ජනතා විමුක්ති පෙරමුණ නායකත්වය දෙන ජාතික ජන බලවේගයේ එක් ප්‍රධානම ශක්තියක් වන්නේ එහි අසමසම සංවිධානාත්මක හැකියාවය. අනුර කුමාර දිසානායක පසුගිය වසරේදී ජනාධිපති ධුරයට ගෙන ඒමට මෙම කුසලතා පුළුල් ලෙස උපකාරී වූ අතර, එම කාලය තුළ පක්ෂය බලයට ගෙන යනු ලැබුවේ පහළම තත්වයක සිටය.

ඇත්ත වශයෙන්ම, මෙම පුවත්පතේ මාධ්‍යවේදීන් මැතිවරණය වාර්තා කරන විට, ජාතික ජන බලවේගය එහි බිම් මට්ටමේදී තරගයේ ඉදිරියෙන්ම සිටින බව පැහැදිලි විය. ජනාධිපතිවරණ දිනය ප්‍රකාශයට පත් කිරීමට මාස කිහිපයකට පෙර ගම් මට්ටමින් සංවිධානය වූ ආකාරය පක්ෂ සාමාජිකයෝ අපට පැවසූහ. මැතිවරණ ව්‍යාපාරය අතරතුර, පක්ෂ සාමාජිකයෝ කිහිප වතාවක්ම එකම ප්‍රදේශයේ ගෙයින් ගෙට ගොස් මැතිවරණ ප්‍රචාරණ කටයුතුවල නිරත වූහ. එසේ කළේ ඔවුන් කලින් ගිය විට නිවාසවල නොසිටි පදිංචිකරුවන් සමග කතා කිරීමට ඔවුන්ට හැකි වන නිසාය. මෙම ක්‍රමය මගින්, ඔවුහු සෑම නිවසක්ම ආවරණය කිරීමට වග බලා ගත්හ. මාධ්‍ය ආවරණය ආකර්ෂණය කරගත් වර්ණවත් මහජන රැලි හැරුණු විට, එය පැරැණි තාලයේ ප්‍රචාරක ව්‍යාපාරයක් වුවත්, කලාත්මක සහ පරිපූර්ණ එකක් විය.

මෙම සංවිධානාත්මක හැකියාවේ තවත් පැතිකඩක් වූයේ පක්ෂයේ සන්නිවේදන උපාය මාර්ගය වන අතර, එය අනෙක් ඒවාට වඩා බොහෝ ඉදිරියෙන් සිටියේය. විශේෂයෙන් සමාජ මාධ්‍ය, එහි ආඛ්‍යානය ඉදිරියට ගෙන යාම සඳහා දක්ෂ ලෙස භාවිත කරනු ලැබුණි. විවිධ කාරණා සම්බන්ධයෙන් පක්ෂ නායකත්වයෙන් ලැබුණු නිල ප්‍රකාශ ද බොහෝ දුරට වේගවත්, පැහැදිලි සහ කාරණයට එකඟ ඒවා විය. සෑම කෙනකුම එකම පිටුවක සිටින බව පෙනෙන්නට තිබුණි.

ජාතික ජන බලවේගය බලයට පත්වීමෙන් පසු, විශේෂයෙන් නොවැම්බර් මාසයේ පාර්ලිමේන්තු මැතිවරණයෙන් ලැබූ විශිෂ්ට ජයග්‍රහණයෙන් පසුව දක්නට ලැබුණු අවුල් සහගත තත්වය සමග මෙය සංසන්දනය කරන්න. එක් වැරැද්දක් තවත් එකක් පසුපස ගොස් ඇති අතර, පක්ෂය නිරන්තරයෙන් ගැඹුරු වන වළකට ඇද දැමෙමින් තිබෙයි. ඇත්ත වශයෙන්ම, දැන් බලයේ සිටින ජාතික ජන බලවේගය සඳහා ඇති ප්‍රධාන ගැලවීමේ කරුණාව වන්නේ, විපක්ෂයේ වැඩි කොටසක් ඊටත් වඩා අවුල් සහගත තත්වයකට ඇද වැටී තිබීමයි.

