පෙරහර බලන්න ගිය පෙම්වතකුට සිදුවූ අපූරු අකරතැබ්බයක් පිළිබඳව පුවතක් අම්බලන්ගොඩ නගරයෙන් අසන්නට ලැබේ.                        
ඔහු ගමේම තරුණියක හා පෙමින් බැඳුණේය. ඒ මේ ඊයේ පෙරේදාය. කාටත් හොර රහසේය. මේ ප්‍රේම සම්බන්ධය දන්නේ කිහිපදෙනකු පමණි. තරුණයාගේ කිට්ටුම සමීපතමයන් පමණි.
දුරකථන කෙටි පණිවිඩ කිහිපයක් පමණක් හුවමාරු වුණත් දෙන්නා එකට හමුවී කතා කර ඇති අවස්ථා නොමැති තරම්ය. ඒ නිසා දෙන්නාම සිටියේ එකට හමුවන දිනයක් එන තුරු ඇඟිලි ගැණ ගැණ ය.                       
අම්බලන්ගොඩ නගරයේ පැවැත්වෙන රෑ පෙරහරක් ගැන දෙන්නටම ආරංචිය එන්නේ ඔය අතරය. දෙන්නාම රෑ පෙරහර නරඹන්න කතා කර ගත්තේ එස්.එම්.එස්. පණිවිඩ හරහාය. ඒ අනුව දෙන්නා රෑ පෙරහර නරඹන්න ගියෝය.

තරුණයා මිතුරන් පිරිසක් සමග ගිය අතර තරුණිය ගියේ ජීවිතයේ සැඳෑ සමය ගත කරන ආච්චි අම්මා සමගය. කතා කරගත් පරිදි දෙන්නාම එකම තැනකය. පෙරහර එන තෙක් ඔවුහු බලා සිටියෝය.                          
පෙරහර එමින් තිබේ. සියල්ලන්ගේම දෑස් පෙරහර වෙතය. ඒ අල්ලපනල්ලේ ඒ අවසරයෙන් තරුණයා තරුණියගේ කිට්ටුවටම ආවේය. එතනට පැමිණි තරුණයා තරුණියගේ අතක් අල්ලා ගත්තේය. ඒ සමගම ඔහුගේ දෑස් ද අනෙක් අය වගේම පෙරහර වෙතය. එක් අතක් පමණක් තරුණිය අත වෙතය. සියල්ලම කළුවරේය.                          
ඔහුගේ එක් මිතුරෙකු ඔහුගේ කනට කොඳුරා යමක් කීවේය. ඔහු කලබල වූවේය. ඔහු තරුණියගේ අත අල්ලා සිටි අත ඉක්මනින්ම ඉවතට ගත්තේය. ඔහු තරුණියගේ යයි සිතා එතෙක් වෙලා අල්ලා සිට ඇත්තේ තරුණියගේ ආච්චිගේ අත ය.
සිදුවී ඇත්තේ සිය මිනිපිරිගේ කිට්ටුවට  තරුණයන් පිරිස දුටු ආච්චි අම්මා ඇය සිටි පැත්ත මාරු කර තිබීමය.
මෙය නොදැක්ක තරුණයා කලබලේ තරුණියගේ යයි සිතා අල්ලා ඇත්තේ ආච්චි අම්මාගේ අතය. ආච්චි අම්මා සිතා ඇත්තේ සිය අත අල්ලා ඇත්තේ සිය මිනිපිරිය කියා ය.
රෑ පෙරහර නරඹද්දී සිය මිතුරාට වූ අකරතැබ්බය අනෙක් මිතුරන් ගමම දැනුම්වත් කරේ ගමේම අය සිනහ සයුරේ ගිල්වමින් ලු‍.

කරන්දෙණිය එම්. සුසිල් ප්‍රියන්ත