(ලහිරු හර්ෂණ)

 ‘බුදුන්වහන්සේ දේශනා කර  ඇති පරිදි  අනුශාසනාවක් කළ යුත්තේ  තේරුම් ගැනීමට ප්‍රඥාවක්  ඇති මිනිස්සුන්ට බවත්, අනු නා හිමිගේ අනුශාසනාවේ තිබු  කරුණු මැනවින් තමා  අවබෝධ කරගත් බවත් එය නොතේරුම් ගත් පිරිසක් විසින් විවිධ ප්‍රකාශ කරන බවත් හිටපු ආරක්ෂක ලේකම් ගෝඨාභය රාජපක්ෂ මහතා පැවසීය.


තමන් ඉතා සාමාන්‍ය පුද්ගලයකු වන බවත් තමන්ගේ නිවසේ පැවැති  පිංකමකදී පෞද්ගලික පැවසු දේ පිළිබඳව දේශපාලනඥයින් ඇතුළු විවිධ පිරිස් විවිධ කතා මතු කරනුයේ අනු නා හිමට විරුද්ධව නම් එය ඉතාමත් නුසුදු ක්‍රියාවක් බවත් හෙතෙම ප්‍රකාශ කළේය.


ඩී.ඒ.රාජපක්ෂ කෞතුකාගාරය ඉදිකිරීමේදී  සිදු බව කියන මුල්‍ය අක්‍රමිකතාවක් සම්බන්ධයෙන් සාක්කි ලබා දීම සඳහා අද (25)  මුල්‍ය අපරාධ විමර්ශන කොට්ඨාසයට පැමිණ පිටව යද්දී  අස්ගිරි අනුනායක වෙඬරුවේ උපාලි හිමියෝ  පසුගිය දිනක කළ ප්‍රකාශය සම්බන්ධයෙන් රටේ මතු වී ඇති තත්ත්වය පිළිබඳව මාධ්‍යවේදීන් විමසු ප්‍රශ්නවලට පිළිතුරු දෙමින් ගෝඨාභය රාජපක්ෂ මහතා ඒ බව සඳහන් කළේය.


ඉදිරියේදී ජනාධිපති අපේක්ෂකයකු ලෙස ඉදිරිපත් වනවාද යන්න සම්බන්ධව හා ද්විත්ව පුරවැසිභාවය පිළිබඳව මාධ්‍යවේදී කළ විමසීමේදී හෙතෙම සඳහන් කළේ ඒ සම්බන්ධව හිටපු ජනාධිපති මහින්ද රාජපක්ෂ මහතා මේ වන තුරු තමන්ට දැනුම් දී නොමැති බවත් අවස්ථාවක් ලැබුණොත් ඒ පිළිබඳව සලකා බලන බවත්ය. එසේම පුරවැසිභාවය පිළිබඳව ගැටළුව විසඳා ගැනීමට  මාස දෙකක කාලයක් ප්‍රමාණවත් බවද පැවසීය.


අනු නාහිමියන්ගේ ප්‍රකාශය සම්බන්ධයෙන් වැඩිදුර අදහස් දැක්වු රාජපක්ෂ මහතා මෙසේද පැවසීය.


‘මෙවැනි ප්‍රකාශ නිකුත් කරන්නේ ඇයි කියලා දෙන්නේ නැහැ.අනු නාහිමි එවැනි ප්‍රකාශක් කළේ ඇයි කියන දේ සම්බන්ධයෙන් පැහැදිලි කිරීමක් කළා. අනික මේක පෞද්ගලික අනුශාසනාවකදී කරපු කතාවක්. ජනාධිපති අගමැති ඇතුළු දේශපාලනඥයින් ඒ පිළිබඳව ප්‍රකාශ නිකුත් කරන්නේ මා ඒ තරම් වැදගත් පුද්ගලයෙක්ද කියලා මං දන්නේ නෑ. මොකද මම සාමාන්‍ය පුද්ගලයෙක්.ඔවුන් මෙවැනි ප්‍රකාශ කරන්නේ සමහර විට අනු නා හිමිට විරුද්ධව කරන ප්‍රකාශ වෙන්නැති.මම හිතන්නේ නැහැ ඒක සුදුසුයි කියලා‘