රණවිරු සැමරුම පිළිබඳ මතභේදය

රජයේ සන්නිවේදන උපායමාර්ගය කෙතරම් අකාර්යක්ෂම වී ඇත්දැයි පෙන්නුම් කළ නවතම මතභේදය ඇති වූයේ එල්ටීටීඊයට එරෙහි 30 වසරක යුද්ධයේදී අවසාන පරිත්‍යාගය කළ සන්නද්ධ හමුදා නිලධාරීන්ට ගෞරව කිරීම සඳහා පසුගිය සතියේදී පැවති ජාතික උත්සවය අතරතුර ය. මියගිය අයට ගෞරව කිරීම සඳහා තේජාන්විත හා ගෞරවනීය උත්සවයක් විය යුතුව තිබූ දෙය, රජය විසින්ම නිර්මාණය කරන ලද මතභේදයකින් යටපත් විය. ඒ සියල්ල ආරම්භ වූයේ පසුගිය සඳුදා (19 වැනිදා) පැවැත්වීමට නියමිත “16 වැනි ජාතික රණවිරු සැමරුම් උත්සවය” සඳහා වන සූදානම පැහැදිලි කිරීම සඳහා මැයි 16 වැනිදා ආරක්ෂක අමාත්‍යාංශය විසින් කැඳවන ලද ප්‍රවෘත්ති සාකච්ඡාවකදී ය. මාධ්‍ය හමුව අමතමින් රණවිරු සේවා අධිකාරියේ සභාපති බි්‍රගේඩියර් (විශ්‍රාමික) සෙනරත් කොහොන පැවසුවේ ජනාධිපතිවරයා නියෝජනය කරමින් නියෝජ්‍ය ආරක්ෂක අමාත්‍ය මේජර් ජෙනරාල් (විශ්‍රාමික) අරුණ ජයසේකරගේ ප්‍රධානත්වයෙන් බත්තරමුල්ලේ පිහිටි ජාතික රණවිරු ස්මාරකයේදී අනුස්මරණ උත්සවය පැවැත්වෙන බවයි. ඒ අනුව මාධ්‍ය වාර්තා කළේ ජනාධිපතිවරයාගේ නියෝජිතයා ලෙස ආරක්ෂක නියෝජ්‍ය අමාත්‍යවරයා උත්සවයේ මුලසුන හොබවන බවය. ආරක්ෂක අමාත්‍යාංශයේ වෙබ් අඩවියේ ඇති මාධ්‍ය හමුවෙහි නිල ප්‍රකාශයෙන් ද තහවුරු වූයේ උත්සවය “19 වැනිදා සවස 4.00 සිට සවස 6.00 දක්වා ජනාධිපතිවරයා නියෝජනය කරමින් නියෝජ්‍ය ආරක්ෂක අමාත්‍ය මේජර් ජෙනරාල් අරුණ ජයසේකර (විශ්‍රාමික) මහතාගේ ප්‍රධානත්වයෙන් උත්සවය පැවැත්වෙන” බවය. උත්සවය සඳහා වූ ආරාධනා පත්‍රයේ ද සඳහන් වූයේ එයය. ස්වාභාවික උපකල්පනය වූයේ ආරක්ෂක අමාත්‍ය සහ රටේ සන්නද්ධ හමුදාවල සේනාධිනායකයා වන ජනාධිපතිවරයා මෙම උත්සවයට සහභාගී නොවන බවය.

මෙම පුවත කැළඹීමක් ඇති කළ අතර, විපක්ෂ දේශපාලනඥයන් සහ විශ්‍රාමික සන්නද්ධ හමුදා ජ්‍යෙෂ්ඨ නිලධාරීන් පවා චෝදනා කළේ මව්බිම ආරක්ෂා කිරීම සඳහා අවසාන පරිත්‍යාගය කළ නිල ඇඳුම් ඇඳගත් පිරිමින් සහ කාන්තාවන්ගේ මතකයට ජනාධිපතිවරයා අගෞරව කරන බවය. රජයට සහ එහි සන්නද්ධ හමුදාවන්ට එරෙහිව සන්නද්ධ කැරලි දෙකකට නායකත්වය දුන් ජනතා විමුක්ති පෙරමුණේ 60 වැනි සංවත්සරයට ජනාධිපතිවරයා සතියකට පෙර සහභාගී වූ බව ද සමහරු පෙන්වා දුන්හ. සමාජ මාධ්‍ය හරහා රජයට ලැබුණු ප්‍රතිචාරය ඊටත් වඩා විවේචනාත්මක විය. මහජනතාව, ජනාධිපති දිසානායකට ආයාචනා කරමින් පැවැසුවේ තම තීරණය ආපසු හරවා උත්සවයට සහභාගී වන ලෙසය. ඉරිදා (18) පසුදින පැවැත්වීමට නියමිතව තිබූ සැමරුම් උත්සවය සඳහා පෙරහුරු අතරතුර මාධ්‍ය අමතමින් රණවිරු සේවා අධිකාරියේ සභාපතිවරයා මාධ්‍යවේදීන්ට පැවසුවේ උත්සවයේ ප්‍රධාන ආරාධිත අමුත්තා ලෙස ජනාධිපති දිසානායක සහභාගී වන බවය.

