(බිඟුන් මේනක ගමගේ)

ජනමත විචාරණයකට තුඩු දෙන ආණ්ඩුක්‍රම ව්‍යවස්ථා ප්‍රතිසංස්කරණයක් නොකිරීමට සිය පක්ෂය කිසිදු ආකාරයේ තීන්දුවක් ගෙන නැතැයි එක්සත් ජාතික පක්ෂයේ හා ශ්‍රී ලංකා නිදහස් පක්ෂයේ නායකයන් තමන්ට සහතික වූ බව ජනතා විමුක්ති පෙරමුණ කියයි.

ආණ්ඩුක්‍රම ව්‍යවස්ථා ප්‍රතිසංස්කරණ මෙහෙයුම් කමිටුව පාර්ලිමේන්තුවේදී අද(4) රැස් වූ අවස්ථාවේදී ඒ සම්බන්ධයෙන් පළ වන මාධ්‍ය වාර්තා ගැන ජවිපෙ කළ ප්‍රශ්න කිරීමේදී අගමැති රනිල් වික්‍රමසිංහ මහතා හා විද්‍යා හා තාක්ෂණ ඇමැති සුසිල් ප්‍රේමජයන්ත මහතා මේ බව පැවසූයැයි ජනතා විමුක්ති පෙරමුණේ පාර්ලිමේන්තු මන්ත්‍රී බිමල් රත්නායක මහතා  පැවසීය. 

පුද්ගලයන්ගේ සිතැඟි පදනම් කරගෙන ආණ්ඩුක්‍රම ව්‍යවස්ථා ප්‍රතිසංස්කරණ සිදුකරන්නේ නම් ජනතා විමුක්ති පෙරමුණ එවැනි ක්‍රියාවලියකට සහාය පළ නොකරන බව ජවිපෙ නායකයා එහිදී අවධාරණය කළේ යැයි ද මන්ත්‍රීවරයා පැවසීය.  

ඒ අනුව ආණ්ඩුක්‍රම ව්‍යවස්ථා ප්‍රතිසංස්කරණ මෙහෙයුම් කමිටුව ඊට අදාළව සකස් කරන වාර්තා මත ව්‍යවස්ථා ප්‍රතිසංස්කරණ කටයුතු සිදුවන බවට අගමැතිවරයා පොරොන්දු වී යැයි ද  රත්නායක මහතා පවසයි.

ආණ්ඩුක්‍රම ව්‍යවස්ථා ප්‍රතිසංස්කරණ මෙහෙයුම් කමිටුව හෙට(05) හා අනිද්දා(06) ද පාර්ලිමේන්තුවේදී රැස්වීමට නියමිතය.