(ඩයනා උදයංගනී)
 
එළඹෙන උත්සව සමයේදී සිය  ගම්බිම් බලා ගමන් ගන්නා මගීන්ගේ පහසුව සදහා අමතර ප‍්‍රවාහන සේවාවන් යොදවා ඇති බව මගී ප‍්‍රවාහන කළමනාකරණ සහ විදුලිබල හා බලශක්ති අමාත්‍යාංශය පවසයි.
 
සියලූම ලං.ග.ම බස් රථ රියදුරන්ගේ හා කොන්දොස්තරවරුන්ගේ නිවාඩු මෙම මස 26 වැනිදා සිට 2020 ජනවාරි 01 දා දක්වා අවලංගු කිරීමට ද පියවර ගෙන තිබේ. 
 
කොළඹ, පිටකොටුවේ සිට දිවයිනේ සෑම ප‍්‍රදේශයකටම බස් රථ 30-100 දක්වා අමතර බස් රථ යෙදවීමට පියවර ගෙන ඇති අතර විශේෂයෙන් හැටන්, බදුල්ල,  නුවරඑළිය, වවුනියාව හා යාපනය දක්වා එම අමතර බස් වාර ගණනාවක් යෙදවීමට පියවර ගෙන ඇතැයි එම අමාත්‍යාංශය පවසයි.
 
අධිවේගී මාර්ගයේ මාකුඹුර, කොට්ටාව, කඩවත, කඩුවෙල, මාතර, ගාල්ල, මීගමුව, පර්යන්ත කරා උපරිම බස් රථ සේවාවක් යෙදවීමට කටයුතු යොදා තිබේ.

කොළඹ කොටුවේ සිට මහනුවර දක්වා මෙම මස 23 දින සිට විශේෂ සුඛෝපභෝගී දුම්රියක් ධාවනය කෙරෙන අතර 24, 27 හා 29 දිනයන්හි දී බදුල්ල සිට කොළම දක්වාත්, කොළඹ සිට බදුල්ල දක්වාත් විශේෂ දුම්රිය සේවා ක‍්‍රියාත්මක කිරීමට මෙන්ම අයහපත් කාලගුණය හේතුවෙන් නායයෑම්  ආදිය නිසා දුම්රිය මාර්ග අවහිර වුවහොත් ඒ සඳහා අමතර බස් යෙදවීමට ද පියවර ගෙන ඇතැයි අමාත්‍යාංශය සහන් කරයි.