මහජන විවේචන හමුවේ ජනාධිපතිවරයා ගත් තීරණයට පුළුල් පිළිගැනීමක් ලැබුණද, රජය ප්‍රමාදවී උත්සවයට සහභාගී වීමට අදහස් කළ බව පවසමින් තවදුරටත් මඩ ප්‍රහාර එල්ල විය. ජනප්‍රිය රූපවාහිනී වැඩසටහනක් අතරතුර මතභේදය ගැන විමසූ විට, විදේශ අමාත්‍ය විජිත හේරත් ඒ සියල්ල “වැරැදි සන්නිවේදනයක” ප්‍රතිඵලයක් ලෙස හැඳින්වීය. කෙසේ වෙතත්, එම පැහැදිලි කිරීම බරපතළ ප්‍රශ්න කිහිපයක් මතු කරයි. මියගිය හමුදා නිලධාරීන්ට සහ නිලධාරිනියන්ට ගෞරව කිරීම සඳහා ජනාධිපතිවරයා සහ සන්නද්ධ හමුදා සේනාධිනායකයා උත්සවයේ මුලසුන හොබවන බව නිසි ලෙස පැහැදිලි කිරීමට පවා නොහැකි තරමට රජයේ සන්නිවේදන යන්ත්‍රෝපකරණ දුර්වල වී ඇතිද? මෙම ඊනියා “‍වැරැදි සන්නිවේදනය” නිවැරැදි කිරීමට සහ ජනාධිපතිවරයා සැබවින්ම සහභාගී වන බව පැවසීමට රජය දිනකට වඩා බලා සිටියේ ඇයි? ජනාධිපති ධුරය පිළිබඳ වර්ධන සන්නිවේදනය කිරීමේ වගකීම පැවරී ඇති නිල දෙපාර්තමේන්තුව වන ජනාධිපති මාධ්‍ය අංශය ගැන කුමක් කිව හැකිද? මාධ්‍යවල පළවන අසත්‍ය හෝ නොමග යවන සුලු ප්‍රවෘත්ති සම්බන්ධයෙන් ජනාධිපති මාධ්‍ය අංශය ක්ෂණික “නිවැරැදි කිරීම්” එවනු ලබයි, එහෙත් අනුස්මරණ උත්සවයට සහභාගී වීමට ජනාධිපති දිසානායක දක්වන අකමැත්ත ප්‍රධාන ධාරාවේ සහ සමාජ මාධ්‍යවල දැඩි ලෙස විවේචනයට ලක් වුවද, ඔවුන් ඒ පිළිබඳව වචනයක්වත් ප්‍රකාශ කළේ නැත.

ජනාධිපතිවරයා “යුද්ධයේ ඛේදවාචකය” කතා කිරීමෙන් තවත් මතභේද

ජනාධිපති දිසානායක සඳුදා පැවති අනුස්මරණ උත්සවයට සහභාගී වූ විට, යුද්ධයේ ඛේදවාචකය පිළිබඳව චතුර ලෙස කතා කළ අතර, තම ජීවිත පරිත්‍යාග කළ අයට රට විසින් ලබා දිය හැකි ඉහළම යුක්තිය වන්නේ “මෙම ජාතිය තුළ කල් පවත්නා සාමයක්” ඇති කිරීම බව අවධාරණය කළේය. ජනාධිපතිවරයාගේ කතාවේ උපුටාගත් කොටස් පහත දැක්වේ’’.

“මෙම සැමරුම යුද්ධයේ අවසානය සිහිපත් කිරීමක් පමණක් නොව, බෙදීම් නැවත ඇතිවීමට ඉඩ නොදී සහෝදරත්වයෙන් හා සමගියෙන් මුල් බැසගත් ජාතියක් ගොඩනැගීම සඳහා සිංහල, දෙමළ, මුස්ලිම්, බර්ගර් සහ මැලේ යන සියලු‍ ප්‍රජාවන් එක්සත් කිරීමට පොරොන්දුවක් ද වෙනවා”.

“යුද්ධය ඛේදවාචකයක්. මෙම අතිමහත් දුක විඳදරාගත් ජාතියක් ලෙස, එවැනි ගැටුමක් නැවත ඇති නොවන බව සහතික කිරීම අපගේ යුතුකමයි. සැකය, කෝපය සහ වෛරය සහෝදරත්වයෙන් හා ප්‍රේමයෙන් ප්‍රතිස්ථාපනය කරමින් සාමය, එකමුතුකම සහ අනුකම්පාව මගින් සංලක්ෂිත සමාජයක් ගොඩනැගීමට අප උත්සාහ කළ යුතුය.

“දකුණේ පමණක් නොව, උතුරේ ද ජනතාව තම ස්වාමිපුරුෂයන්ගේ සහ දරුවන්ගේ ඡායාරූප ඔසවාගෙන වීදිවලට විත් ඔවුන්ගේ මරණ ගැන ශෝක වෙනවා. සෑම මවුපියකුටම තම දරුවා වටිනවා. එබැවින්, මෙතරම් දැවැන්ත ඛේදවාචකයකට මුහුණ දුන් රටක් ලෙස, අද අපගේ වගකීම වන්නේ අපේ රටේ එවැනි යුද්ධයක් නැවත ඇතිවීම වැළැක්වීමයි.

“මෙම ස්මාරකය අපට මතක් කර දෙන්නේ සැබෑ ගෞරවය ඇත්තේ එකමුතුකම ගොඩනැගීම තුළ බවයි. නැවත කිසිදා බෙදීමට ඉඩ නොදෙන බවට අපි දිවුරමු. ඒ වෙනුවට, සහෝදරත්වය සතුරුකම ජය ගන්නා සමාජයක් ගොඩනඟමු.

