(උණවටුන ඩී.ජී. සුගතපාල)
ගාල්ලේ පදිංචි පුද්ගලයකුට ඉකුත් අගෝස්තු මාසයේ දිනක දුරකතන ඇමතුමක් ලැබුණි. ඇමතුම ලැබුණේ කාන්තාවකගෙනි. තමා පිළියන්දල ප්‍රදේශයේ පදිංචි බවත් තමාගේ මිතුරකු ගාල්ලේ සිටින බවත් ඔහු සොයා ගැනීමට උදව් කරන ලෙසත් ඇය ඉල්ලා සිටියාය. තමාගේ සැමියා නොමැති බවත් පාසල් යන දරුවාට උදව් උපකාර කරන ලෙසත් ඇය ඉල්ලා සිටියාය.

කිසි දිනෙක දැක නැති ඇයගේ ඉල්ලීම අනුව ඔහු පළමුවෙන් රුපියල් හතළිස් දහසක් ඇයගේ ගිණුමේ තැන්පත් කළේය. ඉන්පසු දෙදෙනා නිතර නිතර දුරකතනයෙන් කතා කළ අතර පසුව ස්කයිප් තාක්ෂණය ඔස්සේ ද කතා කිරීමට පටන් ගත්තේය. ඇය තිස්පස් හැවිරිදි වියේ පසුවූ රූමත් කාන්තාවකි.

ස්කයිප් තාක්ෂණය ඔස්සේ කතා කිරීම ප්‍රමාණවත් නොවූ නිසා මුණගැසී කතා කිරීමට දෙදෙනාටම අවශ්‍ය විය. ඒ අනුව ඇය දිනක් ගාල්ල නගරයට පැමිණ ඔහු හමුවූවාය. ඉන්පසු දෙදෙනාගේ විශ්වාසය තවත් තහවුරු විය. මේ නිසා ඇය ඉල්ලන සෑම විටකම ඔහු ඇයගේ ගිණුමේ මුදල් තැන්පත් කළේය. ඒ අනුව නොවැම්බර් මාසය වනවිට ගතවූ මාස දෙකක කාලය තුළ ඔහු ඇයගේ ගිණුමේ තැන්පත් කළ මුදල රුපියල් දෙලක්ෂ පනස් දහසකි.

මේ අතර ඉකුත් දිනෙක ඇයගේ ජංගම දුරකතනයට කතා කළ විට පිළිතුරු දුන්නේ වෙනත් කාන්තාවකි. ඇය කියා සිටියේ තමාගේ මිතුරිය හෙරොයින් ජාවාරම් කිරීම සම්බන්ධයෙන් අත්අඩංගුවට ගෙන මේ වනවිට බන්ධනාගාරයේ රඳවා සිටින බවය. සිද්ධිය ඇසූ ඔහුගේ බලාපොරොත්තු සියල්ල කඩවී යන බවක් දැනුණි. තමා හසුව ඇත්තේ අපරාධකාරියකට බව ඔහුට සිතුණි.

කළ යුතු දෙයක් නොමැති තැන ඔහු පොලිසියට පැමිණියේය. ගාල්ල මූලස්ථාන පොලිස් පරීක්ෂක අජිත් කුමාර මහතාගේ උපදෙස් පරිදි විවිධ පැමිණිලි අංශයේ සැරයන් විජේරත්න (24948) මහතා ඔහුගේ පැමිණිල්ල සටහන් කර ගත්තේය.