(හාරිස්පත්තුවේ - මොහොමඩ් ආසික්)
ඉංග්‍රීසි භාෂාව නිවරැදි ලෙස හසුරුවා ගත නොහැකි වූ බිරියක සිය සැමියාගේ ජංගම දුරකතනයේ සටහනක් වැරදියට වටහා ගැනීම නිසා නිවස තුළ ජංජාලයක් ඇතිවීමේ පුවතක් කන්ද උඩරට ප්‍රදේශයේ එක්තරා  ගම්මානයකින් වාර්තා වෙයි.

එය කන්ද උඩරට ප්‍රදේශයේ එක්තරා සුන්දර වූ නමුත් දුෂ්කර ප්‍රදේශයක පිහිටි ගම්මානයකි. මෙහි පදිංචි මැදිවියේ පුද්ගලයෙක් සිය පවුල නඩත්තු කිරීම සඳහා කුලී වැඩ කළ ද ගමේ සියලු‍ පොදු කටයුතුවලට සියල්ලට කලින් දායක වෙයි. මේ නිසාම ගමේ රාජකාරි කරන සියලු‍ රාජ්‍ය නිලධාරින් ගමේ පොදු කටයුතුවල දී උදව්වට එක් කර ගන්නේ මොහුය.

මෙසේ සිටිය දී මෙම ගමට මෑතක දී තරුණ වියේ කාන්තාවක් රාජකාරියක් සඳහා පත්ව ආවාය. ඉතා ප්‍රියමනාප පෙනුමකින් යුත් ඇය සියල්ලන්ටම නිතර සිනාමුසුව කතා කර ඔවුන්ගේ සිත් දිනා ගත්තාය. ඒ නිසාම ගමේ සියලු‍ දෙනා ඇයට මිස් යනුවෙන් ගෞරවාන්විතව ඇමතූහ. ඇයගේ ගමේ රාජකාරි සඳහා ද පෙර කී පුද්ගලයා සියල්ලන්ටම මුලින් ඉදිරිපත්ව සහාය ලබා දුන්නේය. මිස්ට ගමේ ඕනෑම රාජකාරියක් සඳහා  ඔහු සහාය ලබා දෙන්නේ  තමන්ගේ වැඩද පාඩු කර ගනිමිනි. ඔහු ඒ සියල්ල සිදු කරනුයේ ගමේ දියුණුව අපේක්ෂාවෙනි. 

එසේ වුවද ඔහුගේ බිරිඳ එතරම් මෙයට කැමැති වූයේ නැත. එතරම් අධ්‍යාපනයක් ද ලබා නොතිබූ ඇය. සිය සැමියාට නිතර දොස් කියන්නට වූවාය. එසේ වුවද ඒ සෑම අවස්ථාවකම ඔහු සිය බිරිඳට මිස්ගේ හොඳ ගති ගැන කියමින් මිස් එහෙමයි, මිස් මෙහෙමයි  කිය කියා මිස් ගැනම කියන්නට විය. බිරියට මෙය හිසරදයක් වූවා පමණක් නොව තම සැමියා මිස් ගැන ඕනෑවට වඩා හිතන බව ද සිතුවාය. 

මෙසේ කාලය ගත වෙද්දී සිය සැමියාගේ දුරකතනය නාද විය. ඒ අවස්ථාවේ බිරිඳ ඒ අසලට එන අතරතුර දී එක් වරම ජංගම දුරකතනයේ නාදවීම නැවැතිණ. මේ ගැන සැක සිතූ බිරිඳ එක් වරම සැමියාගෙන්  ජංගම දුරකතනය උදුරාගෙන බලාගෙන බලාගෙන ගියාය. ඉංග්‍රීසි භාෂාව ගැන ඒතරම් දැනුමක් නොතිබූ ඇය ජංගම දුරකථනයේ ඉංග්‍රීසියෙන් සටහන්ව තිබූ මිස් කෝල් යන්න මිස් ගේ කෝල් එකක් ලෙස වරදවා වටහා ගැනීම නිසා සැමියාට එදින පුරාම බිරිඳගේ දෝස්මුරයට මුහුණ දෙන්නට විය. දීර්ඝ වේලාවකට පසුව අසල්වැසි ඥාතියකු පැමිණ ඇයට සිදුව ඇති දේ පැහැදිලි කර දී එලෙස ලැබී තිබූ දුරකතන අංකය ද පෙන්වා දීමෙන් පසුව සිද්ධිය සමථයකට පත් විය.