(රංජිත් රාජපක්‍ෂ සහ මහින්ද නිශ්ශංක)

පස්කඳු හා ගල් කඩා වැටීම හේතුවෙන් නානුඔය දුම්රිය ස්ථානයට සීමා කර තිබු උඩරට දුම්රිය මාර්ගයේ ගමනාගමන කටයුතු අද (03) යථා තත්ත්වයට පත් කළ බව දුම්රිය පාලක මැදිරිය පවසයි.

ඒ අනුව නානුඔය දුම්රිය ස්ථානයට පමණක් ධාවනය වූ කොළඹ-බදුල්ල දුම්රියන් අද සිට සුපුරුදු පරිදි බදුල්ල දුම්රිය ස්ථානය දක්වාම ධාවනය වේ.

නමුත් දැනුම්දෙන තුරු කොළඹ-බදුල්ල රාත්‍රී තැපැල් දුම්රිය නානුඔයට පමණක් ධාවනය කිරීමට තීරණය කර ඇති බවද දුම්රිය පාලක මැදිරිය පවසයි.

පසුගිය දින කිහිපය තුළ මධ්‍යම කදුකරයට ඇදහැළුණු අධික වර්ෂාව හේතුවෙන් එම මාර්ගයේ ඉදල්ගස්හින්න සහ ඔහිය දුම්රිය ස්ථාන අතර දුම්රිය උමං මාර්ගය අසල විශාල පස් කන්දක් සහ ගල් පර්වත කිහිපයක් කඩා වැටිමෙන්  මාර්ගය අවහිර වී තිබිණි.

අදින් ඇරඹෙන ශ්‍රී පාද වන්දනා වාරය හේතුවෙන් දුම්රියෙන් පැමිණෙන වන්දනාකරුවන් සහ සංචාරකයන් වෙනුවෙන් හැටන් දුම්රිය ස්ථානයේ සිට නල්ලතන්නිය දක්වා විශේෂ බස් රථ සේවාවක් යෙදවීමට හැටන් ලංගම ඩිපෝව කටයුතු කර තිබේ.