කරන්දෙණිය එම්. සුසිල් ප්‍රියන්ත

වෙරි මතින් වැල්ලේ වැටෙන්න ගිය සුදු කතට ආධාරකයක් වී තමා ඇතුළු දරු පවුලම අනාථ කරගත් පෞද්ගලික ආරක්ෂක නිලධාරියකු පිළිබඳ පුවතක් දකුණු පළාතෙන් අසන්නට ලැබේ.

ඔහු වැඩ කළේ දෙස් විදෙස් සංචාරකයන් ලැගුම් ගන්නා හෝටලයකය. ඒ ආරක්ෂක නිලධාරියකු ලෙසය. දරු මල්ලන්ගේ බඩ කට පිරෙව්වේත්, අකුරු සාස්තරය ලබා දුන්නේත් මේ රැකියාවට පින් සිදුවෙන්නටය.
එදා ඔහු සේවය කළ හෝටලයේ විදෙස් සංචාරකයන්ගේ සාදයකි. එය පැවැතියේ හෝටලය පිටුපස වැල්ලේය. මධුවිතට එහි ප්‍රධාන තැනක් හිමිවී තිබිණ. සුදු මහත්වරුන් මෙන්ම සුදු නෝනලාත් හරි හරියට මධු විත තොල ගෑහ. එදා ඔහු ආරක්ෂාව සපයමින් සිටියේ මේ අයටය.

මධු විත තොල ගගා සිටිය සුදු නෝනා කෙනකුට හොඳටම වෙරිය. ඇය හුන් තැනින් නැගිට්ටේ එළියට යාමටය. ඇය සමග එකට මධුවිත තොලගාමින් සිටි අනෙක් සුදු නෝනලා සුදු මහත්වරු ඇය හැසිරෙන අයුරු සිය ජංගම දුරකතනවලින් ඡායාරූප ගනිමින් වීඩියෝ කරමින් සතුටක් ලබමින් සිටියහ. කෙලින් සිටගෙන සිටීමටවත් නොහැකිවූ ඇයට වැනි වැනී ඇවිදගෙන යාමට හැකිවූයේ ටික දුරකි. ඇය බිමට පතබෑවීමට පටන් ගත්තාය. ඒ සමගම ක්‍රියාත්මක වූ ඔහු දනිපනි ගා එතනට දිවවිත් සුදු නෝනා දෑතින්ම බදාගෙන ඒ ආසන්නයේ තිබූ පුටුවක වාඩි වීමට සැලැස්සුවේය.

ගතවූයේ ටික වේලාවකි. ඔහුට හෝටලයේ පාලන අධිකාරියෙන් කැඳවීමක් ලැබුණි. සුදු නෝනා කෙනෙකුගේ හිරි ඔතප් බිඳීමේ චෝදනාවක් ඔහුට එල්ලවී තිබිණ. ඡායාරූප සහිතව පැමිණිල්ල ලැබී තිබුණි. ඒ සම්බන්ධයෙන් කෙතරම් කාරණා කීවත් ඔහුට නිදහසක් නොවීය. වහාම ක්‍රියාත්මකවන පරිදි ඔහුගේ සේවය නතර කර තිබුණේය. තමාගේ රාජකාරියට නොවන අනවශ්‍ය දෙයක් කළේ මන්ද යයි හෝටලයේ පාලන අධිකාරිය ඔහුගෙන් ඇසූවිට ඔහුට දෙවියන් බුදුන් සිහිවූයේ දැන් ඉතින් තව රැකියාවක් සොයා ගන්නාතුරු දරු පවුල ජීවත් කරවීම මතක්වූ විටය.