(සිරාජ් හසීම්)

දේශපාලන පක්ෂ අතර සහ ජනතාව අතර ජාතික කොඩිය පිළිබද විවේචන තිබිය හැකි වුවත් ජාතික කොඩිය හෑල්ලුවට ලක්කිරීම කිසිසේත් අනුමත කළ නොහැකි යැයි උතුරු පළාත් ප්‍රධාන අමාත්‍ය සී.වී.විග්නේෂ්වරන් මහතා පැවසීය.

ජාතික කොඩියක් යනු රටක අනන්‍යතාව බවත් එය හෑල්ලුවට ලක්කිරීම යනු තම ජනතාවද ප්‍රතික්ෂේප කිරීමක් බවත් පළාත් අධ්‍යාපන අමාත්‍ය සර්වේෂ්වරන් මහතාට මෙම විරෝධය වෙනත් ආකාරයකින් පෙන්වා දීමට තිබුණු බවත් මහ ඇමැතිවරයා සඳහන් කළේය. 

උතුරු පළාත් අධ්‍යාපන අමාත්‍ය කන්දයියා ස්ර්වේෂ්වරන් මහතා පසුගියදා වව්නියාව සිංහල මහා විද්‍යාලයේ පැවති උත්සවයේදී ජාතික කොඩිය එසවීම ප්‍රතික්ෂේප කර සිටීමේ සිද්ධිය සම්බන්ධයෙන් විශේෂ ප්‍රකාශයක් සිදුකරමින් මහඇමැතිවරයා මේ බව කියා සිටියේය.

මම 1959 වසරේ රෝයල් විද්‍යාලයේ ජ්‍යෙෂ්ඨ ශිෂ්‍ය බටයකු විදිහට ජාතික නිදහස් දින උත්සවයකට සහභාගී වුණා. ඊට පස්සෙ එකදු අවස්ථාවක හෝ නිදහස් දින උත්සවයකට සහභාගී වුණේ නැහැ. මම විනිසුරුවරයකු විදිහට සිටියදීත් ජාතික මට්ටමේ උත්සව වලට සහභාගී නොවී සිටියා. හේතුව බ්‍රිතාන්‍යන්ගෙන් රටට නිදහස ලැබුණත් සිංහල ආධිපත්‍යයෙන් අපට නිදහසක් නොලැබීම‍යි.

පසුගිය වසරේ පෙබරවාරි මාසයේ 4 වැනි දා  ජාතික නිදහස් දින උත්සවයට දෙමළ ජාතික සන්ධානයේ නායක ආර්.සම්බන්ධන් මහතා සහබාගී වුණා. මට එම උත්සවයට සහභාගී වෙන්න ආරාධනා ලැබුණත් මා ඊට සහභාගී වුණේ නැහැ. මම මගේ විරෝධය දැක්වුයේ එලෙසයි. එහෙත් මම  ශ්‍රීලාංකික ජනතාව  පිළිගෙන තිබෙන ජාතික කොඩිය ඔසවා ඊට ගෞරවය පුද කරනවා. 

ජාතික ගීය ගයන අවස්ථාවේදී නැගිට සිට ඊට ආචාරය පුදකරනවා.දැන් ජාතික ගීය දෙමළ බසිනුත් ගැයෙනවා. අධ්‍යාපන ඇමැති සර්වේශ්වරන්ගේ හැගීම් එක් ආකාරයකින් පිටතට පැමිණියා. ඔහුව මම තේරුම් ගත්තා.මම ඊට ගරු කරනවා. මාගේ අදහස නම් ජාතික කොඩිය සහ ජාතික ගීය ප්‍රතික්ෂේප කිරීම යනු අපගේ ජනතාවද ප්‍රතික්ෂේප කිරීමකට සමානයි කියලයි. සර්වේෂ්වරන්ට සිය සිත් ආවේගය පිට නොකර දරාගෙන සිටින්නට තිබුණා.

ඇමරිකා එක්සත් ජනපදය ඔවුන්ගේ ජාතික කොඩිය ගිනිතැබීම සාධාරණ ප්‍රජාතින්ත්‍රවාදී කරුණක් විදිහටයි බලන්නෙ.එය වැරැද්දක් ලෙස හුවා දක්වලා එසේ සිදුකරන අයව අත්අඩංගුවට අරන් නීතිය ක්‍රියාත්මක කරන්නෙ නැහැ.සර්වේෂ්වරන් අමාත්‍යවරයාට සිය විරෝධය මෙසේ පාසලක නොදක්වන්නට තිබුණා.මෙය වෙනත් ආකාරයකින් පැහැදිලි කර දෙන්නට තිබුණා.මට ඒ ගැන තවත් මොකුත් කියන්න නැතැයි විග්නේෂ්වරන් මහතා ප්‍රකාශ කළේය.