විශ්‍රාම පූර්ව නිවාඩු ලබා සිටින ආරක්‍ෂක අංශයක ආබාධිත සුළු නිලධාරියෙක් තමාගේ වැටුප් ලබාගැනීම සඳහා සේවා ස්ථානයට පැමිණ ආපසු නිවසට යාම සඳහා ගාල්ල බස් නැවතුම්පොළට ආවේය. තමා නිවසින් එනවිට වතුර බෝතලයක් ගෙන එන ලෙස කුඩා දියණිය කළ ඉල්ලීම මතක්වූ ඔහු වෙළෙඳසලකට ගොස් වතුර බෝතලයක්ද මිලදී ගත්තේය.

බස් නැවතුම්පොළේදී ඔහු අසලට පැමිණි පුද්ගලයකු එක්වරම ‘හලෝ කොහොමද මොකද මෙතැන කරන්නේ, මොකද කකුලට උනේ” යනුවෙන් ඇසුවේය. මම උතුරෙ ඉන්න කාලේ යුදf්දට අහුවෙලා තමයි කකුල කැඩුණේ දැන් පැන්ෂන් යන්න ඉල්ලලයි ඉන්නේ” ඔහු කීය.

 “අයියෝ අපි ඔයාලට සලකනව මදි. අද අපි නිදහසේ ඉන්නේ ඔයාලා නිසයි. යමු... යමු... මොනව හරි බොන්න. ගහමු පොඩි අඩියක්” අමුත්තා පෙරැත්ත කළේය.

 “අනේ මම මත්පැන් බොන්නේ නැහැනේ. බොහොම ස්තුතියි” ඔහු කීවේය.

“හරි හරි ඒකට කමක් නැහැ. වෙන මොනව හරි බොමු. යමු යමු.“ කියමින් අමුත්තා ඔහුද කැටුව සුපිරි වෙළඳසලකට ගියේය. එසේ  ගොස් අමුත්තා රුපියල් පන් දහසේ නෝට්ටුවක් දී ඉහළම වර්ගයේ සැර මත්පැන් බෝතලයක් සහ සිගරැට්ද, අවශ්‍ය බයිට්ද මිලදී ගත්තේය. පසුව දෙදෙනාම පැමිණ ත්‍රිරෝද රථයකට ගොඩවූහ.

ත්‍රිරෝද රථය දඩල්ල ප්‍රදේශයේ අවන්හලක නතර විය. අමුත්තා එහිදී මත්පැන් පානය කළ අතර ඔහු කොකාකෝලා බොමින් සිගරැට් දල්වාගෙන දුම් උරන්නට විය. සුළු වේලාවකදී ඔහුට නිදිමත ගතියක් දැනී ඔළුව මේසයට ගසා ගත්තේය. විනාඩි කිහිපයකට පසු ඔහු ඇස් ඇර බැලුවේය. ඔහු සමග පැමිණි අමුත්තා නැත. ඔහුට දාඩිය දමන්නට විය. සාක්කුවට අතදමා පසුම්බිය බැලුවේය. එහි එතරම් ලොකු මුදලක් නොතිබූ නමුත් පසුම්බිය සාක්කුවේ තිබිණි. දුවට ගත් වතුර බෝතලයද මේසය මතවිය.

 කිසිත් අඩුවක් නැත. එසේනම් තමා සමග පැමිණි අමුත්තාට සිදුවුයේ කුමක්ද? මත්පැන් බෝතලයද සමග අමුත්තා අතුරුදන්ය. පසුව ඔහු බසයට නගින්ට පාරට ඒමට සූදානම්ව කර අතගා බැලුවේය. රුපියල් පනස් තුන් දහසක් වටිනා රන්මාලය ගෙලෙහි නැත. සිදුවී ඇති දෙය දැන් පැහැදිලිය.

නිවසට පැමිණි ඔහු සිදුවූ කිසිම දෙයක් බිරිඳට කීවේ නැත. එහෙත් පසුදින සැමියාගේ කරේ තිබූ මාලය නොදුටු බිරිඳ ඒ ගැන විමසුවාය. බිරිඳට සැඟවීමට තවත් නොහැකිවූ නිසා ඔහු සිද්ධිය කීවේය.

වහාම පොලිසියට ගොස් පැමිණිලි කරන ලෙස බිරිඳගෙන් නියෝගයක් ලැබිණි. ඒ අනුව වහාම ඔහු ගාල්ල පොලිසියට පැමිණ විවිධ පැමිණිලි අංශයේ පැමිණිල්ලක් සටහන් කළේය.

දැන් මේ පිළිබඳව විවිධ පැමිණිලි අංශයේ ස්ථානාධිපති  ප්‍රධාන පොලිස් පරීක්‍ෂක චන්දිමාල් මහතාගේ උපදෙස් පරිදි සැරයන් විජේරත්න (24948) මහතා පරීක්‍ෂණ ආරම්භ කර ඇත. 

(උණවටුන ඩී.ජී. සුගතපාල)