රවී ලියනගේ සහ සිරංගිකා ලොකුකරවිට

ගාල්ල මහ නගර සභාවේ නගරාධිපති තේරීමේ දී පොදුජන පෙරමුණේ නගරාධිපති අපේක්ෂකයා ජයග්‍රහණය කරවීම සඳහා ඡන්දය ලබාදුන් එක්සත් ජාතික පක්ෂයේ සියලු මන්ත්‍රීවරුන්ට එරෙහිව කඩිනමින් විනය ක්‍රියාමාර්ග ගන්නා බව ගාල්ල දිස්ත්‍රික් එක්සත් ජාතික පක්ෂ නායක ස්වදේශ කටයුතු අමාත්‍ය වජිර අබේවර්ධන මහතා පවසයි.

එක්සත්ජාතික පක්ෂයේ ගාල්ල දිස්ත්‍රික් නායකයා වන අමාත්‍යවරයා අද (25) නිකුත් කළ ප්‍රවෘත්ති නිවේදනයක මේ බව දැක්වේ.

එම නිවේදනයේ ඔහු වැඩිදුරටත් සඳහන් කර ඇත්තේ ගාල්ල මහනගර සභාව ජයග්‍රහණය කළ එක්සත් ජාතික පක්ෂයට සභික ධූර 14ක් හිමිවූ බවයි. ඒ අනුව ගාල්ල මහ නගර සභාවේ බහුතර බලයක් කිසිදු තනි පක්ෂයකට හිමි නොවූ බැවින් නගරාධිපතිවරයා හා නියෝජ්‍ය නගරාධිපතිවරයා තෝරාගැනීම සභිකයන්ගේ ඡන්දයෙන් කිරීමට සිදුවිය. 

අමාත්‍ය වජිර අබේවර්ධන මහතා පවසන්නේ නගර සභාවේ බලය ලබා ගැනීම සඳහා එක්සත් ජනතා නිදහස් සංධානයේ මන්ත්‍රීවරුන් තිදෙනාගේ ද එක්සත් ජාතික නිදහස් පෙරමුණේ මන්ත්‍රීවරයාගේ ද සහයෝගය තම පක්ෂයට ලැබුණු බවයි. 

ඒ අනුව මන්ත්‍රීවරු 18 දෙනකුගේ සහාය එක්සත් ජාතිත පක්ෂයට හිමිව තිබුණු බවත් නගරාධිපතිවරයා ලෙස එජාපයෙන් ජිලිත් නිශාන්ත මහතාත් නියෝජ්‍ය නගරාධිපති ලෙස එජනිසයේ දේශප්‍රිය ලියනගේ මහතාත් පත් කිරීමට මන්ත්‍රීවරු 18දෙනාම ඒකමතිකව එකඟ වී සිටි බවද අමාත්‍යවරයා සිය නිවේදනයේ සඳහන් කරයි.

එමෙන්ම නගරාධිපති තේරීමේ ඡන්ද විමසීමක් පැවැත්වෙන්නේ නම් එය විවෘත ඡන්දයක් ලෙස පැවැත්වීමටද මෙම සභිකයන් 18දෙනා එකඟ වී සිට ඇත. එම එකඟතාවයන් ඇති වීමට පෙර එක්සත් ජාතික පක්ෂයෙන් සභාවට තේරී පත්වූ ඇතැම් මුස්ලිම් ජාතික මන්ත්‍රීවරු තමන්ට නගරාධිපතිධූරය දෙන්න යැයි පුද්ගලිකව ඉල්ලා සිටිය ද සියලු දෙනා සමග ඉහත එකඟතාවයන්ට පැමිණි බවද අබේවර්ධන මහතා පවසයි. 

එවැනි එකඟතාවයන් තිබියදී නගරසභාවේ නගරාධීපතිවරා තේරීමේ ජන්ද විමසීම රහස් ඡන්දයක් ලෙස පැවැත්විය යුතු බවට තම පක්ෂයේ මුස්ලිම් ජාතික සභිකයන් අට දෙනකු ප්‍රකාශ කිරීමත් අනතුරුව නගරාධිපතිවයා තේරීමේ ඡන්දයේදී ශ්‍රී ලංකා පොදුජන පෙරමුණෙන් ඉදිරිපත් වූ නගරාධිපති අපේක්ෂකයාට එම මුස්ලිම් ජාතික සභිකයන් විසින් සහයෝගය ලබා දීමත් හේතුවෙන් නගර සභාවේ බලය තම පක්ෂයට අහිමි වූ බව අමාත්‍යවරයා පවසයි.

පළාත්පාලන ආයතන වල බලය ලබා ගැනීමේදී කවරාකාරයේ පක්ෂ හෝ කණ්ඩායම් සමග කටයුතු කළද ශ්‍රී ලංකා පොදුජන පෙරමුණ සමග කිසිදු ආකාරයක එකඟතාවයන්ට පැමිණීමෙන් වලකින ලෙස පක්ෂය විසින් උපදෙස් ලබාදී තිබියදී එක්සත් ජාතික පක්ෂයේ ෆවුසුල් නියාස් මහතා පක්ෂයේ මතයට පටහැණිව යමින් නියෝජ්‍ය නගරාධිපති ධූරය බාරගෙන ඇත. 

මේ අනුව පක්ෂයේ එකඟතාවයන්ට හා තීරණයන්ට පටහැණිව කටයුතු කරමින් ගාල්ල මහනගර සභාවේ බලය මුදලට පාවාදුන් එක්සත් ජාතික පක්ෂයේම සභිකන්ට එරෙහිව කඩිනමින් පරීක්ෂණයක් පවත්වා දැඩි විනය ක්‍රියාමාර්ගයක් ගන්නා බව වජිර අබේවර්ධන මහතා නිකුත් කළ නිවේදනයේ සඳහන් කර තිබේ.

ඔහු වැඩිදුරටත් සඳහන් කර ඇත්තේ පක්ෂ මහ ලේකම් වරයාට මේ බව දැනුම් දී ඇති බවත් පක්ෂ නායක රනිල් වික්‍රමසිංහ මහතාගෙන් ඒ සම්බන්ධව වැඩිදුර උපදෙස් ලැබී ඇති බවත්ය.