(සිටිනාමළුව අනීෂ මානගේ)
සාස්තරකාරයකුගේ කීමට පොලිස් කූඩුවේ ඉන්නටත්, ප්‍රසිද්ධියේ පුද්ගලයකුට වැඳ සමාව ගන්නටත් වූ සිද්ධියක් ගිරුවාපත්තුවෙන් වාර්තා වෙයි.

සිද්ධිය සැකෙවින් මෙසේය.

එකම පවුලේ කිහිපදෙනකු තමන්ගේ ප්‍රශ්නයකට දෙවියන්ගේ උදව් බලාපොරොත්තුවෙන් දේවාලයකට ගොස් ඇත. එහිදී සාස්තරයක් අසා පේනයක් බලා ඇති අතර එයින් කියවී ඇත්තේ ගමේ එක්තරා මනුස්සයකු සොහොනකින් පස් ගෙනැත් දෙහිත් එක්ක මතුරා නිවෙසේ හතර කොන වළ දමා ඇති බවයි. 

එම පුද්ගලයා කවුදැයි මහත් ඕනෑකමින් ඇසූ විට දේවාරූඪයෙන් සිටි කපු උන්නැහේ පැවැසූ ලක්ෂණවලට අනුව මතකයට නැගී ඇත්තේ තමන්ගේම ගමේ සිටින මේසන් බාස් කෙනෙකි. සියලු‍ යාතිකා අවසන්ව දේවාලයෙන් පිටවූ මෙම ඥාති පිරිස නිවෙසටවිත් කතිකා කරගෙන ඇත්තේ පේනයෙන් කියූ පුද්ගලයා උපක්‍රමශීලීව ගෙදරටම ගෙන්වාගෙන තඩිබාන්නටය. 

එක් ඥාතියකු බාසුන්නැහේ හොයාගෙන ගිහින් චාටු බස් කියා නිවෙසට කැඳවාගෙනවිත් ඇති අතර එහිදී තරුණියක වන දුවත් රජයේ නිලධාරියකු වන බාප්පාත් සීයාත් එකතු වී එක පොරේට තඩිබා මෙම පුද්ගලයා පිටත්කර යවා ඇත. පහරකෑ පුද්ගලයාට දවස් දෙකක් රෝහල්ගතව සිටීමටත් සිදුව ඇති අතර ඔහු කළ පැමිණිල්ලක් නිසා මෙම ඥාති පිරිසට සිදු වූයේ පොලිස් කූඩුවේ කූරු ගනින්නටය. 

සිද්ධිය සමථ කරන්නට සමථමූල මණ්ඩලයට බාර කෙරිණි. සමථ මණ්ඩල සභාපති ඉදිරියේ ඥාති පිරිස තමන් කළ වැරැද්ද පිළිගත් නිසා පැමිණිලිකරු පවසා ඇත්තේ ප්‍රසිද්ධ ස්ථානයකදී තමාට වැඳ සමාව ගන්නා ලෙසයි. එයට කැමැති වූ ඥාති පිරිස හිමිවරුන් දෙනමක ඉදිරියේ පැමිණිලිකරුට වැඳ සමාව ගෙන ඇත. 

 සාස්තරකාරයකුගේ කීම අසා වැඩ කළ ඥාති පිරිස එතැනින් පිටවී ගියේ තමන්ට අනාගතයට මතක හිටින පාඩමක් ඉතිරි කරගනිමිනි.