“අපේ දරුවන් තවදුරටත් යුද්ධයට බියෙන් ජීවත් නොවන සමාජයක් අපි ගොඩනඟා ගත යුතුයි. මෙය ඇදහිය නොහැකි තරම් දුෂ්කර කාර්යයකි, එහෙත් එය අප සාර්ථකව ඉටු කළ යුතු එකකි. මෙය කදිම මොහොත නොවිය හැකි වුවද, උතුරේ සහ දකුණේ ජනවාර්ගික ගැටුම්වල ගිනිදැල් නැවත ඇවිළී ඇති බවත්, එය ඇවිළී ඇත්තේ බලය සඳහා වන අරගලය නිසා මිස, වෙනත් කිසිදු හේතුවක් නිසා නොවන බවත් පැවසීමට මට බල කෙරෙයි. අපගේ මවුබිමේ සැබෑ නිදහස තවමත් නොපැහැදිලි ය; යුද්ධය අවසන් වීමෙන් පසුව පවා, අපගේ මාතෘ භූමියේ සම්පූර්ණ විමුක්තිය අපට තවමත් සම්පූර්ණයෙන් සුරක්ෂිත කර ගැනීමට නොහැකි වී තිබේ.

ජනාධිපති දිසානායක සිය කතාව අවසන් කළේ “සාමය සහ ප්‍රගතිය සඳහා” නව අරගලයක් දියත් කිරීම සඳහා සියලු‍ දෙනා එක්සත් වන ලෙස ඉල්ලා සිටිමිනි.

සඳුදා උත්සවයට ජනාධිපතිවරයා සහභාගී වීම මතභේදයට තුඩු දුන් බව රජය විශ්වාස කළේ නම්, ඔහු තම කතාවේදී භාවිත කළ වචනයක් නිසා නව මතභේදයක් මතු විය. සන්නද්ධ හමුදා නිලධාරීන්ට “රණවිරුවෝ” ලෙස ඇමතීම වෙනුවට, ජනාධිපති දිසානායක ඔවුන්ව “සොල්දාදුවෝ” ලෙස නැවත නැවතත් හැඳින්වූ අතර, එය විශේෂයෙන් සිංහල ජාතිකවාදී කොටස්වල කෝපයට හේතුවක් විය. මියගිය අයව “රණවිරුවෝ” ලෙස හඳුන්වා නොදීමෙන් ඔහු ඔවුන්ට තවදුරටත් අගෞරව කළ බවට චෝදනා එල්ල විය. මෙම නිර්භීත රණශූරයන්ට ලබා දී ඇති නාමය පහත හෙළීම පක්ෂය ගත් සාමූහික තීරණයක් ලෙස පෙනෙන්නට තිබුණි. සම්මුඛ සාකච්ඡාවේදී අමාත්‍ය හේරත්ගෙන් මෙම මියගිය හමුදා භටයන් හඳුන්වන්නේ කෙසේදැයි විමසූ විට, ඔහු ද “සොල්දාදුවන්” සහ “සන්නද්ධ හමුදා නිලධාරීන්” ලෙස පැවසීය. එය ඔවුන්ට ජාතියේ ගෞරවය ලබාදීම සඳහා දිගු කලක් තිස්සේ සිදුකළ හැඳින්වීමක් ප්‍රතික්ෂේප කිරීමකි.

කොළඹ මහ නගර සභාවේ බලය අල්ලන සටන උග්‍ර වෙයි

මේ අතර, අලු‍තින් පිහිටුවන ලද පළාත් පාලන ආයතනවල පළමු රැස්වීම සඳහා ජුනි 2 වැනි දා අවසන් දිනය ළඟා වෙත්ම, කිසිදු පක්ෂයකට හෝ කණ්ඩායමකට පූර්ණ බහුතරයක් නොමැති පළාත් පාලන ආයතන 170 කට වැඩි ගණනක බලය ලබා ගන්නේ කවුරුන්ද යන්න පිළිබඳව තවමත් පැහැදිලි බවක් දකින්නට නොමැත.

මැයි 6 වැනි දින ඡන්ද විමසීම පැවති පළාත් පාලන ආයතන 339 න් 161 ක සභාපති සහ උපසභාපති පත් කිරීම සම්බන්ධයෙන් කිසිදු ගැටලුවක් නොමැති බව මැතිවරණ කොමිසම අවධාරණය කර ඇත. මෙයට හේතුව දේශපාලන පක්ෂයක් හෝ ස්වාධීන කණ්ඩායමක් එම සභාවලින් සියයට 50 ක් හෝ ඊට වැඩි ඡන්ද ප්‍රතිශතයක් ලබාගෙන තිබීමය. මෙම සභා සම්බන්ධයෙන් මැතිවරණ කොමිසම ඉක්මනින්ම ගැසට් නිවේදනයක් නිකුත් කිරීමට අපේක්ෂා කෙරේ. කිසිදු දේශපාලන පක්ෂයක් හෝ ස්වාධීන කණ්ඩායමක් සියයට 50 ක් හෝ ඊට වැඩි බහුතරයක් ලබාගෙන නොමැති බැවින් අනෙක් සභා 178 සම්බන්ධයෙන් ප්‍රශ්න පවතී. මෙම සභාවල සභාපතිවරුන් සහ නියෝජ්‍ය සභාපතිවරුන් හෝ නගරාධිපතිවරුන් හෝ නියෝජ්‍ය නගරාධිපතිවරුන් පත් කිරීම කළ හැක්කේ අදාළ පළාත් පාලන කොමසාරිස් විසින් කැඳවන ලද රැස්වීමක් සඳහා මෙම සභාවල සාමාජිකයන් රැස් වූ පසුව පමණි.

