(දයාරත්න ඇඹෝගම)

අනතුරක් හේතුවෙන් වම් පාදය අහිමිවු පුද්ගලයෙකුට මොළය මියගිය රෝගියෙකුගේ වම් පාදය සාර්ථකව බද්ධ කිරිමට අනුරාධපුර ශික්ෂණ රෝහලේ වෛද්‍යවරු සමත්වූ බව අද(26) රෝහලේ පැවති මාධ්‍ය හමුවකදි වෛද්‍යවරු පැවසුහ.

ලංකාවේ වෛද්‍ය ඉතිහාසයේ දී තවත් පුද්ගලයකුගේ පාදයක් වෙනත් රෝගියෙකුට බද්ධ කළ ප‍්‍රථම අවස්ථාව  මෙය බව ද වෛද්‍යවරු කියති.

මිට පෙර මෙවන් සැත්කම් සිදුකර ඇත්තේ කැනඩාව ස්පාඤ්ඤය සහ තුර්කිය යන රටවල පමණි.

ඒ අනුව ලංකාව මෙවන් සැත්කමක් සිදුකළ ලෝකයේ රටවල් අතරින් සිවුවැනි ස්ථානය ගන්නා අතර ලෝකයේ මේ අකාරයෙන් සිදුකළ පස්වන සැත්කම මෙය බවද වෛද්‍යවරු පැවසුහ. රෝගියාට බද්ධ කිරීම සඳහා මෙම පාදය ලබාගෙන ඇත්තේ කැබිතිගොල්ලැව ප‍්‍රදේශයේ පදිංචිව සිටි 52 දෙහැවිරිදි මොළේ මියගිය පුද්ගලයෙකු ගෙනි. ඔහුගේ වකුගඩු දෙකද ලබාගත් වෛද්‍යවරු ඒවා නුවර ප‍්‍රදේශයේ පුද්ගලයන් දෙදෙනකුට බද්ධ කොට ඇත.

සැත්කම සදහා පැය 11කට අධික කාලයක් ගතව තිබිණි.