හලාවත මාදම්පේ ප‍්‍රදේශයේ වෙල්යායක් ආසනයේ පිහිටි පොල් රුප්පාවකි. වෙල් යාය ආසන්නයේ පිහිටි මේ පොල් රුප්පාවේ ඇති පොල් ගස් රා මැදීම සඳහා යොදාගෙන ඇත්තේ බොහෝ කාලයක සිටය.

අධිකරණ වෛද්‍ය නිලධාරී විශේෂඥ වෛද්‍ය සුමිත් අඹේපිටිය

මේ පොල් රුප්පාවේ ඇති පොල් ගස් මැදීමේ නිරතව සිටින රා මදින්නා පිට පළාතක පදිංචිවූ අයෙකි.

මහත්තයා මම මේ ළඟදී රෑ යාමයේ රා මදින්න එක් ගහක ඉඳලා අනෙක් ගහට අතුරේ යද්දී මට ඉස්සරහින් තවත් රා මදින අයෙක් අතුරේ යනවා දැක්කා. මේ වත්තේ ගස් මදින්නේ මම විතරයිනේ. මම බැලූවා කවුද මේ රා මදින කෙනා කියලාත්. තමුසේ කවුද කියලා මම ඇහැව්වා. ඒත් මට ඒ රා මදින්නා වචනයක්වත් කථා කළේ නැහැ. මිනිහාගේ පාඩුවේ අතුර දිගේ ගියා. මම ආයෙත් පාරක් කථා කළා. ඒත් මිනිහා නොවේ නිකමටත් හැරිලා බැලූවේ යැයි රා මදින්නා ඒ පොල් වත්ත ආසන්නයේ පදිංචිව සිටින ව්‍යාපාරිකයෙක් සමග කියා ඇත්තේ ඔහු මුණ ගැසුණු අවස්ථාවකය.

තමුසේ මොකද කළේ ව්‍යාපාරිකයා ද රා මදින්නාගෙන් විමසා ඇත්තේ තරමක කුුතුහලයකින්ය.

මට ඉස්සරහින් අතුරේ කිසිම කථාවක් බහක් නැතිව ගිය මිනිහා නොපෙනී ගියා. මම ඒක එච්චර ගණන් ගත්තේ නැහැ. මගේ කාර්ය හමාර කරලා ගෙදර යන්න ගියා.

මේ කථාව ලැව් ගින්නක්සේ ගමපුරා පැතිර යන්නට වැඩි කාලයක් ගතවූයේ නැත. බොහෝ දෙනෙක් කියා ඇත්තේ එදා අතුරේ ගමන් කරන්නට ඇත්තේ අවතාරයක්, භූත ආත්මයක් විය හැකි බවය.

මේ වත්තේ රා මදින්නෙක් හදිසියේ මිය යන්නට ඇති. දැන් මිනිහාගේ අවතාරය ඇවිදින් මේ විදිහට රා මදිනවා ඇති. ඒකෙ දෙකක් නැහැ. තමුසේ බයවෙන්නට ඇත්තේ ඔය මිය ගිය රා මදින්නාගේ අවතාරයට වෙන්න ඇති. අවතාර ගැන විශ්වාස කරන ගමේ කිහිපදෙනෙක්ම රා මදින්නා සමග පවසා ඇත.
රා මදින්නා මෙවැනි දර්ශනයක් දැක ගතවී ඇත්තේ දින තුන හතරක පමණ කාලයකි.

බිම් කරුවල වැටී ඇති මොහොතක රා මැදීමට ගිය මේ කියන රා මදින්නා තවත් පොල් ගසක සිට අනෙක් පොල් ගසට අතුරේ යන අතරවාරයේ ඇඳ වැටී මිය ගොස් ඇත.

රා මැදීමට අතුරේ යනවිට රා මදින්නා අවතාරය දැක හොඳටම බයවී අතුරෙන් වැටී මිය යන්නට ඇති බව එහි ගිය බොහෝදෙනෙකුගේ විශ්වාසය විය.
මේ පොල් රුප්පාවේ ඇති පොල් ගස් වල අවතාරයක් කෙම්මුර දවස් වලට රෑට රෑට රා මදින බව ගම පුරා ආරංචි පැතිර ගියේ විදුලි වේගයෙනි.