මෙම තරගකාරී පළාත් පාලන ආයතනවල පරිපාලනය පිහිටුවීම සඳහා පාලක ජාතික ජන බලවේගය සහ විපක්ෂයේ ප්‍රධාන පක්ෂ එකතුවක් අතර සටන පසුගිය සති දෙක තුළ තීව්‍ර වී තිබේ. තම පක්ෂය ජයග්‍රහණය කරන පළාත් පාලන ආයතන 267 හි පරිපාලනය පිහිටුවන බව ජාතික ජන බලවේගය අවධාරණය කරයි. ජාතික ජන බලවේගයට පූර්ණ බහුතරයක් නොමැති පළාත් පාලන ආයතනවල පරිපාලනය පිහිටුවීම සඳහා එකිනෙකාට සහයෝගය දැක්විය හැකි එකඟතාවකට පැමිණීම සඳහා විපක්ෂ පක්ෂ පසුගිය සති දෙක තුළ දැඩි සාකච්ඡාවල නිරත වී ඇත. පක්ෂ නියෝජිතයන් හිටපු ජනාධිපති රනිල් වික්‍රමසිංහ සහ විපක්ෂ නායක සජිත් ප්‍රේමදාස යන දෙදෙනා සමග වෙනම සාකච්ඡා පවත්වා ඇත. සාකච්ඡා වට කිහිපයක් තිබියදීත්, සාකච්ඡා දිගටම කරගෙන යාමට පක්ෂ එකඟ වීම හැර වෙනත් කිසිදු ස්ථිර තීරණයක් මෙතෙක් ගෙන නැත.

මාස හයක් තුළ ඡන්දදායකයන් අතර තම ජනප්‍රියත්වය කෙතරම් දරුණු ලෙස පහත වැටී ඇත්දැයි පෙන්නුම් කරන කුරිරු ප්‍රතිඵලයකින් තවමත් කනස්සල්ලට පත්ව සිටින ජාතික ජන බලවේගය පක්ෂයට, තම පක්ෂය වැඩිම හෝ සමාන ආසන සංඛ්‍යාවක් ලබාගත් සෑම පළාත් පාලන ආයතනයකම පාලනය ලබා ගැනීම ආඩම්බරයට කරුණක් බවට පත්ව ඇත. කොළඹ මහ නගර සභාව තරම් මෙය වෙනත් තැනක දක්නට නොලැබෙන අතර, ජාතික ජන බලවේගයේ වාර්තාගත ආසන සංඛ්‍යාව වන ආසන 48, තවමත් සාමාජිකයන් 117 දෙනෙකුගෙන් යුත් නගර සභාවේ සම්පූර්ණ බහුතරයක් සඳහා අවශ්‍ය කරන ආසන 59 න් 11 දෙනෙකුගේ අඩුවක් ඉතිරි කර ඇත.

ජාතික ජන බලවේගයේ සාකච්ඡාකරුවන් ස්වාධීන කණ්ඩායම් සහ කුඩා දේශපාලන පක්ෂ සමග සාකච්ඡා කරමින් කාර්යබහුල වී ඇත. සමගි ජන බලවේගය, ශ්‍රී ලංකා පොදුජන පෙරමුණ සහ එක්සත් ජාතික පක්ෂය වැනි විරුද්ධ දේශපාලන පක්ෂ සමඟ සහයෝගයෙන් කටයුතු කිරීම ජාතික ජන බලවේගය විසින් ප්‍රතික්ෂේප කර ඇතත්, ඔවුන් කොළඹ මහ නගර සභාව ඇතුළු සමහර සභාවල මෙම පක්ෂවල තනි සාමාජිකයන් වෙත ප්‍රවේශ වී තිබේ. මේ නිසා ජාතික ජන බලවේගය අතීතයේ දී අනෙකුත් පක්ෂ දේශපාලන ක්‍රීඩා කරන බවට චෝදනා එල්ල කළත්, දැන් ඔවුන්ද එම ක්‍රීඩාවේ නිරත වන බවට චෝදනා එල්ල වෙමින් තිබේ. එනම්, ප්‍රතිවාදී පක්ෂවල සාමාජිකයන්ට විවිධ ආකාරවලින් පෙළඹවීම් ලබා දීමය. ස්වාධීන කණ්ඩායම්වලින් තරග කළ අය ජාතික ජන බලවේගයේ සමහරුන් මැතිවරණයට පෙර “සොරුන්” ලෙස හංවඩු ගසා ඇති නමුත්, දැන් ඔවුන්ගේ සහයෝගය සක්‍රීයව ලබා ගනිමින් සිටින බව ඔවුන් නැවත නැවතත් පෙන්වා දී තිබේ.

පළාත් පාලන ආයතන පිහිටුවීමේදී රටේ ධනවත්ම සහ වැදගත්ම පළාත් පාලන ආයතනය වන කොළඹ මහ නගර සභාව වෙත සියලු‍ම ප්‍රධාන පක්ෂවල ප්‍රධාන අවධානය යොමු වීම පුදුමයට කාරණයක් නොවේ. විරුද්ධ පක්ෂ අතර සාකච්ඡා කේන්ද්‍රගත වී ඇත්තේ තමන්ගේම කෙනෙකු කොළඹ නගරාධිපතිවරයා ලෙස පත් කිරීම කෙරෙහි වන අතර, පුළුල් ලෙස අපේක්ෂා කළ පරිදි, ජුනි 2 වැනිදා එම තනතුර සඳහා සාමාජිකයකු තෝරා පත් කර ගැනීම සඳහා ඡන්ද විමසීමක් පැවැත්වුවහොත් නගරාධිපති ධුරය සඳහා සමඟි ජන බලවේගය අපේක්ෂකයකුට සහාය දැක්වීමට සමඟි ජන බලවේගය සහ එක්සත් ජාතික පක්ෂය දැනටමත් එකඟතාවකට පැමිණ තිබේ.

