(දයාරත්න ඇඹෝගම)

අන්තර් විශ්ව විද්‍යාලිය ශිෂ්‍ය බලමණ්ඩලයේ සිසු සිසුවියන් පිරිසට එල්ල කළ ප‍්‍රහාරයට ඝෘජුවම සම්බන්ධ බව කියන එජාප අනුරාධපුර දිස්ත‍්‍රික් පාර්ලිමේන්තු මන්ත‍්‍රි චන්දිම ගමගේ මහතා ඇතුළු පිරිස අත් අඩංගුවට නොගන්නේනම් එළබෙන සඳුදා කැකිරාවේ පිහිටි මන්ත‍්‍රිවරයාගේ නිවස ඉදිරිපිට දැවැන්ත උද්ඝෝෂණයක් සිදුකරන බව ලංකා ගුරු සංගමයේ සභාපති ප‍්‍රියන්ත ප‍්‍රනාන්දු මහතා අනුරාධපුරයේදි පැවසිය.

මාළබේ සයිටම් ආයතනය සම්බන්ධයෙන් කැකිරාව නගරයේ සිසුන් දැණුම්වත් කිරිම සදහා අත්පත‍්‍රීකා බෙදමින් සිටි අන්තර් ශිෂ්‍ය බල මණ්ඩලයේ සිසු සිසුවියන් පිරිසකට කැකිරාව නගරයේදි පහර දිම සම්බන්ධයෙන් අනුරාධපුර නගරයේදි පැවති මාධ්‍ය සාකච්ජාවකදි ප‍්‍රියන්ත ප‍්‍රනාන්දු මහතා අද (20) මේ බව පැවසිය.

අද (20) දින කැකිරාව නගරයේදි මැරයන් සිවු දෙනෙකු යතුරු පැදි දෙකකින් පැමිණ මෙම ප‍්‍රහාරය සිදුකර ඇති බව ප‍්‍රියන්ත ප‍්‍රනාන්දු මහතා පැවසිය.

මෙහිදි සිසුවියන් පස් දෙනෙකු සහ සිසුන් දෙදෙනකු තුවාල ලබා කැකිරාව රෝහලට ඇතුලත් කර තිබුණි.

 “සිද්ධිය වන අවස්ථාවේ කැකිරාව ප‍්‍රාදේශිය සභාවේ හිටපු මන්ත‍්‍රිවරයෙකු වන අශෝක ගුණසිංහ යන අයගේ කැබ් රථයත් තිබුණා. ඔහු චන්දිම ගමගේ මහතාගේ ගෝලයෙක්.මෙම පහරදිම පසුපස චන්දිම ගමගෙ මහතා සිටිනවා.එම නිසා අපි බලකර සිටිනවා මන්ත‍්‍රිවරයා ඇතුළු මෙම මැර පිරිස වහාම අත්අඩංගුවට ගෙන අධිකරණයට ඉදිරිපත් කරන්න කියලා.අපි සියලූ විස්තර වාහන අංක සියල්ල කැකිරාව පොලිසියට ලබාදි තිබෙනවා.“යැයි ඒ මහතා පැවසීය.