වලව කේ.පී. සුමනදාස
යතුරු පැදියකින් පැමිණි තරුණයන් දෙදෙනකු නිවසේ දොර හැර අයිතිකරු බලා සිටියදීම ‘වී’ කවරයක් රැගෙන අයිතිකරුට ද අපි යනවා මාමේ යැයි පවසා නික්ම යාමේ පුවතක් සෙවනගල හබුරුගල ග්‍රාම නිලධාරි වසමේ කිරිඉබ්බන් වැව ජනපදයෙන් වාර්තාවේ.

නිවෙසේ ජීවත් වන්නේ ඉතා ගුණ යහපත් යුවළකි. ස්වාමි පුරුෂයා කාත් සමගත් වැඩි කතා බහක් නොමැති වුවත් බිරිඳ කා සමගත් සුහදශීලීව කටයුතු කරන්නියකි. ඔවුහු ගොවිතැන් බත් කරමින් ජීවත් වෙති. මොවුන් මෙවර නෙළාගත් ‘වී’ අස්වැන්න නිවෙසේ සාලයේ තැන්පත් කර තිබුණේ සතුන්ගෙන් අසානාසි වේ යැයි බියෙනි. 

මෙවර යල කන්නයේ ද වගා කටයුතු සිදු කිරීමට සැලසුම් කර වෙනත් ගොවි මහතකුගෙන් බිත්තර වී කවර දෙකක් මාරු කර ගැනීමට සිතා වී කවර දෙකක් දොරකඩට ඇද දමා එම කටයුත්ත තවත් සුළු මොහොතකින් සිදු කිරීමට ඔවූහූ සූදානම් වූහ. දෙන්න දෙමහල්ලන් මුළුතැන් ගෙට ගොස් සිටි මොහොතේ යතුරු පැදියකින් පැමිණි තරුණයන් දෙදෙනකු යතුරුපැදිය පාරේ නවතා එක් ‘වී’ කවරයක් ගෙන යතුරුපැදිය උඩින් තබාගෙන ඇත.

ඒ මොහොතේ නිවෙසේ ස්වාමි පුරුෂයා මුළුතැන් ගෙයි දොරටුවෙන් පිටව පාර දෙසට ආවේ ඇසුණ ශබ්දය ගැන විපරම් කිරීමටය.
එවිට යතුරුපැදියේ සිටි තරුණයන් දෙදෙනා යන්නම් මාමේ කියා ‘වී’ කවරයක් ඔඩොක්කුවේ තබාගෙන පිටවී ගියේ ඔහුට කිසිවක් සිතා ගැනීමට ඉඩ නොතබාය. 

නිවෙස් හිමියා නිවෙසේ ඉදිරිපස දොරකඩ දෙස බලන විට ‘වී’ කවරයක් නොමැතිවීමෙන් කලබලවී බලනවිට යතුරුපැදියේ පැමිණි තරුණයන් දෙදෙනා රැගෙන ගොස් ඇත්තේ එම ‘වී’ කවරය බව හෙළිවී ඇත.