ජාතික ජන බලවේගය ද කොළඹ මහ නගර සභාවට කොතරම් වැදගත්කමක් දක්වනවාද යන්න පසුගිය සඳුදා (19) ජනාධිපති දිසානායක විසින්ම ස්වාධීන කණ්ඩායම් කිහිපයක සහ කොළඹ මහ නගර සභාවට සාමාජිකයන් තේරී පත් වූ කුඩා දේශපාලන පක්ෂ කිහිපයක නියෝජිතයන් හමුවීමෙන් පැහැදිලි විය. ජාතික ජන බලවේගයට සම්පූර්ණ බහුතරයක් ලබා ගැනීමට මන්ත්‍රීවරුන් 11 දෙනෙකුගේ හිඟයක් ඇති බැවින්, කොළඹ නව නගරාධිපතිවරයා ලෙස තමන්ගේම කෙනෙකු පත් කිරීම සඳහා එවැනි අංගවලින් ලැබෙන සහාය පක්ෂයට ඉතා වැදගත් වේ. කොළඹ මහ නගර සභාවේ පාලනය සඳහා වන සටනේ ජයග්‍රහණය මෑත සතිවල ජාතික ජන බලවේගයට උමතුවක් බවට පත්ව ඇති අතර, ජනාධිපතිවරයා තම පක්ෂය වෙනුවෙන් සාකච්ඡාවලට සම්බන්ධ වීමේ අසාමාන්‍ය පියවරෙන් එය සනාථ වේ.

සඳුදා ජනාධිපතිවරයා හමුවූ නියෝජිතයන් කිහිප දෙනෙකුගේ දේශපාලන පක්ෂ සහ ස්වාධීන කණ්ඩායම් මේ වන විට ජාතික ජන බලවේගයට සහාය දැක්වීමට තීරණය කර තිබේ. ඉන් එකක් වන්නේ ප්‍රජාතන්ත්‍රවාදී ජාතික සන්ධානය යි. එම පක්ෂයට කොළඹ නගර සභාවේ එක් ආසනයක් ඇති අතර, ඔහු සභාවේදී ජාතික ජන බලවේගයට සහාය දක්වන බව ප්‍රජාතන්ත්‍රවාදී ජාතික සන්ධානයේ නායක සහ හිටපු පාර්ලිමේන්තු මන්ත්‍රී ප්‍රභා ගනේසන් ප්‍රකාශ කළේය. “අපගේ විධායක කමිටුව රැස්වූ අතර, අපි කොළඹ මහ නගර සභාවේදී ජාතික ජන බලවේගයට සහාය දීමට තීරණය කළෙමු” යැයි ගනේසන් පැවසුවේ, මෙම විධිවිධානය දැනට කොළඹ මහ නගර සභාව සඳහා පමණක් වන බව අවධාරණය කරමිනි. ප්‍රජාතන්ත්‍රවාදී ජාතික සන්ධානය සතුව වවුනියාවේ ආසන පහක් සහ නුවරඑළියේ ආසන හතරක් ඇති බවත්, මෙම ප්‍රදේශ දෙකෙහිම තම පක්ෂය සන්ධානයක කොටසක් ලෙස තරග කර ඇති බවත් ඔහු පැවසීය. “මෙම සභාවල ජාතික ජන බලවේගයට සහාය දෙනවාද යන්න තීරණය කිරීමට පෙර අපගේ හවුල්කරුවන්ගේ අදහස් ද සලකා බැලිය යුතුයි” යැයි ඔහු වැඩි දුරටත් පැවසීය.

