(රන්ජන් කටුගම්පොළ සහ මනෝප‍්‍රිය ගුණසේකර)

කොටි සංවිධානයේ ප‍්‍රධාන අවි ආයුධ සැපයුම්කරු සහ ජාත්‍යන්තර අංශයේ නායකයා වන කුමරන් පද්මනාදන් හෙවත් කේ.පී. වහාම අත්අඩංගුවට ගෙන ඔහුට එරෙහිව නඩු පැවරීමට නියම කරන්නැයි ඉල්ලමින් ජනතා විමුක්ති පෙරමුණේ පාර්ලිමේන්තු මන්ත‍්‍රී විජිත හේරත් මහතා ගොනු කළ පෙත්සම අභියාචනාධිකරණය අද(4) නිශ්ප‍්‍රභ කළේය.

මෙම පෙත්සම විභාගයට ගැනීමට පදනමක් නොමැති බව සඳහන් කරමින් අභියාචනාධිකරණය අදාළ පෙත්සම නිශ්ප‍්‍රභ කළේය.

කුමරන් පද්මනාදන් හෙවත් කේ.පී. නමැත්තාට රටින් පිටවීම වළකාලමින් අභියාචනාධිකරණය මීට පෙර අවස්ථාවක අතුරු තහනම් නියෝගයක් නිකුත් කොට තිබිණි.

මෙම පෙත්සම ඇල්.ටී.බී. දෙහිදෙණිය සහ ශිරාන් ගුණරත්න යන මහත්වරුන්ගෙන් සමන්විත අභියාචනාධිකරණ විනිසුරු මඩුල්ලක් හමුවේ සලකා බැලිණි.

ජනතා විමුක්ති පෙරමුණේ පාර්ලිමෙන්තු මන්ත‍්‍රී විජිත හේරත් මහතා විසින් පවරා ඇති මෙම පෙත්සමේ වගඋත්තරකරුවන් ලෙස නීතීපතිවරයා, පොලිස්පතිවරයා සහ ආගමන විගමන පාලකවරයා නම් කොට ඇත.

කේ.පී. නමැත්තා මේ වන විට කිලිනොච්චිය ප‍්‍රදේශයේ නිදැල්ලේ හැසිරෙන බවද ඔහු අත්අඩංගුවට ගෙන අදාළ අපරාධයන් සඳහා නඩු පවරන ලෙස මෙම පෙත්සමේ වගඋත්තරකරුවන්ට නියම කරන්නැයි ඉල්ලා සිටින පෙත්සම්කාර විජිත හේරත් මහතා කේ.පී. රටින් පිටවී පළායෑමට ඉඩ ඇති බැවින් ඔහුට රටින් පිටවීම වළකාළමින් අතුරු නියෝගයක් නිකුත් කරන්නැයිද ඉල්ලා සිටී.