තුරඟ සරින් ඉගිලී යන රෝද හතරේ වාහනය තුළ ගමනේ වෙහෙස නිවාගන්නට අපූරු ගිමන්හලක් එක් තැනකදී හමුවෙයි. ඔරුවක අයුරු ගත් කැනොවින් ආර්කේඞ් නම් මෙම සාප්පු සංකීර්ණය හා අවන්හල හමුවෙන ඒ තැන ඔබට කියන්නට අපට සිත්වුණේ කියන්නට සිත්වෙන තරම් අලූත් අලූත් දෑ ඔරුවක රුවින් දිස්වෙන කැනොවින් ගිමන්හල සන්තකව පවත්නා හෙයිනි. දක්‍ෂිණ අධිවේගී මාර්ගයේ වැලිපැන්න පිවිසුම ආසන්නයේ ගමනක වෙහෙසකර බව නිවාලන මේ ගිමන්හල ඉදිව තිබේ. දක්‍ෂිණ අධිවේගී මාර්ගයේ ගමන් කරන්නන්ට ඒ සඳහා පැයක පමණ කාලයක් ගතවෙයි. ඒ පැයක ගමනේදී අතරමග මොහොතක් නතරවී ගිමන් හරින්නට ඔබට සිදුවුවහොත් නොඑසේනම් කුමක් හෝ රසවත් ආහාරයකින් සප්පායම් වී අලූතින් ඇඳුමක් ආයිත්තමක් මිලට ගන්නට සිතුණොත් වාහනයට නැවත ඉන්ධන ගසා ගැනීමේ අවශ්‍යතාවක් වැනි කී නොකී බොහෝ අවශ්‍යතා සපුරන එකම සෙවණක් ලෙස කැනොවින් ගිමන්හල හඳුන්වාදීම එයට ඉටුකරන සාධාරණයකි. සුපිරි වෙළෙඳ සංකීර්ණ දෙකක්, ගිහාන්ස් අවන්හලත්, ලක්සල, ඩයිනමෝ අවන්හලත්, ගිල්ස් කැෆේ, ඉටලියන් කැෆේ, ඉරොසියා ටී. සයිබර් කැෆේ, පුංචි පැටවුනට දුව පැන සෙල්ලම් කරන්නට ඉසව්වක් මෙන්ම ගත සිත වෙහෙස මඟහැර ගන්නට විවේකී කඩඉම්ද මේ නව නවාතැනේ අන්තර්ගතය. කැනොවින් ගිමන්හල වෙත කාටත් පහසුවෙන් ළඟාවිය හැක්කේ වැලිපැන්න පිවිසුම ආසන්නයේදී වෙනම මංතීරුවකින් ඇතුළුවී වෙනම මංතීරුවකින් යළි අධීවේගී මාර්ගයටම සම්බන්ධ විය හැකි ආකාරයට මංතීරු හයක් සම්බන්ධ කරමින් මෙම ගිමන්හල පිහිටුවා තිබීම නිසාය. එදා අතීතයේ දවසකදී කාගේ හෝ වේවා ගමනක වෙහෙස නිවාලන සිතුවිල්ලෙන් මහ මග තැනින් තැන පිංතාලි තබා තිබුණේය. ඒ දිය පොදකින් පවස නිවන පරමාර්ථයෙනි. පිංතාලිය සේම අම්බලම්ද එදා මහ මග තැනින් තැන ඉදිවුනේ මහන්සියට ඔසුවක් ලෙසිනි. ඒ අම්බලම සංකල්පයද කැනොවින් ගිමන්හල ව්‍යාපෘතියේදී පදනමක් කරගත් බව පැවසුයේ එම ව්‍යාපෘතියේ කළමනාකාර අධ්‍යක්‍ෂ ප‍්‍රියන්ත ප‍්‍රනාන්දු මහතාය. දක්‍ෂිණ අධිවේගී මාර්ගයේ ගමනේ යෙදෙන ඔබට මෙම නවමු අත්දැකීම අසිරිමත් ලෙස විඳගන්නට බලකරන දසුනක් වෙයි. ඒ නිලට නිලේ පෙනෙන තණ බිම්ය. අනාගතයේදී සංචාරකයින්ගේ ප‍්‍රිය නවාතැනක් බවට කැනොවිල් ගිමන්හල පත්වෙන බවට එය නිහඬ මුවින් පවසන එක් සාක්‍ෂියක් වැන්න. ශ්‍රී ලංකා රක්‍ෂණ සංස්ථාව මූල්‍ය අනුග‍්‍රහය දැක්වූ ප‍්‍රිප(ර්) ඇසෝෂියේට්ස් සමාගම