(කරන්දෙණිය – එම්. සුසිල් ප්‍රියන්ත)
 නිරෝධායනය වන තම මිතුරාට ත්‍රිරෝද රථයක් මාර්ගයෙන් යැවූ වියළි ආහාර ද්‍රව්‍යවලින් බාගයක්ම පිල්ලි ගැසූ ත්‍රිරෝද රථ රියැදුරකු පිළිබඳ පුවතක් දකුණේ කොනේ ගම්මානයකින් අසන්නට ලැබේ.

 තමාගේ හිතවතා කොරෝනා ආශ්‍රිතයකු බව දැනගත් ඔහු නිරෝධායනය වන හිතවතාගේ කෑම බීම සඳහා රුපියල් දසදහසක පමණ වියළි ආහාර තොගයක් යැවීමට සිතා ගත්තේය.

 තමාට ඒ සඳහා ඔහුගේ නිවෙසට යාමට වේලාවක් නොතිබූ බැවින් ඔහු තමා හොඳින් දන්නා හඳුනන ත්‍රිරෝද රථ රියැදුරකුට එය බාර කළේ ඒ සඳහා අවශ්‍ය මුදල් හා බඩු ලැයිස්තුව ද සමගය. ඒ සඳහා ත්‍රිරෝද රථ ගාස්තුව ද ගෙවා දැමූ ඔහු බඩු මිලදී ගැනීමෙන් ඉතිරි වන මුදල් ද ත්‍රිරෝද රථ රියැදුරාට ගන්නා ලෙස කීවේ එය වඩාත් හොඳින් කරාවි යන ඒකාන්ත විශ්වාසයෙනි.

 ත්‍රිරෝද රථයකින් තමා බඩු ටිකක් එවන බවත් සිය හිතවතාට දුරකතන ඇමතුමක් දී ඔහු කීවේය. එමෙන්ම එවන ලද බඩු ලැයිස්තුව ද වට්ස්ඇප් මාර්ගයෙන් හිතවතාට ලැබීමට සැලැස්සුවේය.

 කියූ පරිදි ත්‍රිරෝද රථ රියැදුරකු හිතවතාගේ ගේට්ටුව ඉදිරිපස බඩු තොගයක් ගෙනත් දැම්මේය. ත්‍රිරෝද රථ රියැදුරු ඒ බව දැන්වීමෙන් අනතුරුව ඔහු හිතවතා එවූ බඩු තොගය නිවෙසට ගෙන ගියේය. ඒත් සිය හිතවතා තමාට වට්ස්ඇප් මාර්ගයෙන් එවූ බඩු ලැයිස්තුවේ බඩු නැති බව බැලූ බැල්මට ඔහුට පෙනුණේය.

 ඒ අනුව ඔහු තමාට හිතවතා වට්ස්ඇප් මාර්ගයෙන් එවූ බඩු ලැයිස්තුව පරීක්ෂා කර බලන විට ත්‍රිරෝද රථ රියැදුරා ගෙනත් දුන් බඩුවලින් බාගයක පමණ අඩුවක් දුටුවේය. සම්බා හාල් කිලෝග්‍රෑම් දහයේ කොට්ට දෙකෙන් තිබුණේ එකකි. කිරිපිටි පැකැට්ටු හතරෙන් තිබුණේ දෙකකි. ජෑම් බෝතල් දෙකෙන් තිබුණේ එකකි. චීස්, බිස්කට්, සීනි, පරිප්පු ආදී බඩු පැකට්වලින් ද තිබුණේ බාගයකි.

 “අනේ මොකකටවත් නෙමෙයි මේ කතා කරන්නේ. උඹ මට එවනවයි කියපු බඩුවලින් භාගයකුයි මට ත්‍රීවිල් රථ රියැදුරා ගෙනත් දුන්නේ. මම හිතන්නේ නැහැ උඹ මට බොරුවක් කළා කියලා.” ඔහු දුරකතනයෙන් කතා කර හිතවතාට කී විට ඔහුට විශාල ලැජ්ජාවක් ඇතිවූවේය.

ඒ සමගම ඔහු ත්‍රිරෝද රථ රියැදුරාට දුරකතන ඇමතුමක් දී හොඳටම දෝෂාරෝපණය කළේය. “කෙනෙක් අසරණ වෙලා ඉන්න කොටත් මේ වගේ ජරාවැඩ කරන මිනිස්සු ඉන්න බව දැන ගත්තේ අදයි” යයි කියමින් ඔහු ත්‍රිරෝද රථ රියැදුරුට තවදුරටත් දෙහි කැපුවේය.

 ත්‍රිරෝද රථ රියැදුරාත් පරාජය බාර ගැනීමට අකමැති වූයේය. “පොඩ්ඩක් ඉන්න මහත්තයා. මම පොඩ්ඩක් හොයලා බලන්නම්” කියමින් ත්‍රිරෝද රථය නතර කරනවා ඔහුට ඇසුණේය. ඒ සමගම “අනේ සමාවෙන්න ඕනෑ මහත්තයා. මට බඩු ටිකක් අර නිවසේ බාන්න අමතක වෙලා. ඒ බඩු ටික තියෙනවා. මම ගිහිල්ලා ඒක ආයෙත් බාරදීලා එන්නම්” කියමින් කීවේය.

 “හා හා බඩු ටික දීලා එනවකෝ. ආයෙත් මේ වගේ කොන්ත්‍රාත් තමුසෙට දෙන්නෙත් නැහැ. ආයෙත් ත්‍රීවිල් එකේ හයර් යන්නෙත් නැහැ” කියමින් ඔහු දුරකතන ඇමතුම විසන්ධි කළේය.