තිළිණි  ද සිල්වා  සහ රංජන් කටුගම්පොළ  
 
පළාත් පාලන ආයතන ඡන්ද විමසීමේදී ශ්‍රි ජයවර්ධනපුර කෝට්ටේ මහා නගර සභාව සඳහා මන්ත්‍රීව ධුර බෙදී ගිය ආකාරය නීති විරෝධී යැයි ප්‍රකාශ කරන ලෙස ඉල්ලා ශ්‍රී ජයවර්ධනපුර කොට්ටේ මහ නගර සභාවේ හිටපු නගරාධිපති ජනක රණවක මහතා  ශ්‍රේෂ්ඨාධිකරණය හමුවේ රිට් පෙත්සමක් ගොනු කර ඇත.
 
මෙම පෙත්සමේ වගඋත්තරකරුවන් ලෙස මැතිවරණ කොමිසමේ සභාපති මහින්ද දේශප්‍රිය මහතා සහ එම මහා නගර සභාව සඳහා තේරී පත්වූ සියළු මන්ත්‍රීකවරුන් ඇතුළු 50 දෙනෙකු නම් කර ඇත.
 
පෙත්සම්කාර ජනක රණවක මහතා පෙන්වා දෙන්නේ පසුගිය පළාත් පාලන ආයතන ඡන්ද විමසීමේදී කෝට්ටේ මහා නගර සභාව සඳහා ශ්‍රී ලංකා පොදුජන පෙරමුණ ලබා ගත් ඡන්ද 22,000 වෙනුවෙන් එම පක්ෂයට මන්ත්‍රී ධුර 18 ක් ලැබී ඇති බවය.
 
එහෙත් එම මහා නගර සභා සඳහා තරඟ කළ ශ්‍රී ලංකා නිදහස් පක්ෂය සහ එක්සත් ජාතික පක්ෂය එක්ව ඡන්ද 26,000 ක් ලබාගෙන තිබුණද එම පක්ෂ දෙක සඳහාම වෙන් කර ඇත්තේ මන්ත්‍රී ධුර 17 ක් පමණක් බව පෙත්සම්කරු  පැවසීය.
 
ඡන්ද 22,000 ලබා ගත් පක්ෂයට මන්ත්‍රී  ධුර 18 ක් ලැබෙද්දි ඡන්ද 26,000 ක් ලබා ගත් පක්ෂ දෙකකට මන්ත්‍රී ධුර 17 ක් හිමි වීම ගැටලු සහගත බව පෙන්වා දෙන ජනක රණවක මහතා මේ හේතුවෙන් මන්ත්‍රී සංයුතිය බෙදී යාම සම්බන්ධයෙන් මැතිවරණ කොමිසම නිකුත් කළ ගැසට් නිවේදනය බල රහිත කිරීමේ නියෝගයක් ලබාදෙන ලෙස ශ්‍රේෂ්ඨාධිකරණයෙන් ඉල්ලා තිබේ.
 
එසේම පෙත්සම විභාග කර අවසන් තීන්දුවක් ලබාදෙන තුරු කෝට්ටේ මහා නගර සභාව සඳහා නගරාධිපතිවරයා සහ උප නගරාධිපතිවරයා පත්වීම වැලැක්වීමේ අතුරු නියෝගයක් නිකුත් කරන ලෙසද පෙත්සම්කරු ශ්ශ්‍රේෂ්ඨාධිකරණයෙන් ඉල්ලා සිටි.