2023 මාර්තු මස 28 වන අඟහරුවාදා
කොස්ගොඩ තාරක ඇතුළු තිදෙනා රිමාන්ඩ්
(ක්‍රිෂාන් ජීවක ජයරුක්)
මාතර නගරයේ ප්‍රසිද්ධ ස්වර්ණාභරණ ආයතනයක් මංකොල්ල කෑමට පැමිණ පොලිස් සැරයන්වරයකුට වෙඩි තබා ඝාතනය කර තවත් සිව් දෙනෙකුට තුවාල සිදු කළැයි කියන කොස්ගොඩ තාරක ඇතුළු පාතාල කල්ලි සාමාජිකයින් තිදෙනා හඳුනා ගැනීමේ පෙරෙට්ටුවක් සඳහා ලබන 6 වැනිදා තෙක් තවදුරටත් රිමාන්ඩ් බාරයේ තබන ලෙස මාතර වැඩබලන මහේස්ත්‍රාත් හා නීතිඥ තිස්ස දිසානායක මහතා අද (30) නියෝග කළේය.
මෙම නඩුව කැදවන මාතර අතිරේක මහේස්ත්‍රාත් නිල්මිණි කේ.විතාරණ මහත්මිය අද (30) නිවාඩු ගොස් තිබෙන හෙයින් වැඩබලන මහේස්ත්‍රාත්වරයා විසින් එම නියෝගය ලබා දුන්නේය.
ඒ අනුව මෙම සිද්ධියට සම්බන්ධව රිමාන්ඩ් බාරයේ සිටින කොස්ගොඩ තාරක ඇතුළු සැකකරුවන් තිදෙනාම අද (30) බන්ධනාගාර නිලධාරීන් විසින් දැඩි ආරක්ෂක රැකවල් මැද මාතර මහේස්ත්‍රාත් අධිකරණය වෙත කැඳවාගෙන තිබිණි.
කොස්ගොඩ තාරකගේ නායකත්වයෙන් යුත් මෙම පාතාල කල්ලිය ඉකුත් ජුනි මස 22 වැනි දා මාතර නගරයේ ප්‍රසිද්ධ ස්වර්ණාභරණ ආයතනයක් තුළට කඩා වැදී ගිනි අවි පෙන්වා රන් ආභරණ මංකොල්ලකා තිබුණි.
එම අවස්ථාවේදී පොලීසිය සමඟ ඔවුන් වෙඩි හුවමාරුවක් ඇති කරගත් අතර පාතාල කල්ලියේ වෙඩි ප්‍රහාරයෙන් පොලිස් සැරයන් සුරංග ප්‍රදීප් වීරසිංහ මහතා මරුමුවට පත් වී තවත් සැරයන්වරයකු හා කොස්තාපල්වරයකුද සිවිල් වැසියන් දෙදෙනෙකු ද බරපතල තුවාල ලැබීය.
