතු අවසන් කර විවෘත කර දෙන්නැයිද ප්‍රදේශවාසීහු වගකිව යුත්තන්ගෙන් ඉල්ලා සිටිති.