ඒ රා මදින්නා මිය ගොස් දින කිහිපයකට පසු තවත් රා මදින්නෙක් මේ පොල් රුප්පාවේ ඇති ගස්වල රා මැදීමට පැමිණ ඇත.

මේ පොල් රුප්පාව ආසන්නයේ පදිංචිව සිටින ව්‍යාපාරිකයා පැවසූ කථාව මෙතැන් සිට අපි අසා දැනගනිමු.

මගේ මතකයේ හැටියට වෙලාව රෑ 7.00 ට විතර වගේ ඇති. මට පොල් රුප්පාව දෙසින් ගැහැණු කෙනෙක් කෑගහන ශබ්දයක් ඇසුනා. මම ඉක්මනට ඒ ගැහැණු කෙනා කෑගහන පැත්තට දිව්වා. මම ගිහින් විපරම් කරලා බලද්දී රා මදින මනුස්සයා ගහෙන් වැටිලා කෙඳිරිගානවා. ඒ කෙඳිරි හඬ ඇහිලා එයාගේ පවුල ඇවිත් බලද්දී මනුස්සයා ගහෙන් වැටිලා ඉන්නවා දැකලා කෑගසා තියෙන්නේ. පස්සේ අපි ඒ මනුස්සයාව ඉක්මනට මාරවිල රෝහලට අරන් ගියා. දොස්තර මහත්වරු ඒ මනුස්සයාගේ ජීවිතේ ගොඩදාන්න ලොකු වෙහෙසක් ගත්තා. නමුත් වැඩක් වුණේ නැහැ. දවස් ගණනකට පස්සේ මිය ගියා.
මේ මනුස්සයත් රෑ බෝවෙලා රා මදිමින් අතුර දිගේ යද්දි කලින් රා මදින්නා දැක්ක අවතාරය දැකලා බය වෙලා අතුරෙන් ඇද වැටිලා මිය ගියා කියලා ගමේ හුඟදෙනෙක් කියන්නට පටන්ගත්තා. පළමු වැනි රා මදින්නා අතුරේ ගහෙන් වැටිලා මාසයක්වත් යන්නට කලින් තමා දෙවැනි රා මදින්නා ගහෙන් වැටිලා මැරුණේ. මේ මරණ දෙකම අවතාරයක් දැකීමෙන් සිදුවූවක් බවට අදටත් ගමේ බොහෝ දෙනෙක් විශ්වාස කරනවා යැයි මේ අවතාර කතාව ගැන තොරතුරු සොයා බැලීමට ඒ ගමට ගිය අවස්ථාවේ ව්‍යාපාරිකයා මේ බව පැවසීය.

තව දුරටත් මේ සම්බන්ධව අදහස් දක්වමින් ව්‍යාපාරිකයා මෙසේද කීය.

මීට කලින් මේ වත්තේ රා මැද්ද අයෙකු මිය ගිහින්. එයාගේ අවතාරය මෙහෙම රා මදිනවා කියලා තමා ගමේ අය කියන්නේ. අවුරුදු 10x15 කට විතර වගේ කාලයකට කලින් මේ වත්තට කෙනෙක් ඇවිත් සිය දිවි නසා ගෙන තිබෙනවා. රා මුට්ටි බෑමට පොල් ගසක බැඳ තිබෙන කඹයකින් තොන්ඩුවක් හදාගෙන බෙල්ලට දාගෙන එල්ලිලා තමා ඒ මනුස්සයා සිය දිවි හානිකරගෙන තිබෙන්නේ. ගමේ සමහර උදවිය කියන්නේ සිය දිවි හානිකරගත් ඒ මනුස්සයාගේ අවතාරය තමා ඔය විදිහට කෙම්මුර දවස්වලට අතුරේ යන්නේ කියලා.