විපක්ෂ දේශපාලනඥයන් සංවිධානාත්මක අපරාධවලට සම්බන්ධ බවට මහජන ආරක්ෂක ඇමැතිගෙන් චෝදනා

මේ වසරේ මේ දක්වා අවම වශයෙන් ජීවිත 30 ක් බිලිගත් සංවිධානාත්මක අපරාධවලට අදාළ මාරාන්තික වෙඩි තැබීම් මැඩපැවැත්වීමට අපොහොසත් වී ඇති බවට එල්ල වන විවේචන මධ්‍යයේ, රජය මේ සතියේ සංවිධානාත්මක අපරාධ කල්ලි මර්දනය කිරීම සඳහා ගෙන ඇති පියවර ද ඉදිරිපත් කළේය. මෙම කාරණය සම්බන්ධයෙන් කළ කතාවේදී මහජන ආරක්ෂක අමාත්‍ය ආනන්ද විජේපාල, පාර්ලිමේන්තුවේදී කියා සිටියේ සංවිධානාත්මක අපරාධ කල්ලි 10 ක් සහ සමඟි ජන බලවේගය, එක්සත් ජාතික පක්ෂය සහ ශ්‍රී ලංකා පොදුජන පෙරමුණේ දේශපාලනඥයන් කිහිප දෙනෙකු අතර සම්බන්ධතා ඇති බවට බුද්ධි අංශ විසින් අනාවරණය කරගෙන ඇති බවයි. දේශපාලනඥයන් අතර හිටපු අමාත්‍යවරුන්, නියෝජ්‍ය අමාත්‍යවරුන්, පාර්ලිමේන්තු මන්ත්‍රීවරුන් සහ හිටපු සහ වත්මන් පළාත් පාලන මන්ත්‍රීවරුන්ද සිටින බව අමාත්‍යවරයා චෝදනා කළේය. සංවිධානාත්මක අපරාධ වැඩිවීමට මෙම සම්බන්ධතා ද දායක වී ඇති බවත්, මේ සම්බන්ධයෙන් විමර්ශනය කිරීමට සහ ඊට සම්බන්ධ අය අත්අඩංගුවට ගැනීමට කණ්ඩායම් කිහිපයක් යොදවා ඇති බවත් ඔහු පැවසීය.

දේශපාලන පක්ෂ ගැන සඳහන් කිරීමෙන් නතර නොවී, ඊට සම්බන්ධ දේශපාලනඥයන් නම් කරන ලෙස විපක්ෂ පක්ෂ අමාත්‍ය විජේපාලට වහාම අභියෝග කළ අතර, එසේ කිරීමට අපොහොසත් වීමෙන් එම පක්ෂවල සිටින සියලු‍ම දේශපාලනඥයන් එකම බුරුසුවකින් පින්තාරු කිරීමේ අවදානමක් ඇති බව සඳහන් කළේය. තම චෝදනා සඳහා වගකීම තමන් භාර ගන්නා බවත්, පරීක්ෂණ අවසන් වූ පසු පාර්ලිමේන්තුවට සම්බන්ධ අයගේ නම් කරන බවත් අමාත්‍යවරයා පැවසීය.

විගණකාධිපතිවරයාගේ පත්වීම සම්බන්ධයෙන් රජයෙන් ආරක්ෂාකාරී පියවරක්

ශ්‍රී ලංකාවේ මීළඟ විගණකාධිපතිවරයා ලෙස ජනාධිපති අනුර කුමාර දිසානායක ලබාදුන් නමක් ආණ්ඩුක්‍රම ව්‍යවස්ථා සභාව ප්‍රතික්ෂේප කිරීම ද රජය දැඩි අපහසුතාවකට පත් කළ අතර, විගණකාධිපතිවරයා ලෙස දේශපාලන පත්වීමක් ලබා දීමට තවදුරටත් උත්සාහ කළහොත් ඉන් නීතිමය මෙන්ම වෘත්තීය සමිති ක්‍රියාමාර්ගවලටද මුහුණ දීමට සිදුවිය හැකිය. ජනාධිපතිවරයා විසින් නම් කළ පුද්ගලයා ලංකා ඛනිජ තෙල් සංස්ථාවේ අනුබද්ධිත සමාගමක අධ්‍යක්ෂ මණ්ඩලයේ සේවය කරන, රාජ්‍ය අංශයේ කිසිදු පළපුරුද්දක් නොමැති අයෙකු වූ අතර, දස දෙනෙකුගෙන් යුත් මධ්‍යම කාරක සභාවේ සාමාජිකයින්ගෙන් බහුතරයක් විසින් එම නම ප්‍රතික්ෂේප කරනු ලැබ ඇත.

ආණ්ඩු පක්ෂයේ සාමාජිකයන් තිදෙනා වන අගමැතිනි හරිනි අමරසූරිය, අමාත්‍ය බිමල් රත්නායක සහ ජාතික ජන බලවේගයේ මන්ත්‍රී අබූබකර් අතම්බාවා යන අය ජනාධිපතිවරයාගේ අපේක්ෂකයාට පක්ෂව ඡන්දය දුන් නමුත්, සාමාජිකයන් පස් දෙනෙක් ජනාධිපතිවරයාගේ අපේක්ෂකයා ප්‍රතික්ෂේප කළහ. නාම යෝජනාවට විරුද්ධ වූයේ නිල බලයෙන් පත් වූ සාමාජිකයකු වන විපක්ෂ නායක සජිත් ප්‍රේමදාස මෙන්ම මන්ත්‍රීවරයකු වන අජිත් පෙරේරා සහ ආණ්ඩුක්‍රම ව්‍යවස්ථා සභාවේ සිවිල් සමාජ සාමාජිකයන් තිදෙනා වන ආචාර්ය ප්‍රතාප් රාමනුජම්, ආචාර්ය දිල්කුෂි අනුලා විජේසුන්දර සහ ආචාර්ය දිනේෂා සමරරත්න ය. ආණ්ඩුක්‍රම ව්‍යවස්ථා සභාවේ සාමාජිකයෙකු වන ඉලංකෙයි තමිල් අරසුක් කච්චි මන්ත්‍රී එස්. ශ්‍රීදරන් ඡන්දය විමසන අවස්ථාවේ පැමිණ සිටියේ නැත.

