(මනෝප‍්‍රිය ගුණසේකර)

නීතිපතිවරයා ලෙස මෙන්ම ශ‍්‍රී ලංකා නීතීඥ සංගමයේ සභාපතිවරයා ලෙස කටයුතු කළ එකම පුද්ගලයා වන ජනාධිපති නීතීඥ ශිබ්ලි අසීස් මහතා  අද (08) අභාවප‍්‍රාප්ත විය.

කීර්තිමත් නීති විශාරදයකු ලෙස පිළිගැනෙන ජනාධිපති නීතීඥ ශිබ්ලි අසීස් මහතා රාජගිරිය ලේක් ඩ‍්‍රයිව් හි පදිංචිව සිටි අතර මුස්ලිම් ආගමානුකූලව අද ජාවත්ත මුස්ලිම් සුසාන භූමියේදී ඒ මහතාගේ දේහය මිහිදන් කෙරිණි.

කොළඹ රාජකීය විද්‍යාලයේ ආදී ශිෂ්‍යයකු වන ඒ මහතා 1969 වර්ෂයේදී නීතීඥයකු ලෙස දිව්රුම් දීමෙන් අනතුරුව රජයේ නීතීඥවරයකු ලෙස නීතිපති දෙපාර්තමෙන්තුවට බැඳී එහි ඉහළම තනතුර වන නීතිපතිවරයා ලෙස පත්විය.

ඉන් අනතුරුව පෞද්ගලික නීතීඥ වෘත්තියට පිවිසි ඒ මහතා ශ‍්‍රී ලංකා නීතීඥ සංගමයේ සභාපතිවරයා ලෙස පත් විය. මෙම තනතුරු දෙකම හෙඹවු එකම පුද්ගලයා වන්නේ ජනාධිපති නීතීඥ ශිබ්ලි අසීස් මහතාය.