(සිරාජ් හසීම්)
 
දෙමළ ජාතික සන්ධානයෙන් ඉවත්ව ගිය ඊ.පී.ආර්.එල්.එෆ් පක්ෂයේ නියෝජිතයින් දෙමළ ජාතික සන්ධානයේ ඉලංගයි තමිල් අරසු කච්චි පක්ෂය හා එක් වෙමින් සිටින බව උතුරේ දේශපාලන  ආරංචි මාර්ග සඳහන් කර සිටියි.

ඉලංගයි තමිල් අරසු කච්චි පක්ෂයේ ජ්‍යෙෂ්ඨ සාමාජිකයින් කිහිප දෙනෙකු විසින් ඊ.පී.ආර්.එල්.එෆ් පක්ෂයේ නියෝජිතයින් තම පක්ෂයට එක්කර ගැනීමේ උත්සහයේ නිරතව සිටින බවද පැවසේ.

සිවශක්ති ආනන්දන් මන්ත්‍රීවරයා සමගින් ඊ.පී.ආර්.එල්.එෆ් පක්ෂය වෙනුවෙන් සඳුදා (20) සාකච්ඡාකට සහභාගී වූ මුලතිව් දිස්ත්‍රික් උතුරු පළාත් සභා මන්ත්‍රී ටී.රවීහරන් මහතා එදින මාවෙයි සේනාධිරාජා මහතාගේ කාර්යාලයට පැමිණ ඉලංගයි තමිල් අරසු කච්චි පක්ෂය හා එක්වී ඇත.

එම සන්ධානයේ ආරංචිමාර්ග තවදුරටත් සදහන් කර සිටින්නේ ඊ.පී.ආර්.එල්.එෆ් පක්ෂය නියෝජනය කරන උතුරු පළාත් සභා මන්ත්‍රීන් දෙදෙනෙකු සහ නැගෙනහිර පළාත් සභා මන්ත්‍රීවරයකු ඉදිරි මැතිවරණයට පෙරාතුව ඉලංගයි තමිල් අරසු කච්චි පක්ෂයට එක්වීමට නියමිත බවයි.

උතුරේ දේශපාලන විචාරකයින්ද පෙන්වා දෙන්නේ දෙමළ ජාතික සන්ධානය අතහැර ගිය ඊ.පී.ආර්.එල්.එෆ් පක්ෂය ගජේන්ද්‍රකුමාර් පොන්නම්බලම් මහතාගේ නායකත්වයෙන් යුතු දෙමළ ජාතික ජනතා පෙරමුණ සමගින් සන්ධාන ගත වුවත් දෙමළ ජාතික සන්ධානයට අභියෝගයක් එල්ල කළ හැකි තරම් ජනතා සහායක් පළාත තුළ ගොඩනඟාගෙන නොමැති බවයි.