නිමන්ති රණසිංහ
 
ජාතික කෞතුකාගාරයට අයුතු ලෙස ඇතුළු වී පෞරාණික භාණ්ඩ සොරකම් කරන ලදැයි කියන සිද්ධියේ පළමු සැකකරු වූ ලන්සගේ ප්‍රියන්ත මෙන්ඩිස් නොහොත් ‘කංගැට්ටා’ නොහොත් ‘බලවලූවා’ අත්අඩංගුවට ගෙන අධිකරණයට ඉදිරිපත් කරන ලෙසට දැනුම් දෙමින් කොළඹ ප‍්‍රධාන මහේස්ත‍්‍රාත් රංග දිසානායක මහතා වරෙන්තු නිකුත් කළේය.
 
සිද්ධියට අදාළ නඩුව අධිකරණය හමුවේ යළි කැදවූ අවස්ථාවේදී මෙම සැකකරු සහ අටවැනි සැකකරු (ජේ. ඒ.සේනාධිරගේ එස්ටිනා මිලිනා) අධිකරණය හමුවේ පෙනී නොසිටීම හේතුවෙන් මහේස්ත‍්‍රාත්වරයා එලෙස නියෝග කළේය.
 
ලන්සගේ ප්‍රියන්ත මෙන්ඩිස් නොහොත් ‘කංගැට්ටා’ නොහොත් ‘බලවලූවා’ නැමැති මෙම සැකකරු සිද්ධියට අදාළව වසර පහක් රක්ෂිත භාරයේ පසුවූ අතර, කොළඹ මහාධිකරණයෙන් ලද ඇප නියෝගයක් ප‍්‍රකාරව රුපියල් ලක්ෂ පහක පුද්ගලික බැදුම්කරයකට සහ රුපියල් ලක්ෂ 5 බැගින් වූ ශරීර ඇප දෙකක් මත මුදා හැරීමට මහේස්ත‍්‍රාත් අධිකරණයෙන් නියෝග නිකුත් වී තිබුණේ ඉකුත් 2017 වර්ෂයේ මාර්තු මස (31) වැනිදාය.