(කාංචන කුමාර ආරියදාස)
 
මෙවර අයවැය ඒකාබද්ධ විපක්ෂය ශ්‍රී  ලංකා නිදහස් පක්ෂය ඇතුළු සියලු දෙනා ඒකරාශි වී පරාජය කරාවියැයි  යන්න ජනතාවගේ දැඩි විශ්වාසයක් පැවැති බවත් එහෙත් ශ්‍රී ලංකා නිදහස් පක්ෂයේ ඇතැම් මන්ත්‍රීවරු කණ්ඩායමක් ජනතා පැතුම ප්‍රතික්ෂේප කළ බව හිටපු අමාත්‍ය ශ්‍රී ලංකා පොදුජන පෙරමුණේ නායක ජී. එල්. පීරිස් මහතා පැවසීය.
 
සියම් මහා  නිකායෙ අස්ගිරි පාර්ශවයේ මාතලේ දීසාවේ උප ප්‍රධාන සංඝනායක රංගිරි දඹුලු රජමහා විහාර සහ ශ්‍රී විෂ්ණු දේවාලයේ භාරකාර ගම්බා පිරිවෙනෙහි අධ්‍යක්ෂ අඹගස්වැවේ ශ්‍රී රාහුල හිමියන්  (07) දින  බැහැදැකීම සඳහා පැමිණි අවස්ථාවේ මාධ්‍යවේදීන් නැගූ ප්‍රශ්න වලට පිළිතුරු දෙමින් හිටපු අමාත්‍යවරයා මේ බව පැවසීය.
 
හිටපු අමාත්‍ය ජනක බණ්ඩාර තෙන්නකෝන් හිටපු පළාත් සභා අමාත්‍ය ප්‍රමිත බණ්ඩාර තෙන්නකෝන් දඹුල්ල නගරාධිපති ජාලිය ඕපාත යන මහත්වරු ඇතුළු පිරිසක් ද රංගිරි දඹුලු රජ මහා විහාරස්ථානයට පැමිණ මල්  පහන් පූජා කර නායක ස්වාමීන් වහන්සේ බැහැදැක දඹුල්ල ප්‍රදේශයේ ගොවීන්ට බලපා ඇති ගැටලු ප්‍රශ්න පිළිබඳව සාකච්ඡා කළහ.
 
මෙහිදී මාධ්‍ය අමතමින්  ය හිටපු අමාත්‍ය ජී .එල් .පීරිස් මහතා කියා සිටියේ අයවැය පරාජය කිරීම සඳහා තිබුණු හොඳම අවස්ථාව ගිලිහී යෑම සම්බන්ධයෙන් දැඩි කණගාටුවෙන් පවතින බවයි .  එය සිදුකළේ ශ්‍රී  ලංකා නිදහස් පක්ෂයේ ඇතැම් මන්ත්‍රී කණ්ඩායමක් බව කීවේය.
ඡන්දය ප්‍රකාශ කිරීමට පාර්ලිමේන්තුවට නොපැමිණි එම මන්ත්‍රීවරුන් ඊට පෙර අයවැය යෝජනාවට විරුද්ධව දැඩි විවේචන එල්ල කළ බව ද හෙතෙම කියා සිටියේය.
 
මේ රටේ එක්සත් ජාතික පක්ෂ විරෝධී බලවේගයක අවශ්‍යතාවය පවතින බවත් ඉදිරියේදී එවැනි බලවේගයක් ගොඩනැගීම සඳහා සාකච්ඡා වට කිහිපයක් පැවැත්වූ බවත් අප්‍රේල් 10 දින එම සාකච්ඡාව තවදුරටත් ක්‍රියාත්මක වන බවද කියා සිටියේය.
 
වර්තමානයේ පාර්ලිමේන්තුවේ මන්ත්‍රීවරුන් හැසිරෙන ආකාරය සහ වචන ප්‍රකාශ කරන ආකාරය පිළිබඳව බරපතළ ප්‍රශ්න රැසක් මතුව ඇති බවද හිටපු අමාත්‍යවරයා සඳහන් කළේය.
 
එමෙන්ම මේ මස  08 දින වන විට දකුණු පළාත් සභාවේ කාලය අවසන් වන බවත් අප්‍රේල් මස විසි වැනි දින වන  විට බස්නාහිර පළාත් සභාවේ කාලය අවසන් වන බවත් අප්‍රේල් මාසය අවසන් වන විට පළාත් සභා නවයකකින් අටක නිල කාලය අවසන් වී ඇති බවද හෙතෙම සඳහන් කළේය.

 මේ හේතුව නිසා පළාත් සභා කාර්ය භාරයන් සියල්ල අකර්මන්‍ය වී තිබෙන බවද ජී .එල්. පීරිස් මහතා සඳහන් කළේය. දිගටම මැතිවරණ නොපවත්වා මෙයාකාරයෙන් රජය පවත්වාගෙන යෑමට නොහැකි තත්වයක් මතුවන බවද කීවේය.පළාත් සභා ඡන්ද නොපවත්වන්නේ අන්ත පරාජයක් රජය ලබන බව දැනගෙන බවද හෙතෙම කියා සිටියේය.