( රොමේෂ් මධුෂංඛ)
 
මුලතිව් , එරින්තකාඩු ප්‍රදේශයේ ගොවිතැන් සඳහා කුඹුරට ගිය ගොවීන් 34 දෙනෙකු හදිසියේ ඇති වූ ගංවතුරක්  හේතුවෙන් කුඹුරු ඇති ප්‍රදේශයන්හි සිර වී සිටියදී අසල්වැසි ධීවර ගම්මානයන්හි  ධීවරයින්  පිරිසක් විසින්   බේරාගෙන  තිබේ.
 
එරින්තකාඩු හා සාලම්බෙයිආරු ප්‍රදේශයන්හි පිහිටි කුඹුරු සඳහා ගිය ගොවීන්  පිරිසක්   එම ප්‍රදේශයේ  වැව් කිහිපයක් වාන් දැමීමත් සමඟ කුඹුරු යට වීමෙන්   එහි සිරවී ඇත. අනතුරුව  ගම්මාන කිහිපයක ධීවරයින්ට දැනුම් දීමෙන් පසුව ධීවර බෝට්ටුවලින් කුඹුරු වෙත ගොස් විපතට පත් ගොවීන් පිරිස බේරාගෙන ආරක්ෂිත ස්ථාන කරා රැගෙනවිත් තිබේ.
 
පසුගිය දිනයන්හි ඇදහැලුණු ධාරාණිපාත වර්ෂාවන් හේතුවෙන් මුලතිව් දිස්ත්‍රීක්කයේ වැසියන් තිස්දහසකට අධික ප්‍රමාණයක් විපතට පත් වූ අතර නැවතත් වර්ෂාව ඇදහැලීමෙන් සාමාන්‍ය වැසියන් විපතට පත්වීමේ අවදානමක් පවතින බවටද මුලතිව් ආපදාකලමනාකරන කාර්යාලය  සඳහන් කරයි.