(අයගම ඩබ්ලිව්.ජී. විජේතුංග)
පොලිස් දුරකතන අංක 119 කතාකොට නැන්දම්මා නිවෙසින් එළවාගත් බෑණා කෙනකු පිළිබඳ අපූරු පුවතක් සබරගමුව පළාතේ ගමකින් වාර්තා වේ. 

දැනගන්නට ඇති අන්දමට එම සිද්ධියට සම්බන්ධ පුද්ගලයා විවාහ දෙකක් කරගත් අයෙකි. මොහු දෙවැනි විවාහය කරගෙන තිබෙන්නේ දකුණු ප්‍රදේශයෙනි. දෙවැනි විවාහයේ කාන්තාව ද කලින් විවාහ වී දීගය අත්හැරුණු කාන්තාවකි. 

මෙම සිද්ධියට සම්බන්ධ බෑණා නැන්දම්මා සහ ඇගේ පවුලේ අය සමඟ එතරම් ඇඟෑලුම්කම් නොදැක්වූ පුද්ගලයෙකි. කොටින්ම ඔවුන් තම නිවෙසට එනවාටත් ඔහුගේ කැමැත්තක් නොවීය. 

දිනක් නැන්දම්මාට සිය දියණිය බලන්න යන්න ආසාවක් ඇති වී, ඒ බව ඇගේ පුතාට සැල කර සිටියාය. මවගේ ඉල්ලීම ඉවතට දැමිය නොහැකි නිසා බිරියට කතා කොට ඇයත් කැටුව මව ත්‍රිරෝද රථයක නංවාගෙන සහෝදරියගේ නිවෙසට ගිහින් ඇරලා රාත්‍රී 10.00ට පමණ ඔවුන් දෙදෙනා ආපසු ගියේ, මව කැඳවාගෙන යෑමට සති දෙකකින් නැවත එන බව පවසාය. 

නැන්දම්මා නිවෙසට ගෙනැත් ඇරලූ වෙලේ සිට බෑණා පසු වුණේ කේන්තියෙන් පුපුරමින්ය. ඔහු නැන්දම්මා නිවෙසින් පන්නා දැමීමට මගක් සොයමින් කල්පනා කරමින් සිටිනා අතර අපූරු අදහසක් ඔහුට පහළ විය. 

වහා ක්‍රියාත්මක වී 119 පොලිස් දුරකතන අංකය ඇමතූ හෙතෙම නාඳුනන වයස්ගත කාන්තාවක් තම නිවෙස අසල පාරේ දමා ගොස් ඇති බව දැනුම් දුන්නේය. 

පොලිසිය රාත්‍රියේ එම ස්ථානයට පැමිණ තොරතුරු විමසා මෙම වයස්ගත කාන්තාව රෝහලට ඇතුළත් කළේ ඇය රෝගී තත්ත්වයෙන් පසු වූ නිසාය. බෑණාට තිබෙන බිය නිසා මෙම මහලු කාන්තාවත් ඇගේ දියණියත් පොලිසියට ඒ සම්බන්ධව සත්‍ය තොරතුරු වසන් කළහ. 

ගත වූයේ දින දෙකකි. මෙම සිද්ධිය මාධ්‍යයෙන් දුටු මෙම කාන්තාවගේ පුතා ඡායාරූපයේ සිටින්නේ තම මව බව හඳුනාගෙන රෝහලට පැමිණ ටිකට් කපාගෙන මව නිවෙසට කැඳවාගෙන ගොස් ඇත්තේ මස්සිනාටත් සිය සහෝදරියටත් දෙස් දෙවොල් තබමිනි.