(සමන් විජය බංඩාර)

එදා අරණායක සුරපුරයක් කරන බව කී නිවාස ඇමති නැවත අරණායක අවතැන් වූවන් බැලීමට පැමිණ නැතැයි පාර්ලිමේන්තු මන්ත්‍රී නාමල් රාජපක්ෂ මහතා පවසයි.

“එදා නිවාස ඇමැතිවරයා අරණායකට ඇවිත් කිව්වේ සාමසර සුරපුරයක් කරනවා කියලා.නමුත් සුරපුරය බලන්න පුළුවන් මෙහාට ආවාට පස්සේ.එහෙම කියලා ගියපු මගේ ගමේ නිවාස ඇමතිවරයා ආයේ අරණායකට ඇවිත් නැහැ. මෙ වෙනුවෙන් ආණ්ඩුවේ මැදිහත් විමක් නැහැ. සුරපුරයක් කරන්න ආපු අය ජනතාව කුඩාරම්වලට දමලා හිර කරලා තිබෙනවා. “යැයි ඒ මහතා පවසයි.

රාජපක්ෂ මහතා මේ බව පැවසුවේ අරණායක සාමසර විපතින් අවතැන් වුවන් රැඳි සිටින අවතැන් කඳවුරු වෙත ගොස් ඒවාහි ශ‍්‍රමදාන කටයුතුවලට අද (02) සහභාගී වූ අවස්ථාවේදී ය.

“දැන් අරණායක සාමසර කන්ද නාය ගිහින් මාස 13 ක්.පසුගිය මාසයේ අපි ඇවිත් මේ ජනතාව සමග කතා කළා.ඔවුන් අමාරුවෙන් කුඩාරම්වලට වෙලා ඉන්න හැටි අපි දැක්කා.අපි රට හා ලෝකය දැනුම්වත් කළා. නමුත් ආණ්ඩුව කළේ ඒවාට උදව් කළා කියලා නිලධාරින්ගෙන් පළි ගන්න ලැස්ති වීමයි. “

“රටේ තරුණයන් සහ වගකිව යුතු පුරවැසියන් ලෙස වගකිමක් තිබෙනවා අපිට පුළුවන් දේ කිරිමට.එමෙන්ම අපි ආණ්ඩුවට බල කරනවා. කරුණාකරලා ඔය සංදර්ශන , නාට්‍ය, තර්ජන සහ ජනතාව පාගන එක නවත්වලා මේ ජනතාවට සහන දෙන්න කියලා.“යැයි ඒ මහතා ප්‍රකාශ කළේය.

එමෙන්ම වෛද්‍යවරුන් කණ්ඩායමක් මගින් අවතැන් වූවන්ට අවශ්‍ය වෛද්‍ය ප‍්‍රතිකාර සේවයක්ද ක‍්‍රීයාත්මක කෙරිණ.