(සනත් ගමගේ / චන්ද්‍රසේන ගමගේ)

තංගල්ලෙන් පසුගිය 7වැනිදා උදේ පිටත් වී  අධිවේගී මාර්ගයෙන්  කොළඹ දක්වා ධාවනය කිරීමට ගිය ලංගම බස් රථයේ  රියදුරු බිමතින් සිටි බව කියා ගන්දර දී පොලිසිය මගින් රියදුරු අත්අඩංගුවට ගැනීමෙන් පසු එහි සිටි තමන් අතරමංවූ බව මගීහු පවසති.
රියදුරු මත්පැන් පානය කර ඇති බව පවසා බස් රථයට ගොඩවූ පොලිස් නිලධාරියෙක් බස් රථය පොලිසියට රැගෙන යෑමට එය පණ ගන්වන විට මගීන් කලබලයට පත්වී ඇති අතර  මහරගම පිළිකා රෝහලට රෝගීන් බැලීම සඳහා යන මගීන් ඇතුළු විවිධ අත්‍යවශ්‍ය රාජකාරී සඳහා යන පිරිස් එහිදී අපහසුතාවයට පත්වූ බව කියති.
පොලිස් නිලධාරීන් මගීන්ගේ විරෝධය නොතකා මගීන්ට බැන වදිමින් බස් රථය පොලිසියට ගෙන යෑමට උත්සාහ දැරූ බවත් පසුව අතරමංව සිටි මගීන්ට මුදල් ගෙවා වෙනත් බස්වලින් පිටත් කෙරුණු බව වාර්තා වේ.
මත්පැන් පානය කර ඇතැයි කියන රියදුරුට එරෙහිව  නීතිය ක්‍රියාත්මක කිරීම ගැන මගීහු පොලිසියට සිය ප්‍රසාදය ද පළ කළ නමුත් ඒ සම්ම්බන්ධව පොලිසිය දැක් වූ අකාරුණික භාවය ගැන මගිහු පොලිසියට චෝදනා කළහ.
මේ සම්බන්ධයෙන් ගන්දර පොලිස් ස්ථානාධිපතිවරයාගෙන්  විමසීමේ දී ඔහු කියා සිටියේ බස් රථයේ රියදුරු වෛද්‍යවරයා වෙත ඉදිරිපත් කිරීමෙන් පසු බීමතින් සිටි බව අනාවරණය වී ඇති අතර ඔහු අධිකරණයට ඉදිරිපත් කිරීමෙන් පසු ඇප ලැබී ඇති බවයි.
මගී ජනතාවට සිදු වී ඇතැයි කියන අපහසුතාවය සම්බන්ධයෙන් පොලිස් නිලධාරීන්ගෙන් වරදක් සිදුවී ඇත්දැයි සොයා බලන බවත් ඔහු කීය. 
අධිවේගී බස් රථය අයත් රත්මලාන ඩිපෝවේ අධිවේගී මාර්ග ඒකකයේ කළමනාකරු විජිත ජයසුන්දර මහතාගෙන් කළ විමසීමකදී ඔහු කියා සිටියේ රියදුරු ඊට පෙර දින රාත්‍රි මළ ගෙදරකට සහභාගී වී මත් පැන් පැන් පානය කර ඇති බවත් එසේ නොමැතිව උදෑසන මත්පැන් පානය කර බස් රථය ධාවනය නොකළ බවත් ය.