(සිටිනාමළුව - අනීෂා මානගේ)
සොරකම් කරන ලද වී ගෝනි වලින් වැටුණු වී වැටුණු මාර්ගය ඔස්සේ ගමන් කිරීමෙන් සොරා හඳුනාගත් පුවතක් තංගල්ල ප්‍රදේශයෙන් වාර්තා විය.

සිද්ධිය සැකෙවින් මෙසේය.

මාස් කන්නයේ වගා කළ වී අස්වැන්නෙන් ගබඩා කර තිබූ කිලෝග්‍රෑම් හතළිහක් බැගින් අඩංගුව තිබූ වී ගෝනි හතරක් කිසියම් අයකු විසින් රාත්‍රී කාලයේදී සොරකම් කර ඇතැයි තංගල්ල පොලිසියට පැමිණිල්ලක් ලැබුණේ තංගල්ලේ පදිංචි ගොවි මහතකුගෙනි. 

සිද්ධියට අදාළව පරීක්ෂණ සිදුකළ නිලධාරීන්ට වී ගෝනි සොරකම් කළ සැකකරු හඳුනාගැනීමට අපහසු වූයේ නැත. එනම් ගොවිමහතාගේ නිවෙසෙහි සිට සැකකරුගේ නිවෙස දක්වා වැටී තිබූ වී බීජ වල ගමන් මාර්ගය ඔස්සේ ගමන් කිරීමෙන් සොරකම් කරන ලද වී ගෝනි හතරම පහසුවෙන් සොයාගත හැකිවීමය. සොරකම් කළ වී ගෝනි වල තිබූ කුඩා සිදුරකින් වී බීජ බිම පතිත වී තිබූ අතර ගොවි මහතාගේ නිවෙසෙහි සිට සැකකරුගේ නිවෙස දක්වා වූ මීටර් දෙසීයක පමණ දුරකට වී වලින් මාර්ගයක් තැනී තිබී ඇත. සැකකරුගේ නිවෙසෙහි කාමරයක් තුළ සඟවා තිබියදී සොරකම් කරන ලද වී ගෝනි හතරම පොලිස් නිලධාරීහු සොයාගත්හ. 

තංගල්ල පට්ටියපොළ ප්‍රදේශයේ පදිංචි විසිහත් හැවිරිදි සැකකරු පොලිස් අත්අඩංගුවට ගැනුණි.

තංගල්ල මූලස්ථාන පොලිසියේ වැඩබලන ස්ථානාධිපති පොලිස් පරීක්ෂක නුවන් විජේතුංග මහතාගේ උපදෙස් පරිදි විවිධ පැමිණිලි අංශයේ ස්ථානාධිපති උප පොලිස් පරීක්ෂක දමින්ද, පොලිස් කොස්තාපල් අමිල (87119) සහ හෙට්ටිආරච්චි (40925) යන නිලධාරීහු සැකකරු අත්අඩංගුවට ගත්හ.