චන්දන ප්‍රනාන්දු
 
පාලක පක්ෂයේ පොදුජන පෙරමුණේ වෙන්නප්පුව ප්‍රාදේශීය සභා මන්ත්‍රී නීතිඥ ඇලෙක්ස් නිසාන්ත මහතා අද (13) පැවති ප්‍රාදේශීය සභා රැස්වීමේදී සභාවට නොබෝදා කොළඹ පැවති ජනබල උද්ඝෝෂණයේදී ලබාදුන් කිරි පැකට්ටුවක් ඉදිරිපත් කිරීම හේතුවෙන් සභාව එකම ගාලගෝට්ටියක් බවට පත්විය.    


ශ්‍රී ලංකා පොදුජන පෙරමුණ විසින් කොළඹදී සංවිධානය කළ මෙම උද්ඝෝෂණයට සහභාගී වූ වෙන්නප්පුව ජනතාවට ද ආණ්ඩු පක්ෂයේ මන්ත්‍රීවරුන් හා ඇමැතිවරුන් කුමන්ත්‍රණකාරි ලෙස විෂ සහිත කිරිපැකට් ලබාදීම හේතුවෙන් ඒවා පානය කිරීම නිසා අපහසුවට පත් වූ බව ඔහු පැවසීය.

මෙහිදී විපක්ෂයේ එක්සත් ජාතික පක්ෂ මන්ත්‍රීවරුන් ඇලෙක්ස් නිසාන්ත මන්ත්‍රිවරයාට  චෝදනා කළේ බොරු සන්දර්ශන නොපෙන්වා නීති ක්‍රියා මාර්ගයක් ගන්නා ලෙසයි. 


ආණ්ඩු පක්ෂයේ මන්ත්‍රීවරු ද ඇලෙක්ස් නිසාන්ත මන්ත්‍රීවරයාගේ සහයට එක්වෙමින් එය යහපාලන ආණ්ඩුව ජනබලයට බියවී කළ නින්දිත ක්‍රියාවක් බව පැවසූහ.   


විපක්ෂයේ මන්ත්‍රීවරුන් ඊට විරුද්ධව අදහස් දැක්වීමත් පක්ෂ විපක්ෂ මන්ත්‍රීවරු එකිනෙකාට අත් දිගු කරමින් ආවේගයෙන් අදහස් දක්වන්නට වූහ.

මෙම ජනබලයෙන් හොරුන් සහ වංචාකරුවන්ව ආරක්ෂා කිරීමට බලාපොරොත්තුවන්නේ නම් එය කවදාවත් සිදුනොවන බව පැවසීමත් සමඟ එක්සත් ජාතික පක්ෂ මන්ත්‍රීවරුන් අත්පොළසන් දීම විශේෂත්වයක් විය.