බිම ඉන්න කිසිම කෙනකුට ඔය කියන අවතාරය පේන්නේ නැහැල්ලූ. රා මදින්න ගහ උඩට නැග්ග අයට තමා ඔය අවතාරය පෙනෙන්නේ යැයි එහිදී අපට හමුවූ ගම්වාසීන් කිහිපදෙනෙක්ම කීවේ එවැනි කතාවකි.

ගමේ වැඩි දෙනෙක් මේ අවතාර කථාව එකහෙළාම විශ්වාස කරන නමුත් පොල් වත්තේ අයිතිකරු හා තවත් ගම්වාසීන් පිරිසක් පවසන්නේ මේ අවතාර කථාව පට්ටපල් බොරුවක් බවය.

දෙවැනි රා මදින්නාත් අතුරේ යද්දී ඇද වැටී මිය ගිය පසු තවත් රා මදින්නෙක් ඒ වැඬේ නිරතව සිටින්නේය.
රා ලබා ගැනීමට උදේ සහ සවස් යාමයේ දිනකට දෙවරක් පොල් මල තලන නමුත් අලූතින් මේ වත්තට රා මැදීමට පැමිණ සිටින පුද්ගලයා රෑ බෝවීමට කළින් පොල් මල්තලා යන්නේ අවතාරයට ඇති බිය නිසා බව අපට දැනගැනීමට ලැබිණි.

රෑ බෝවෙලා මේ වත්තේ රා මදින්න ගිය දෙන්නෙක්ම අවතාරවලට බයවී අතුරෙන් ඇද වැටිලා මිය ගිය බව දැනගත්තා. මේ කථාව ඇත්තද බොරුද කියන්න නම් මම දන්නේ නැහැ. කොහොම වුණත් කල්වේලා ඇතිව ඇවිත් ගස් ටික මැදලා ඉවරයක් කරනවා. ඒ වෙන කිසිම දෙයක් හින්දා නොවේ රෑ බෝවුනාමනේ අවතාරේ අතුරේ ගමන් කරන බව කියන නිසා යැයි රා මදින්නා කියා සිටියේ රා මැදීමට මුල්ම පොල් ගසට හැරදිගේ ගමන් කිරීමට කලිනි.
මේ වත්තේ ඇති පොල් ගස් වල බැඳ ඇති අතුරු දිගේ රෑට අවතාරයක් ගමන් කරන බවට අදටත් ගමේ ඇතැමුන් විශ්වාස කරන අතර ගස් නැග අතුරේ යාමට අපට පුළුවන්කමක් නොමැති නිසා ඒ ගැන ගවේෂණයක් කිරීමට නොහැකිවිය.

සමහර ගම්මුන් පවසන ආකාරයට බිම සිට බැලූවාම අතුරේ යන අවතාරය පෙනෙන්නේ නැහැ. අවතාරය දැකීමට නම් අතුරේම ගමන් කළ යුතුවීම විශේෂත්වයකි.

කෙනෙක් මිය ගිය පසු ඔහුගේ ආත්මය අවතාරයක්, එහෙමත් නැත්නම් භූතාත්මයක් ලෙස රෑට තැන් තැන්වල ගමන් කරනවා යැයි පැවසීම මිථ්‍යාවක් බව හේ පැවසිය.

හම්බන්තොට මහ රෝහලේ ප‍්‍රධාන අධිකරණ වෛද්‍ය නිලධාරී විශේෂඥ වෛද්‍ය සුමිත් අඹේපිටිය මහතාට හොල්මන් අවතාර සම්බන්ධයෙන් කරුණු කාරණා දැන ගැනීමට මම මුලින්ම කථා කළෙමි.

ස්වසනය සහ හෘද ස්පන්දනය නැවත යථා තත්ත්වයට පත් කිරීමට නොහැකි වන ලෙස නතරවීමත් එම නිසා මොළයට රුධිරය සැපයීම විනාඩි 04 කට වඩා වැඩි කාලයක් නතරවීම නිසාත් මොළයේ නියුරෝන ෙසෙල විනාශවී මොළය හා මධ්‍ය ස්නායු පද්ධතියේ ක‍්‍රියාකාරීත්වය නැවත යථාතත්ත්වයට පත්කළ නොහැකි ලෙස ඇණහිටීම මරණය ලෙස හැඳින්වීමට පුළුවනි.

