(පාලිත ආරියවංශ)

උමාඔය  බහුකාර්ය සංවර්ධන ව්‍යාපෘතියේ උමං මාර්ගය සැදීමේදී හානි සිදුවු නිවාස පිළිබදව තක්සේරු වාර්තා ලබාගැනීමේ ඇති පමාව නිසා වන්දිගෙවීම ප්‍රමාද වී ඇතැයි වාර්තා වේ.

සුළු හානි සිදුවූ නිවාස යළි පදිංචියට සුදුසු දැයි නිර්දේශ කර වාර්තා ලබාදීම  ප්‍රමාද වීම නිසා එම නිවැසියන්ද දුෂ්කර තාවයට පත්ව ඇත.
තක්සේරු නිළධාරින් ප්‍රමාණවත් නොවීම හා ගොඩනැගිලි පර්යේෂණ  නිලධාරින් ප්‍රමාණවත් නොවිම මීට හේතුව බව පැවසේ .
මේ පිළිබදව බණ්ඩාරවෙල ප්‍රාදේශීය ලේකම් නිහාල් ගුණරත්න මහතාගෙන් කළ විමසීමකදී පැවසුවේ ලේකම් කොට්ඨාශයේ නිවාස 2302ක  හානි පිළිබදව මේ වන විට වාර්තා වී ඇති බවයි .

ඉන් තක්සේරු කළ නිවාසවලින් 1300 කට වන්දි ගෙවා ඇති බවත් තවත් නිවාස 61කට වන්දිගෙවීමට ඇති බවත් ඒ මහතා කීවේය.නිවාස  941 ක් සදහා  තක්සේරු වාර්තා ලබාගත යුතුව ඇතැයි ද ඒ මහතා කීය.

බණ්ඩාරවෙල පවතින තත්වය අනුව නිවාස හානි තවමත් සිදුවන බැවින් මේ ප්‍රමාණය තවත් වැඩිවීමට ඉඩ ඇති බවද ඒ මහතා පැවසීය.
මේ පිළිබදව ඌව ප්‍රධාන අමාත්‍ය චාමර සම්පත් දසනායක මහතාගෙන් කළ විමසීමකදී පැවසුවේ මෙම කාරණය තමාගේ සභාපතිත්වයෙන් යුත් බදුල්ල දිස්ත්‍රික් සම්බන්ධීකරණ  කමිටුවටද ඉදිරිපත් වූ බවත් වෙනත් පළාත් වලින් හෝ මෙම නිලධාරින් ගෙන්වාගෙන නිවාස හානි තක්සේරු කඩිනම් කීරීමට  එහිදී තීර්ණය  කළ බවත් ය.