කැබිති ගොල්ලෑව හේමන්ත රණසූරිය

තම රත්රන් බඩු සොර සතුරන්ගෙන් ආරක්ෂා කර ගැනීම සඳහා උපක්‍රමයක් යෙදූ කාන්තාවකට අවුරුදු උත්සවයකදී එම උපක්‍රමය ජන සමූහයක් ඉදිරියේ හෙළිදරව් වීමේ අපූරු සිදුවීමක් ඉකුත් දිනක රජරට පළාතේ පැවැති අවුරුදු සැණකෙළියකදී දැනගැනීමට හැකි විය.
එම සිදුවීම මෙසේය.
එදින තම ගම් පළාතේ පැවැත් වූ අවුරුදු උත්සවයක් සඳහා මවක් සහ  ඇයගේ තරුණ වයසට එළඹෙමින් සිටි දියණියක් සහභාගී වූහ. එම දියණිය උදෑසන සිට තරග ඉසව් කීපයකටම සහභාගි වී ඉන් ජයග්‍රහණය ලබා සිටි අතර, එදින සන්ධ්‍යාවේ පැවැත්වෙන විවිධ ඇඳුම් තරඟය සඳහාද ඇය සූදානම්ව සිටියාය.
අවුරුදු උත්සවය දිවා ආහාරය සඳහා නතර කිරීමෙන් පසුව, දියණිය සහ මව ඔවුන්ගේ නිවසට පැමිණ දිවා ආහාරය ගෙන යළි පස්වරු දෙකට පමණ අවුරුදු උත්සවය කරා පැමිණියහ.
ඇය විවිධ ඇඳුම් තරඟය සඳහා ඉදිරිපත් කිරීමට බලාපොරොත්තු වන්නේ ‘‘පන් නෙළන කාන්තාවගේ”‍ චරිතයක් වන බවත්, ඒ සඳහා ගායනා කරන ජන කවි කීපයක් ද කට පාඩම් කරගෙන සිටි අතර, මව පැදුරු විවීමට එක් රැස් කරගෙන තිබූ පන්වලින් පන් මිටියක් ද කල් වේලා ඇතුව අවුරුදු උත්සවය පැවැත්වෙන සමීපයට රැගෙන විත් සිටියාය.
මෙම දියණිය කිසිවෙකුටත් නොපෙනෙන ලෙස පන් නෙළන කාන්තාවක ලෙස වේශ නිරූපණය වී තම වාරය පැමිණෙනතුරු රැඳී සිටියාය.
ඇයගේ වාරය පැමිණියේය. පන් නෙළන කාන්තාව පන් මිටියක් හිස මත තබාගෙන ඉඟ සුඟ දෙපැත්තට නළවමින් ජන කවියක්ද ගායනා කරමින් අපූරු රංගනයක යෙදුණාය. නරඹන්නෝ සියල්ලෝම වශී වී අත්පොළසන් දෙමින් එම රංගනය නැරඹුවෝය.

‘‘ගාන තෙල් හඳුන් වරලස ඔමරි කොට නෑනෝ නුඹත් එනවද පන් නෙළන්නට”‍ යනුවෙන් ගායනා කරමින් ඇය විවිධ ඇඳුම් තරගය ඉදිරිපත් කරන අතරතුර නරඹන්නන් මැද සිටි කාන්තාවක් පිරිස දෙපැත්තට කරමින් එක්වරම  ‘‘දෙයියෝ සාක්කි”‍කියා විලාප තබමින් එළිමහන් මණ්ඩපය මැදට පැන, විකට ඇඳුම් තරගයට ඉදිරිපත් වී සිටි දියණිය පසෙකට තල්ලු‍ කර දමා ඇයගේ හිස මත තිබූ පන්මිටිය උදුරා ගැනීමට පොර බැදුවාය.
තරඟ විනිසුරුවරු සහ සංවිධායකවරු පැමිණ මෙම බාධා කිරීම පිළිබඳව කරුණු විමසූහ.
කිසිවක් කතා නොකළ කාන්තාව පන් මිටිය උදුරාගෙන, පන් මිටිය තම සිරුරට හිරවන සේ බදාගෙන නිවස දෙසට දුවන්නට වුවාය.
සියල්ලෝම තම දෑස් නළල් මත ඉන්දවා, කටවල් ඇරගෙන ඒ දෙස බලා සිටියෝය.
තරග විනිසුරුවන්ට සහ සංවිධායකවරුන්ට විවිධ ඇඳුම් තරගයට ඉදිරිපත් වූ එම දියණිය පන් මිටිය උදුරා ගත්තේ තම මව බව පැහැදිලි කළාය. එහෙත්, පන් මිටිය තම මව විසින් උදුරා ගත්තේ කුමන හේතුවක් නිසා දැයි ඇය කිසිවක් නොදැන සිටියාය.
විනාඩි කීපයක් ගතවීමටත් මත්තෙන් සියල්ල හෙළිදරව් විය. එනම්, එම කාන්තාව විසින් ඇයගේ රත්රන් බඩු සොර සතුරන්ගෙන් ආරක්ෂා කර ගැනීම සඳහා කිසිවකුටත් සැක නොසිතෙන ලෙස රහසිගතව නිවසේ සඟවා තැබීමට යොදාගෙන ඇත්තේ තම දියණිය විකට ඇඳුම් තරගය සඳහා රැගෙන විත් තිබූ මෙම පන්මිටිය බවය.
කෙසේ වුවද විවිධ ඇඳුම් තරගයෙන් පන් නෙළන කාන්තාව ලෙස රංගනය ඉදිරිපත් කළ එම දියණිය ප්‍රථම ස්ථානය හිමිකර ගැනීමටද සමත් වූවාය.
අවුරුදු උත්සවය නිමා වුවද, එම ගම්පළාතේ පිරිස් මෙම මවට ‘‘රත්රන් පන් අම්මා”‍යැයි නමක් පට බැඳ ඇති බවට ආරංචියක් පවතී.