වෛද්‍ය විද්‍යාත්මකව කෙනකුගේ මරණයක් සිදුවන්නේ මෙවැනි ආකාරයටයි. මෙවැනි ආකාරයට කෙනෙකුගේ මරණයක් සිදුවන විට ඔහුගේ හෝ ඇයගේ සිරුර තුළින් ආත්මයක් පිටවී ගොස් පසුව තැනින් තැන හොල්මන් කරනවා යැයි පැවසීම විද්‍යාත්මක පදනමක් නොමැති හුදු විශ්වාසයක් පමණක් බව පැවසිය යුතුව ඇතැයි විශේෂඥ වෛද්‍ය අඹේපිටිය මහතා පවසයි.

ගලගෙදර දිසා රෝහලේ වෛද්‍ය ජනක ජයසූරිය මහතා මේ අවතාර සිද්ධිය ගැන දැක්වූයේ මෙවැනි අදහසකි. මෙම සිදුවීම දෙස බලන විට අපට කාරණා කිහිපයක්  උපකල්පනය කළ හැකි වෙනවා.

ගෙල වැළ ලා ගෙන මියගිය තැනැත්තා -හොල්මනක් වී” ඒ අවට සැරිසරනවා යයි කියන කට කථාව පළමුව අතුරේ සේවයට පැමිණි තැනැන්තාට ද දැනගන්නට ලැබෙන්නට ඇති. මෙවැනි හොල්මන්, අවතාර ආදිය සත්‍ය යයි විශ්වාසයට ගන්නා අයට මනෝභ‍්‍රාන්ති ලෙස ඒවා ඇතැම් විට දිස්වන්නට පුළුවන්. විශේෂයෙන්ම වෙහෙසට පත්වී සිටින විට, අධික නිදිබර ගතියෙන් සිටින අයකුට, අධික ලෙස මත්පැන් පානය කර ඇති අයකුට මෙවැනි මනෝභ‍්‍රාන්ති ලෙස විවිධ රූප පෙනෙන්නට පුළුවන්. රාත‍්‍රියේදී ඇතැම් රියදුරන්ට පාර අයිනේ ඇති බැනරයක් හෝ සුදුපාට සැතපුම් කණුවක් -සුදු ඇඳගත් අයකු” ලෙස පෙනුණු අවස්ථා  ඕනෑ තරම් තිබෙනවා.

ඉතින්, අතුරේ ගිය තැනැත්තාටත් මෙවැනි මනෝභ‍්‍රාන්තියක් දිස්වූවා විය හැකියි. එසේම අපි කළුවරේ හිතේ බය ගතිය ඇතිව යන විට ආපසු හැරී බලනවා. සාමාන්‍යයෙන් එහෙම වෙන්නේ හිතේ බය ගතිය නැති කරගන්නයි. සමහර විට අතුරේ ගිය තැනැන්තාත් එසේ කරන්නට ගොස් පය පැටලී වැටුණා ද විය හැකියි. දෙවනුව අතුරේ සේවය කළ තැනැත්තාට ද අත්වූයේ පළමු තැනැත්තාටම අත්වූ ඉරණමයි. ඔහුට ද මේ හොල්මන් කථා සියල්ල අසන්නට ලැබී ඇතුවාට සැක නැහැ. -දෙන්නෙක්ම මැරුණු තැනක්” යන සිතිවිල්ල ඔහුගේ සිතට වදදෙන්න ඇති.

මේ කථාවෙන් මට ඔබට කියන්න පුළුවන් පණිවිඩය තමයි මේ හොල්මන් අවතාර වැනි නොපෙනෙන බලවේග විශ්වාසයට ගැනීම අනවශ්‍ය කරදර රැුසකට මගපාදන බව යැයි වෛද්‍ය ජනක ජයසූරිය මහතා පවසයි.

සටහන - ශ්‍රීනාත් ප‍්‍රසන්න ජයසූරිය / ඡායාරූප -  මාදම්පේ එස්. හේරත්