නිර්මාණ දායකත්වය දැක්වූ මේ අපූරු ව්‍යාපෘතියේ නිමැවුම පසුපස එහි කළමනාකාර අධ්‍යක්‍ෂවරයාගේ මෙන්ම ෆටීමා පටෙල්, රසිනි බාලසූරිය, යසාසි හෙට්ටිආරච්චි සහ ෂරින් හුසේන් යන තරුණ නිමැයුම්කරුවන්ගේ නිර්මාණාත්මක පරිකල්පනයේ සාරයද රැඳීතිබේ. අනාගත අධීවේගී මාර්ග සඳහාද මේ සොඳුරු සංකල්පය ව්‍යාප්ත කිරීම මේ නිර්මාණවේදීන්ගේ එක් අභිලාෂයකි. ආසියානු නිර්මාණ රටාවට නෑකම් කියමින් ලාංකික නිර්මාණ කලාවේ අනන්‍යතාවද සුරැකිමින් හරිත තාක්‍ෂණය යොදාගත් මෙම ඉදිකිරීම ඇමෙරිකාවේ හරිත ඉදිකිරීම් මණ්ඩලයේ රන් සහතිකයෙන්ද සහතික කර ඇත. අවම පිරිවැයක් දරමින් යාන්ත‍්‍රික ඉදිකිරීම්වලටත් වඩා මිනිස් ශ‍්‍රමයට මුල් තැනක් දෙමින් පරිසර හිතකාමී ලෙස මෙම ගිමන්හල ඉදිකර ඇත. අවම විදුලි පරිභෝජන රටාවක් කෙරෙහි අවධානය යොමුකරමින් හරිත තාක්‍ෂණයට අනුකූලවූ වායු සමීකරණ පද්ධතියක් සහිත කැනොවින් ගිමන්හල ව්‍යාපෘතියේදී ජලය ගැලූම් ලක්‍ෂ 3 ක් නැවත නැවත පාවිච්චියට ගෙන ඇත. එමෙන්ම ඉදිකිරීම් ක්‍ෂේත‍්‍රයේදී ප‍්‍රතිචක‍්‍රීය කරන ලද ද්‍රව්‍ය යොදාගෙන ඇත. වැසි වතුරින් ගත හැකි ප‍්‍රයෝජනය උපරිම ලෙස ලබා ඇත. දුෂිත ජල මාර්ගවල වූ ජලය පිරිපහදුවට ලක් කර භාවිතයට ගෙන ඇත. තවද උණුසුම අවම කර ගැනීම සඳහා වීදුරු අඩු ප‍්‍රමාණයක් භාවිත කර තිබේ. මේ සියලූ ක‍්‍රියාදාමයේ ප‍්‍රතිඵලයක් ලෙස වාර්ෂිකව මිලියන 9.9ක බලශක්තියක් ඉතිරි කරගන්නට මෙම ව්‍යාපෘතිය සමඟ අත්වැල් බැඳගත් පිරිසට හැකිව තිබේ. සමාජය හා මිනිසුන් පන්ති අනුව බෙදී සිටියත් මේ අපූරු ගිමන්හල තුළ කිසිදු පන්ති භේදයක් නැත. පැමිණෙන මිනිසා සමාජය තුළ නියෝජනය කරන්නේ කවර සමාජ පසුතලයක් වේවා මේ බිමට පැමිණි පසු විඳින්නට ඇති සියලූ දේ තුළ ඔවුහු සමානයෝ වෙති. එයද මෙම නිර්මාණකරුවන් මෙම නිර්මාණ කාර්යයේදී පූර්වාදර්ශ කරගත් එක් මානුෂීය රීතියකි. ”දැන් ඔබ සියලූදෙනා අපගේය” වැනි සෙනෙහසකින් කැනොවින් ගිමන්හලට පැමිණෙන සියලූදෙනා පිළිගන්නේ එලෙසිනි. එමනිසාම සමානාත්මතාවේ පදනම මත ඉදිවූ ගිමන්හලේ මොහොතක් නවතින්නට දෙගිඩියාවකින් තොරව ඔබ කාටවුවත් එහි යා හැකිය. කෝටි 2100ක පමණ වියදමකින් ඉදිකළ මෙම ගිමන්හල දැන් ඔබ වෙනුවෙන් විවෘතය. ”ඔබ එන්න - ඇවිත් යන්න එන්න” ඒ දක්‍ෂිණ අධිවේගී මාර්ගයේ ගමනේ යෙදෙන ඔබට ”කැනොවින් ආර්කේඞ්” කරන ආදරණීය ඇරියුමයි.

සටහන - සංජීවිකා සමරතුංග