බ්‍රහස්පතින්දා නැවතත් ආණ්ඩුක්‍රම ව්‍යවස්ථා සභාව රැස්වූ විට, හිටපු විගණකාධිපතිවරයා වූ චූලන්ත වික්‍රමරත්න 2025 අප්‍රේල් 8 වැනිදා විශ්‍රාම යාමෙන් පසු, වැඩබලන තනතුරේ සේවය කරන ජ්‍යෙෂ්ඨ නියෝජ්‍ය විගණකාධිපති ජී. එච්. ඩී. ධර්මපාල මහතාට මාස හයක සේවා දිගුවක් ලබා දීමට තීරණය විය.

නව විගණකාධිපතිවරයකු පත් කිරීම පිළිබඳව සාකච්ඡා කිරීම සඳහා ආණ්ඩුක්‍රම ව්‍යවස්ථා සභාව රැස්වීමට පෙර, විගණන කාර්යාලයේ සාමූහික වෘත්තීය සමිති, ආණ්ඩුක්‍රම ව්‍යවස්ථා සභාවේ සාමාජිකයන්ට ලිපියක් යවමින් ඉල්ලා සිටියේ, සේවයෙන් තෝරා නොගත් ඕනෑම නාමයෝජනාවක් ප්‍රතික්ෂේප කරන ලෙසයි. මන්ද එවැනි පත්වීමක් විගණකාධිපති කාර්යාලයේ ස්වාධීනත්වයට හා අපක්ෂපාතීත්වයට බරපතළ ලෙස හානි කරන අතර, දේශපාලන මැදිහත්වීම්වලින් වැළකී රට තුළ දූෂණයට එරෙහිව සටන් කිරීමට රජය සතු කැපවීමට එය පටහැණි වන නිසාය.

විගණකාධිපති දෙපාර්තමේන්තුවේ වසර 225 ක ඉතිහාසය තුළ විගණකාධිපතිවරුන් 41 දෙනකු එම තනතුරේ සේවය කර ඇති බවත්, සේවයෙන් පිටතින් බඳවා ගත් දෙදෙනකු හැර අනෙක් සියල්ලන්ම දෙපාර්තමේන්තුවේ නිලධාරීන් බවත් අපට එවා තිබූ ලිපියෙන් වෘත්තීය සමිති එකමුතුව පෙන්වා දී ඇත. රීතියට ව්‍යතිරේක පැවති අවස්ථා දෙකේදීම, විගණකාධිපති තනතුර භාර ගැනීමට අවශ්‍ය වෘත්තීය සුදුසුකම් ඇති නිලධාරීන් නොසිටි බව වෘත්තීය සමිති ලිපියේ සඳහන් කර ඇත. වැඩබලන විගණකාධිපති තනතුර දරන ජී. එච්. ඩී. ධර්මපාල මහතා ඊළඟ විගණකාධිපති ධුරයට වඩාත් සුදුසු පුද්ගලයා බවත්, ඔහුගේ වසර 30 කට වැඩි පළපුරුද්දක් සහ සේවා කාලය තුළ නිර්දෝෂී වාර්තාවක් ඇති බවත් ඔවුහු පැවසූහ.

විගණකාධිපතිවරයා පත් කිරීම අවුල් කිරීමට ගන්නා ඕනෑම උත්සාහයක් රජයට පමණක් නොව රටට ද මිල අධික විය හැකිය. ජාත්‍යන්තර මූල්‍ය අරමුදල විසින් පසුගිය වසරේ නිකුත් කරන ලද සිය වාර්තාව හරහා වර්තමානයට වඩා වැඩි බලතල සහිතව කාර්යාලය ශක්තිමත් කරන ලෙසට ඉල්ලා ඇත. පොදු වත්කම් කළමනාකරණය කිරීමේදී විනිවිදභාවය සහ වගවීම වැඩි දියුණු කිරීම සඳහා ජාත්‍යන්තර මූල්‍ය අරමුදල විසින් නිර්දේශ කළ පියවරවලින් එකක් වන්නේ, රාජ්‍ය වත්කම් අධීක්ෂණය කිරීමේ සහ කළමනාකරණය කිරීමේ වගකීම් ඉටු කිරීමට අපොහොසත් වන ප්‍රධාන ගිණුම් නිලධාරීන් ඇතුළු නිලධාරීන්ගෙන් දඩ මුදල් අය කිරීමට විගණකාධිපතිවරයාට හැකි වන පරිදි ජාතික විගණන පනත සංශෝධනය කිරීමයි. ජාත්‍යන්තර මූල්‍ය අරමුදලේ ඊළඟ වාරිකය පිළිබඳ අවිනිශ්චිතතාව හේතුවෙන්, ජාතික විගණන සේවයෙන් පිටත ඕනෑම අයකු විගණකාධිපති තනතුරට පත් කිරීම නිසැකවම රජයට විශාල වියදමක් දැරීමට සිදුවනු ඇත.

(***)
“සන්ඩේ ටයිම්ස්” පුවත්පතේ දේශපාලන අංශය විසිනි
“සන්ඩේ ටයිම්ස්” පුවත්පතේ පළවූ ලිපිය සිංහලට පරිවර්තනය කළේ අනිල් කරුණාරත්න