(අජිත්ලාල් ශාන්තඋදය,  ජයන්ත නානායක්කාර) 

ශ‍්‍රී ලංකා පොදුජන පෙරමුණට බලය හිමි කොළොන්න ප‍්‍රාදේශීය සභාවේ ආණ්ඩු පක්‍ෂ සභිකයන් දෙදෙනෙකු ඉදිරියේ දී ස්වාධීනව කටයුතු කරන බව සභාවේ අද (11) පැවති මංගල රැස්වීමේ දී පැවසීමත් සමඟ සභාවේ පාලක පක්‍ෂයේ බහුතරය නැතිව ගියේය. එබැවින් සභාපතිවරයාට බලය පැවරීමට ගෙනා මුල්ම යෝජනාව විවාදයට නොගෙන සභාව කල් තැබීමට සභාපතිවරයාට සිදුවිය.

සභාපති රූපසේන තලවත්තගේ මහතාගේ සභාපතිත්වයෙන් යුතු කොළොන්න ප‍්‍රාදේශීය සභාව ඊයේ පළමුවරට කොළොන්න ප‍්‍රාදේශීය සභා රැස්වීම් ශාලාවේ දී රැස්විණි. 

පාලක ශ‍්‍රී ලංකා පොදුජන පෙරමුණට සභිකයන් 11 ක්, එක්සත් ජාතික පක්‍ෂයට සභිකයන් 6 ක් ද ජනතා විමුක්ති පෙරමුණට සභිකයන් දෙදෙනෙක් ද එක්සත් ජාතික පක්‍ෂයට එක් සභිකයෙක් ද අයත්ය. මුළු සභික සංඛ්‍යාව විස්සකි.

පාලක ශ‍්‍රී ලංකා පොදුජන පෙරමුණේ සභික, සමන්ත ගමගේ මහතා පැවසුවේ හිටපු ජනාධිපති මහින්ද රාජපක්‍ෂ මහතාගේ ක‍්‍රියාකලාපයට විරෝධය පා තමන් ද මින් ඉදිරියට සභාවේ ස්වාධීන සභිකයෙක් ලෙස කටයුතු කරන බවයි.

සභාපතිධූරය තමන්ට ලබාදෙන්නැයි ඉල්ලා සිටි උප සභාපතිධූරය නියෝජනය කරන රාජපක්‍ෂගේ ඉදුනිල් දර්ශන මහතා පැවසුවේ සභාවේ වැඩ හරියට කෙරෙන්නේද යන්න ගැන වැඩි අවධානයෙන් සිටින බවයි.

සියලූ සභිකයන් සිය ප‍්‍රථම කතාවන් පැවැත්වීමෙන් පසුව සභාපතිවරයාට බලය පැවරීමේ යෝජනාවක් ගෙනාවේය. එහිදී විපක්‍ෂනායක බී.ආරියවංශ මහතා එම යෝජනාවට ඡන්දයක් අවශ්‍ය බව පැවසුවේය. 

ඒ අවස්ථාවේ දී බහුතරය අහිමි නිසා සභාපතිවරයා පැවසුවේ ඒ සම්බන්‍ධයෙන් තම පක්‍ෂ නායකත්වයේ සහ නීතිමය උපදෙස් ලබාගත යුතුව ඇති බවයි. එවිට පාලක ශ‍්‍රී ලංකා පොදුජන පෙරමුණේ සභිකයන් වන පී.ඒ. කුමාරරත්න සහ සුමනපාල රත්නායක යන මහත්වරු සභාව කල්තැබීම සුදුසු බවට යෝජනා ස්ථිර කළේ ය.

ඒ අනුව පෙරවරු 10.30ට ඇරඹූ මංගල සභාව පස්වරු 02.30ට කල් තැබීමට සභාපතිවරයා පියවර ගත්තේ ය.